بقلمي : Jawhara
******
شكد جنت عصبي وناوي احاسبها لأن ما نطتني خبر بطلعتها وطول فترة التحاقي ماكلفت خاطرها واتصلت اني من اتصل اسال امي عليها بطريقة غير مباشرة وامي تحجيهن كلهن
ومن شفت حالتها ودموعها والانكسار المسيطر عليها جريت حسرة وذبيتها وسحبتها بحظني
انوب فقدت من البجي الي جان بهستريا والله خفت عليها كولش
_اششش اهدي أبوية انتي ليش هيج يمعودة موتي روحج
دنكت بست راسها وايديه محاوطتها
من شفته عصبي ويحجي علية اني انهاربت لأن وصلت مرحلة ما اكدر اتحمل أي ملامة
من اول ما طلع بوجهي اباب الحوش بقيت عيني عليه لأن مشتاقتله ومحتاجه وجوده محتاجته يسندني اووف عالوكت جنت ما حاسه بالحاجه لاحد رغم فقدي لابويه واخوية بس من ماتت ماما انطفى شعوري بالامان وأحس روحي وحيده وغريبة بيت عمو ممقصرين كلهم يتفدوني ويردون خاطري بس اوووف من احساسي هذا اووف صفيت غريبة من بعد عينج ييمة
من بجيت بحظنه ولمست حنية ذراعه وحظنه شوي هدأت ابتعدت عنه وعدلت كعدتي استحيت من العالم يشوفنا بعدين تذكرت سيارته جامهه مظلل
اخذت كلينس مسحت دموعي وخشمي واني اجر النفس كوة
شغل سيارته وطلع بيها
انتجيت براسي عالمقعد وغمضت لأن راسي وجعني من العياط والبجي
مافتح وياي موضوع روحتي للسوك وحدي احتمال ضامها بعدين يطلعها
وصلنا البيت اني غفيت ولا ادري بروحي صحيت على دغتة بجتفي وصوته .. يلة وصلنا
_هااا اييي هسة
فزيت لأن جنت غافية وبغير عالم
نزلت اسحل بروحي من شافتني عمة سهيلة هاي حالتي كمزت من الكرسي مخليته بالكراج علمود الشمس مرات تكعد واحنا وياها
يمكن عبالها حارث ضاربني أو هيج شي لان التفتت على حارث الي تقرب يسلم عليها
حظنها وباس خدها وجر أيدها يبوسها اووف منظرهم زرف كلبي الله يحفظهم
تذكرت اهلي يربي شكد صايرة حساسة
_ييممه ليش هيج سويت بيها احنا ندري بيها طالعه السوك لو الدوام يجوز نست تخابرك يجوز ماكو شبكه
_يممه رحمه لابوج عوفي السالفة هاي بعدين منو كالج ضاربها هياتها كدامج اسأليها
وراح تعرفين السبب يلة اروح اسبح واصلي وانام لحد يكعدني لو تنكلب الدنيا
عفتهن وصعدت اسمعها تسأل سارة وكالتلها عالسايق
كعدت يمهم بالمطبخ وحجيتلهم عالصار عمتي تخبلت .. شلون هيج تتصرفين بنيتي والله حقه يصير عصبي عليج
دشوفي وجهج شلونه حتى عيونج مورمة
دكومي يمه اسبحي ارتاحي حتى تتغدين
والغراض صعدتهن سحر لغرفتكم فوك
التفتت وشكرت سحر وطلعت لغرفتي ميته تعب
دخلت شفته نايم طلعت الملابس من العلاليك وعلكتهن وغراض سحر وعمة خليتهم بعلاليكهم رحت اخذت دشداشة اسود. ومنشفه وفتت للحمام
بدلته العسكري معلكه بالحمام رأسا خليتهم بالغساله ورا غسلهم خليتهم تنشيف وطلعتهم شريتهم عالمحجر الدرج
سبحت وطلعت بالغرفة حارث بعده نايم ما فتحت المجفف لأن يتضايق من صوته نشفته بعدها جبت منشفه ناشفه ولميت شعري بيها
تعطرت ورطبت ايدية ورجلية اخذت سجادتي والحجاب اصلي الظهر والعصر
سبحت بأصابيعي كمت رحت يمه شلت اللحاف وانحشكت بصفه اريد انام
من اول ما صعدت حس علية رأسا مد ذراعه سحبني بحظنه وقفل علية
شفايفه خلاهم براسي يبوس بي .. نعيما يروحي
سكتت متفاجئة بأسلوبه وحنانه ماحسيت بروحي من غفيت بحظنه
للعصر يلة كعدت شفته بخدي يبوس بي
بعدت راسي وكوة فتحت النوم بعيني
ابتسم تك خد ورفع حاجبه .. خليني اشبع ترى ماينشبع منه شلون ريان كرص خدي بخفه انكلبت عالجهة الثانية احس بخدر مابية اكوم
حظني من ورا وعصرني بحظنه ودفن راسه برقبتي .. يبوس بيه بلهفة واضحه اني منطيت أي ردة فعل من شافني هيج ومبين علية خدرانه كلبني وصار فوكايه بقى يبوس بية لثم شفتي برقه ورجع جرها بسنونه اني دفاعاتي انهارت بادلته بس مو مثل طاقته ولا واهسة جنت تعبانه بس ما حبيت امنعه مني سلمته نفسي وو. . . . . . . .
