بينما كانت ماجدة تضع الطعام على المائدة فإذا بجرس البيت يرن فقالت ماجدة : وده مين اللى هيجيلنا في وقت زي ده
خالد : شوفي مين طيب
ماجدة : حاضر
ذهبت ماجدة لفتح الباب فإذا بها تجد أختها أمينة ومعها أبناءها فقالت لها ماجدة متعجبة: أهلا يا أمينة اتفضلي .. ازيكم يا ولاد
محمود : بخير
اكتفت مروة بابتسامة
أمينة : امال فين الولاد حياء ويزَن
ماجدة متفهمة ما تقصده : وجوري نسيتيها ع العموم هما نايمين دلوقتي
أمينة : معلش صحيهم
ماجدة : لي خير
أمينة : اديكي شايفة الولاد جايين معايا عاوزين يقعدوا مع ولاد خالتهم حياء ويزَن
ماجدة : اه وجوري كمان بنت خالتهم ولا نسيتيها
أمينة : ما علينا بس صحيهم
ماجدة : أمينة انتي عارفة الولاد كويس
أمينة : ازاي يعنى
ماجدة : حياء وجوري لو حصل اي مستحيل يطلعوا يسلموا على محمود ويزَن من رابع المستحيلات يسلم على مروة
أمينة : بس دول ولاد خالتهم اي يعنى هتتبروا مننا ولا اي
ماجدة: والله لو احنا هنتبري دلوقتي كنا عملنا كده من زمان والمفروض تبقى فاكرة كويس
أمينة : جرا اي يا ماجدة هنفتح في مواضيع قديمة اتنست
ماجدة : اذا كنتي انتي نسيتي فمحدش مننا نسي ولا عمره هينسى
أمينة : يعني بتطرديني بالذوق
ماجدة : لا البيت بيتك تنوري في أى وقت
خالد وقد سمع حديثهم وهو يأكل فخرج قائلا : فيه اي يا ماجدة
ماجدة : مفيش يا أبو يزَن روح أنت كمل أكلك
خالد : ماشى بس يا ريت توطوا صوتكم شوية علشان الولاد مش هيعرفوا يناموا بالطريقة دى وخاصة أنهم عاوزين يرتاحوا
ماجدة : حاضر
أمينة وقد فهمت أنهم لن يوقظوهم لأجلها فقالت : معلش يا ماجدة أنا همشى دلوقتي عندي مشوار مهم
ماجدة : انتي لسا جاية خليكي قاعدة شوية
أمينة : لا وقت تانى ... يلا يا ولاد
وبعد ذهابهم قال خالد : هو فيه اي أختك مش هتبطل اللى فيها ده
ماجدة : انا ماليش دعوة هي حرة
خالد : هي كانت عاوزة اي من الولاد
ماجدة : عايزة حياء ويزَن علشان تقعدهم مع محمود ومروة
خالد : انتي فاهمة قصدها صح
ماجدة : أيوة فاهمة .. أختي وعارفاها .. روح كمل انت أكلك وما تشغلش بالك بيها
خالد : ماشى
__________________________________
أميرة : يا شهود ...يا شهود
شهود : أيوة يا ماما .
