بقلمي : Jawhara
*******
حسيت راح اختنك واني الف موقف والف مصيبة تفتر بدماغي إلى أن انفتح الباب دفعته ودخلت وعيني راحت على رهف حتى ماشفت الفتحلي الباب صارت كبالي على بعد خطوات حجابها بيدها وشعرها مفتوح وحالتها مريبة فكيت عيني وعطت بيها وجريتها بقوة من زندها ..شصخمتي ولج
احجي حقيرة كمت اضرب بيها على راسها ومتونها واني فاقدة والدنيا كلها طلعت من عيني وهي كامت تبجي ولاتحرك ايد حتى تحمي نفسها من ضرباتي
ما حس الا انجرت ايدي ودفعني عنها وخلاها بظهره
هناك وانتبه عالولد طويل اسمراني شكله حلو وعنده لحية خفيفة رفع إصبعه بوجهي ..كااافي مو من حقج تضربينها
هي بهي اني بيا حال وكاعد يتفلسف براسي
_ انجب ادبسز سافل والله اليوم اخليهم يشحطونك الا اخليك تخيس بالسجن بس تعرف تضحك على عقول البنات وتقشمرهن
تفووو عليك ياساقط
تفلت عليه جان يصير عصبي وعيونه وكفن بالحق تقرب شال أيده يريد يضربني عاطت رهف ..لااا صقر لااا
نزل أيده ..والحسين لوما مرة لا اخليج تزوعين العافية بس لخاطر رهف
فكيت عيني ممتوقعه ولا مصدكة يعني نفسه صقر الي تقدملها وماقبلت اني لو غيره ..
زمخت بي بحرقة ..تبرأ منك الحسين ومن سفالتك يا كلب مقشمرها للبنية وتبيع مثاليات براسي
وانتي ادبسز احجي هو نفسه اخوها لسرى
بجت رهف وهزتلي راسها تقربت عليها جربتها من شعرها وكزيت سنوني ..ولج حقيرة تستغفليني وطلع كل البلاوي عندج
رفعت راسها تبجي وتتوسل ..اااي عمة اذيتيني فدوه عوفيني
فكيت عيني من شفت رقبتها معضوضة ومطكعه حمرا ماتحملت كلت هاي هي لعد الفاس وكع بالراس وتصخمنا ضربتها سطره فريت وجها فر
دفعتها ..البسي حجابج كلبة لو عاجبج الفضايح
صقر صافن عليها حقها من تحجي هسة يلة حس بكبر مصيبته بس هو يحبها ومراح يتخلى عنها
انقهر على رهف وهو يشوف خوفها وبجيها وعلى اعصابه من شافها ضربتها
مسح وجهه ..اسمعي ترى البالج مو صح اني مماخذ شرفها هي زوجتي بعقد سيد
شهكت سارة وبقت عينها مفتوحة على صقر
الي حاول يوضحلها
_والله العظيم كلامي صحيح ونسخة منه موجودة عد رهف تزوجنا قبل أسابيع
متحملت كلامه كعدت عالقنفه وغطت وجها بيديها تريد تستوعب المصائب الجاي تنزل على راسها
ياربي والله مو حمل هالمصايب سنين واني بالهم والغم والحزن
بلعت ريك وبداخلها استغفرت ربها لازم تلكى حل لهذه المصيبة قبل محد يعرف وينفضحن واذا وصلت السالفة لعمامي شلون بالقرٱن يذبحونها واني يذلوني ذل
رفعت راسها ..اسمع لك اطلكها وغصبا عليك
نتر بيها ..تحلمين اعوف رهف والحسين على كطع ركبتي ماعوفها
وكفت واشرتله بيدها ..لو عندك ذرة غيرة على عرضك مجان هيج سويت تقبل اختك تتزوج هالشكل اكيد لا إن شاء الله تطلع حوبتنا بيك وبأهلك
عاطت برهف ..امشي ولج شتنتظرين حيوانة
راحت سحبتها من أيدها وطلعن وهو وراهن سد الباب ولحكهن يعدل بملابسه
نظرات رهف ودموعها ذبحنا ذبح حيل خايف عليها لاتروح عمتها تأذيها
نزلو جوا وصقر وراهن حمد الله العمارة جديدة بس هو اجر شقة والجوا محلات تجارية جان كلها طلعت تتفرج على صوتهم العالي
بمدخل البناية شافهن رجعن سريع وكفن بصف الباب الجبير التفتت سارة واشرتلة
وصوتها ولهجتها تغيرت عن اول ..صقر سوي هالحسنة واطلع قبلنا ولا تلتفت وراك يعني عالسريع اطلع
_شكو غير افهم غايتج
كزت سنونها وبصوت ناصي ..عزا العزاك إذا متسوي الكلت عليه راح ننذبح اباب العمارة ابن عمي لمحته بالمحل مقابيلنا
عض شفته بقهر يعني المصائب دفعة وحدة نزلت اول شي هي وانوب كرايبها
_ياهو منهم
_انت وين تعرفه يلة بسرعه تصرف
حجت رهف تريد تفهمه من شافته ممقتنع ..صقر حباب بسرعة لأن هذا عمو حارث ميتفاهم
هو ميعرفه بس يسمع من ولد عمام أبوه بيت ابو فهد خالهم اسمه حارث لا يا الله بس لاهو
طمنها لرهف وعينه عليها . .
_صار رايح اني بس أمانة لا تاذين رهف
عينه على رهف يخاف عليها تتأذى وهووالسبب
_صقر جنطتي موبايلي بقن بالشقة
طلع مفتاح ..هاج المفتاح يلة اني رايح ديري بالج على روحج لاتبقين تبجين
سارة تطحن بروحها من سمعته الناس وين وهو وين
طلعت رهف فوك وسارة انتظرتها بس شنو راسها صار طبل يمكن ضغطها علك
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
