غيرتني أنثي عربية بقلمي " ولاء يونس " مكتملة

الفصل التاسع والعشرون

جلس مالك مكانه وقال : اتكلمي انا سامعك
جوري : تمام .. أنا بنت زي باقى البنات نفسها يكون معاها صديقة وبيست زي ما بيقعدوا ينزلوا أنا ببقى زعلانة جدا مش لاقية وحدة تبقى معايا كده محدش كان بيقبل يصاحبني .. شيخة بقى وبتاع حتى اللي بيصاحبوني بتبقى علاقة سطحية ازيك عاملة اي .. كنت زعلانة وكنت بعيط بسبب كده بس عمري ما قولت لحد الكلام ده.. آه معايا حياء أختي وصاحبتى بس برضو في الآخر أختي .. وقتها سها دي هي اللي اتقربت مني وانا فرحت جدا لقيت البيست وهبقى زي باقى البنات واقعد انزل وانا والبيست وكده .. تفكير بنات بقى .. كنت بتغاضى عن تصرفاتها وعن أفعالها .. كان أهم شئ إن يكون معايا بيست مهما كانت بتعمل .. كنت بحكيلها كل حاجة أسراري الفترة دي بطلت اتكلم مع حياء كنت بحكيلها هي كل حاجة بطلب منها النصيحة واخد رأيها بعمل اللي بتقولي عليه .. أي نعم بسبب اللي كانت بتقولهولي كانت بتحصل معايا مشاكل هنا في البيت بس برضو كنت ماسكة فيها لغاية امبارح .. لما كنت عندها امبارح كنت عاوزة امشي بعد ساعة من وصولي فضلت تماطل معايا بحجة إنها قاعدة لوحدها وأنا بونسها صعبت علي وقعدت موبايلي كان فاصل شحن .. أخوها رجع من برا .. وهي ماشية معايا اتخبطت في رجلها الله أعلم كان تمثيل ولا حقيقة مقدرتش تمشي عليها وطلبت من أخوها هو اللي يوصلني وانا كنت رافضة جدا بعد إلحاح شديد إن مينفعش امشي لوحدي في المنطقة دي أخوها نزل معايا أنا كنت خايفة جدا ومتوترة كنا واقفين مستنيين تاكسي كان عمال يتكلم ويهزر أنا كنت بضحك مجاملة ليه وكمان كنت محرجة كان كل ما يقرب مني اتخانق معاه ويرجع يقرب تاني لغاية ما ركبت وجيت هنا وقتها انت زعلت ومشيت أنا كلمتها .. ثم صمتت
كان مالك يستمع لها بتركيز فقال : كملي
جوري : كلمتها وقولتلها على المشكلة اللي حصلت فضلت تقولي إن أنت مستنيني ارن واعتذر علشان تعرف إنك.. إنك غالي عندي .. كنت رافضة الموضوع بس هي قالت إني لو فضلت كده انت هتسيبني والخوف والفكرة سيطروا على دماغي وفي الآخر قررت أنفذ كلامها .. وبعد اللي حصل امبارح أنا ندمت جدا ولما كلمتها جرحتني جدا بكلامها .. أنا كنت هعتذر منك النهاردة.. بس أنت سبقتني .. ده كل اللي عندي
مالك : يااه يا جوري كل ده
جوري : أنا عارفة إن كلامي يبان تافه بس ليه أثر كبير في حياتي وأنت جرحتني أكتر بالكلام اللي قولته
مالك : أنا أسف يا جوري .. أنا مكنت..
جوري : مفيش داعي تتأسف وأنت فعلا ما ينفعش تكمل مع واحدة مش عارفه تحافظ على دينها
مالك : جوري ده سوء تفاهم
جوري : والله سوء تفاهم .. آه وأنت اي حد يبعتلك حاجة تيجي تكلمني كأني عاملة جريمة وتشكك في أخلاقي وبعدين تقولي سوء تفاهم.. أنا صدمتي فيك أكبر من صدمتي من اللي حصل .. كنت بعيط بسبب اللي انت بتقوله مش الفيديو أنا ما توقعتش منك حاجة زي دي أبدا
مالك : احنا الاتنين غلطنا يا جوري
جوري : آه صح .. أنا أغلط تقوم تقلع دبلتك وتقول مش هكمل .. أنت تغلط أنا اسامحك .. مش هو كده
مالك : حطي نفسك مكاني
جوري : الأمر اتضح بالنسبة ليك وليا .. يبقى مفيش كلام بيني وبينك دلوقتي وأصلا احنا مش مخطوبين
مالك : اي اللي بتقوليه ده
جوري : بقول اللي أنت قولته من شوية .. عن اذنك..
ثم نهضت وذهبت إلى غرفتها وأخذت تبكي
كان كل ما حدث تحت أنظار خالد المندهش والمصدوم بكل ما يحدث وأبىٰ أن يتفوه بكلمة حتى يرى نهاية ما يحدث بعد مغادرة جوري قال خالد : مالك
نظر له مالك بخزيٍ وقال : نعم يا عمي
خالد : أنا بأكد إن جوري غلطت .. بس أنت غلطت برضو يابني .. أنت دلوقتي خطيبها بكرا هتبقى زوجها .. لازم تحافظ عليها يابني ما تاخدهاش بأسلوب الترهيب ده أنت وجهتلها أصابع الاتهام وصدمتها فيك .. قبل ما تخطبها قولتلك خلي بالك جوري عقلها طايش ولسا صغيرة يعني أي حد يقولها حاجة ممكن يشككها في نفسها كمان عادي .. قولتلك الكلام ده كذا مرة وأكدت عليك
مالك : أنا عارف إني غلطت .. بس مش عارف اعمل اي دلوقتى
خالد : بص يابني دلوقتي فترة زعل وتهدى
مالك : فيه أمل يعني ..
خالد : إن شاء الله يابني
____________________________________