أميرة : تعالي عاوزاكي
شهود : حاضر
وذهبت إلي حيث تكون والدتها وجلست بجوارها فقالت أميرة : ما قولتيش رأيك في اللى اشتراه أخوكي
شهود : ذوقه جميل جدا
أميرة : طيب كويس .. بقولك تعرفي بسببك النهاردة اخوكى قابل مين
شهود بفزع : مين يا ماما
أميرة : ما تخافيش مش اللى في بالك
شهود بطمأنينة : يعنى مين فهميني
أميرة : صاحبه يزَن بتاع الكتّاب
شهود : يزَن مين
أميرة : يزَن يا بنتي يعني مين غيره
شهود : لا مش فاكراه
أميرة بابتسامة : هتعاودي تفتكريه
شهود : قصدك اي
أميرة لتغير الموضوع: لا مفيش... قصدى إنه مالك هيجيبه زيارة يعنى
شهود : آه .. ماشى ..... عاوزة حاجة
أميرة : لا رايحة فين
شهود : هكمل رسمتي
أميرة : ولما أنتي بتحبي الرسم كده ما دخلتيش فنون جميلة لي بدل تجارة
شهود : خلاص يا ماما ده مواضيع قديمة مش عاوزة افتحها تانى
أميرة : ماشى يا بنتي
_______________________
في ألمانيا
بعدما وصلت جوليا إلى المنزل ما إن دخلت حتي رن هاتفها فوجدت المتصل رقما غريبا فأيقنت أنه توماس فابتسمت بمكر وردت عليه قائلة : أهلا
توماس : أهلا جوليا
جوليا بمكر : مَن معى ؟
توماس : هل نسيتي صوتي بهذه السرعة
جوليا : يبدو الصوت مألوفا لي
توماس : إنه أنا توماس يا جوليا
جوليا: حقا ... أهلا بك عزيزي
توماس : كيف أنا عزيزك ولم تميزي صوتي
جوليا بغضب : عفوا توماس فهذه أول مرة تحادثني بها على الهاتف والأصوات تتغير وأيضا هناك أناس يتشابهون فى الصوت
توماس : لا عليكِ ... هل وصلتِ إلى المنزل ؟
جوليا : أجل وصلت منذ دقائق
توماس : هل آتي لأوصلكِ إلى الجامعة غدا ؟
جوليا : لا داعي
توماس: لماذا ؟
جوليا : لا أريد أن أتعبك معي
توماس : أوه جوليا .. تعبك راحة لي ... سآتي غدا
جوليا : حسنا ...شكرا لك .. وداعا
ثم أغلقت الهاتف وبدا الضيق على وجهها فقالت : أجل لدي خطة للإيقاع بصديقك المتعجرف وأنت هو سبيلي لمعرفة نقطة ضعفه ولكن سأتحمل هذا التطفل سأذهب إلى دكتور نفسى بسببه ..
______________________________
في مساء اليوم التالي في معاد الذهاب إلى الزفاف
ماجدة : يلا يا ولاد علشان نروح الفرح ونيجي بسرعة
يزَن : أنا عن نفسى جاهز من زمان ومستنيكم
حياء : أيوة يا ماما لسا مخلصة أهو
ماجدة : وجوري
حياء : لسا
بعد فترة
يزَن : يا الله أنا زهقت هي جوري العروسة وانا معرفش ولا اي
وما أن أتم جملته تلك حتى خرجت جوري من الغرفة ويبدو عليها أنها ليست في مزاج جيد للحديث
ماجدة بقلق : لو مش عاوزة تروحي يا حبيبتي عادى
جوري : لا يا ماما معنديش مشكلة .. وأسفة على تأخيرى كنت مصدعة شوية
همست حياء ليزَن قائلة : على فكرة من امبارح وهي كده من ساعة ما انت اتخانقت معها وهى زعلانة وامبارح بالليل كانت بتعيط
يزَن : طيب انزلي انتي وماما وانا هاجي وراكم ماشى
حياء : ماشى ... ماما تعالى ننزل انا وانتي ويزَن وجوري يبقوا ينزلوا ورانا
ماجدة : ماشى
وما إن نزلت الاثنتان حتى قال يزَن : ها لسا زعلانة برضو
هزت جوري رأسها نفيا
فقال : أنا أسف على الطريقة اللى اتكلمت بيها امبارح بس اتعصبت لأني مش عاوزك تعملي اي حاجة تغضب ربنا .. لسا زعلانة برضو
جوري : لا أنا عارفة أن معاك حق ومش زعلانة منك بس زعلانة من نفسى لأني عملت كده
يزَن : يا حبيبتي محدش معصوم من الخطأ كلنا وارد جدا وطبيعي إننا نغلط بس مش معنى كده أننا نفضل زعلانين على طول .. انتي استغفري ربنا وتوبي من الذنب ده وعلى فكرة زعلك وحزنك بسبب الذنب ده يعتبر توبة بل مجرد التفكير في التوبة يعتبر توبة
أزاحت تلك الكلمات جبالا من الهموم والأحزان من قلب جوري .. صمتت قليلا فقالت : مش يلا بقى اتأخرنا زمان حياء وماما بالهم انشغل
يزَن : أيوة دى جوري اللى اعرفها .. يلا
ابتسمت له وذهبوا إلى حيث العُرس
___________________________
أميرة : اي يا شهود يا حبيبتي لسا ما جهزتيش ولا اي
ردت عليها شهود وهي تخرج من غرفتها قائلة : لا يا ماما أنا جاهزة من زمان
أميرة : مش يلا طيب علشان ما تتأخروش
شهود : ماشى .. بس فين مالك
أميرة : قاعد فى الصالة مستنيكي
شهود : ماشى انا هروحله
بعدما وصلت إلى حيث يكون مالك قالت : مالك... أنا جاهزة
مالك : ماشى يلا
شهود : مالك
مالك : في حاجة
شهود : ما قولتش رأيك في الطقم وأنا لابساه
مالك : الطقم ما كانش حلو بس لما لبستيه بقي جمييييل
شهود : عيونك اللى جميلة ..