********
ورى صلاة العصر نزلنا بعدما سبحنا وصلينا جنت ميته جوع رحت بوجهي للمطبخ حتى احضرلنه الغدا حارث راح يسلم عليهم كاعدين بالهول
سويت صينيه رتبتها اريد اخذها للهول دخل للمطبخ والفروة لافها على جسمه وهو طويل طالع يجنن بيها
كعد عالميز .. يابة غداج ميت جوع كملتي بعدج
بصوت ناصي رديتله .. أن شاء الله
كعدنا نتغدى وحدنا ومبين نفسيته مرتاحه من خلال اكله
كملت كمت اريد احمي الجاي لأن مبين مخدرينه الظهر الفوري بعده دافي
صاح وراي .. وين كملي اكلج
التفتت مبتسمه بهدوء .. الحمدلله شبعت
_عافيات يابه
_الله يعافيك
من كام يغسل لميت المواعين وغسلتهم ومسحت الميز ورجعت المزهرية عليه
صبيتله بكوب واني هم ورحت الهول كاعدين سلمت عليهم وكعدت بصف عمتي تقربت شاورتني .. شلونج يمه
_الحمدلله عمة
_عفية بنيتي يستاهل الحمد
ادحك على حارث لاف روحه بالفروة وكوب الجاي بيده انتبه علية ادحك عليه نزلت عيني سويت روحي جاي اشرب بالكوب
الحلو بحارث ما يحجي بسوالفنا حتى من تصير سالفة لو مشكله ما يعجبه يكبر بالموضوع أشوفه يتفرج يراقب وراها ينطي رأيه
شو اشتهيت اروح بحظنه ويلفني بفروته والله حبيت هالاحساس هذا مدري شطحة خيالي رفعت تك حاجب وخزرته من صارت عيني بعينه بس هالمرة تعمدت ما أنزل عيني هو تفاجأ ليش اخزره غمزلي بحاجبه والله اجتني ضحكه لأن منظره من يركص حاجبه غير شكل متعودة على هيبته وعكدة حاجبه
بقينا بس اني وياه بالهول لان بيت قتيبة معزومين يم اهلها اخذو جهالهم وراحو وعمو راح بسيارته هو وعمة سهيلة لبيت فرح
كال لحارث تعالو ويانة ماقبل من طلعو فتح فروته واشرلي اني بدون اي ممانعه ولا اعتراض رحت اندحست بحظنه ولفيت ايديه على خصره جان لابس دشداشة شتويه لون دارسيني
حاوطني بيها الله شكد دافية وشكد حلو حظنه خليت راسي على صدرة
_ حلوة عليج جانت وباقي عطرج بيها
رفعت راسي واني مفهية على كلامه دنك خمط شفايفي وطول من ابتعد جر نفس بقوة اني فصلت لأن حبيت هالاحساس وحبيت اعيش هاللحظات الحلوة
*********
_يا مرة ليش تشحطين الكارتونة صبحي واحد من ولدج
تعااال عقيل
_كول يابه
_ليش امكم تخلونها تشيل غراض ثكيله ديلة شيل كارتون المعجون وارجع عالكارتونه الثانية
شالها عقيل وداعا للمخزن ورى البيت ورجع أخذ كارتونة الزيت
دخلت للبيت وحازم وراية ..
_اكو ام فهود شمسويه غدا
_خيرات من الله روح صلي لما احضره
كعدنا نتغدى اني مالي نفس خفت اكل اذب من راسي مثل قبل كم يوم من جاب سمج اكلت لكمة لو تورطت لعبان نفس صار عندي
الا ذبيت من راسي يلة ارتاحيت
اليوم جنت مسويتلهم كبه حامض كلهم يحبوها
ورى الغدا اندك الجرس اني جنت اغسل باكواب الجاي حتى اروح امدد طلع حسوني فتح الباب اجى يركض صاح أبوه
_شكو خير ليش ساكت
مارد علية شويه واسمع صوته دخلو الهول
عرفت ابو تحرير هذا بس شعجب جاي هذا مكضيها معارض ومحلات أسواق عنده ومرات يطكطك بالسيارات يبيع ويشتري احتمال يريد يبيع سيارة لحازم
رحت نمت وبعدني ما غافية اجى عباس يركض وراه وائل فزيت وأيدي على بطني
_يممه اسم الله شكو
نط عباس بحجاية خلتني فاتحه حلكي وصافنه عليهم
_فهد راح يتزوج تحرير
*******
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