مالك : مش يلا طيب
شهود : يلا
________________________
في ألمانيا
كان مارتن يجلس على الكرسى في شقته ويضع رجليه على الطاولة أمامه يفكر بغموض حتى جاءه اتصال فرد قائلا : ماذا لديك
ثم جاءه الرد فقال : اممم... حسنا ضعها نصب عينيك وأخبرني بكل جديد .. ثم أغلق الهاتف وقال محدثا نفسه : لن أدعك فريسة لها توماس أنت صديقي الأول والأخير .. كيف لي أن أراك لقمة سهلة لغيرك واتركك
_______________________________
في القاعة
دخل يزَن وخلفه والدته وأختيه فوجدوا العريسان يهمّان للوقوف من أجل أن يرقصوا فقال يزَن : اى ده معقولة آية تعمل كده .. ما توقعتش أبدا
حياء : ولا أنا
جوري : سيبكم منها توقعي أي حاجة من قرايبنا
ماجدة : خلاص يا ولاد .. تعالو نقعد على أي ترابيزة لغاية ما يخلصوا ونسلم عليها ونمشى
يزَن : ماشي .. تعالوا هناك
وذهبوا إلى طاولة بعيدة قليلا عن تجمعات الناس
كان الثلاثة منزعجين بعض الشئ فهم لا يحبون تلك الأجواء الموسيقى والأغاني الشعبية المحرمة فقد قال الله تعالى " ومن الناس من يشتري لهو الحديث ليضل عن سبيل الله بغير علم ويتخدها هزوا أولئك لهم عذاب أليم " وقال الرسول صلى الله عليه وسلم " سيأتي من بعدي قوم يستحلون الحر والحرير والخمر والمعازف" ، بالإضافة إلى صوت قهقهات النساء أمام الرجال الأجانب فلا يحل لهن أن يفعلن ذلك فقد قال الله تعالى " ولا تخضعن بالقول فيطمع الذي في قلبه مرض وقلن قولا معروفا "
جوري : اي القرف ده مش عارفه هستحمل الكام دقيقة دول ازاى
حياء : معلش استغفري ربنا وانتي قاعدة وما تركزيش معاهم
ما أن أنهت حياء جملتها حتى وجدت خالتها بجوارهم فقالت أمينة : يا مراحب الفرح نور بيكم
ماجدة : بنورك
أمينة : ازيك يا يزَن كبرت أهو وبقيت راجل ومالي هدومك
يزَن بابتسامة ضيق : الحمد لله
جوري بانفعال بعض الشئ : يزَن طول عمره راجل
يا ... يا خالتي
ماجدة وهي تسكت جوري : خلاص يا جوري خالتك ما تقصدش
أمينة : طول عمرك كده لسانك طويل وما اتغيرتيش
لم تعرها جوري اى انتباه أو ردة فعل
أمينة : ازيك يا حياء يا بنتي عاملة اى
حياء : الحمد لله
أمينة : أيوة صح محمود بيسلم عليكي وموصيني أوصلك سلامه أول ما اشوفك
نظروا إليها نظرة استغراب فقالت حياء بضيق : الله يسلمك
أمينة بغمزة : ده معندوش سيرة غيرك طول الوقت حياء بنت خالتي حياء بنت خالتي
هزت حياء رأسها مع ابتسامة تكاد تخرج بصعوبة
أمينة : بقولك اي يا ماجدة كنت عاوزاكي في موضوع كده
ماجدة : اتفضلى
أمينة : لا تعالي على جنب لوحدنا
ماجدة بتعجب : حاضر
___________________________
مالك : وصلنا أهو يا ست شوشو... مش هى دى القاعة برضو
شهود : أيوة هي
مالك : ماشى يلا ندخل
شهود : مالك
مالك : نعم
شهود : مش عاوزة ادخل
مالك بتفهم : حبيبتي ما تخافيش أنا معاكى
شهود : اكيد
مالك : اى هو انا عيل صغير هسيبك واجري
شهود بضحك : لا بس ما تسيبنيش لوحدى
مالك : طبعا .. يلا انزلى
دخل الاثنان إلى القاعة فنظر مالك بدهشة قائلا : اى ده مش دى صاحبتك الملتزمة على ما اعتقد ازاى ترقص كده قدام الناس
شهود : أنا مش مصدقة برضو
مالك : استغفر الله العظيم هو الالتزام بقى موضة ولا في مكان ومكان لا
شهود : ربنا يهديها .. هى مش حاجة كويسة خالص أن الناس تبقى واخدة فكرة عن الشخص أنه كويس وملتزم ويفاجئهم يوم فرحه
مالك : ربنا يهدى ... تعالى نقعد في مكان لغاية ما يخلصوا رقص علشان تسلمى عليها ونمشى
شهود : ماشى
مالك وهو ينظر حوله وجد صديقه يزَن فقال : اي ده يزَن هناك تعالى
شهود : اى ده هو انا هقعد مع صاحبك
مالك : غبى أنا للدرجة أخواته قاعدين أهم اقعدي معاهم وانا هقعد معاه
شهود : ماشى
________________________
أمينة : ها قولتي إي
ماجدة : قولت لا اله الا الله
أمينة : محمد رسول الله.. برضو رأيك ايه
ماجدة : قولت ولادى اهم عندى
أمينة : قصدك اي يا ماجدة
ماجدة : قصدي ولا مش قصدى المهم انى مش موافقة
أمينة : مش موافقة لي ده الواد طول بعرض ووظيفة وألف بنت تتمناه وساب بنات الدنيا واختار بنتك
ماجدة : بس بنتي مش من الألف
أمينة : قولي كمان مش هتخطبي يزَن لمروة
ماجدة : والله ولادي براحتهم مش هجبرهم على حاجة دى حياتهم وهما أحرار فيها
أمينة : لينا كلام تانى
ماجدة : لا تانى ولا تالت .. اللى عندى قولته
أمينة : فكرى ومش هتندمي
ماجدة : مش وقته يا أمينة أنا جاية احضر الفرح مش علشان نتكلم في حاجات زى كده
وتركتها وذهبت إلى حيث أولادها
___________________________
يا ترى إي الماضي اللى مخوف شهود كده ؟
واي السبب في الشرخ اللى حاصل بين حياء واخواتها وبين خالتها ؟
هنعرف في الفصول القادمة بإذن الله ♥️♥️
رأيكم يهمني 🌸♥️
_________
أنت تقرأ
غيرتني أنثي عربية بقلمي " ولاء يونس " مكتملة
Genel Kurguبطلة قصتنا هى القمر الذي يضئ عتمة البطل، هى من ستهديه للصواب، عصيتَ ربك كثيراً من قبل، لكن جئت أنا لأكون سببًا في توبتك، وأيضاً ستوضح لك أمورا كثيرة في دينك، كيف يعيش الملتزمين، كيف أن حياتهم جنة في طاعة الله، أتمنى أن تخرجوا منها بكم كبير من الاستف...
