#بقلمي : Jawhara
******
ماما من كالت راح يتكاتلون الزلم اني شعور ماظل عندي خفت على حارث راح وحدة عليهم وبنص منطقتهم اكيد مراح يرحمونه إذا تعرضلهم انعادت ذكرى حادثة بابا وهشام الله يرحمهم اختاريت اهدىء ماما لو اهدىء روحي .. ماما تعاي هنا اكعدي فدوة لايروح ضغطج يرتفع اكيد هسة ارتفع
رحت اجيب جهاز الضغط لكيت ماما واكعه عالقنفه خفت لا تضربها جلطة لأن قبل هم صارت هيج عدلت وضعيتها ونيمتها عالقنفه قست ضغطها مفول همزين عندي ليمون عصرته عالسريع بكلاص كعدتها وشربت شويه ماقبلت
رجعت انسدحت وايدها على رأسها عفتها وطلعت بالطرمة الوب ياربي شسوي خليت أيدي على خدي وجعني ولا حاسة بضربة حارث اصلا ماجاي افكر بس بالراح يصير يارب سترك يارب حايرة اخابر بيت عمو عبدالرحمن قابل شأحجيلهم شفايفي انمردن من التعضعض حتى حسيت طعم دم بيهن رجعت للمطبخ اعاين على ماما على نومتها وايدها على رأسها زين اني ليش ما ارجع اتصل على هالة
دخلت للبيت اخذت موبايلي اتصل اول شي على حارث يرن وميفتح خط سديته اكيد بعده بالطريق دحكت بالساعه دقائق وتصير تلاثة العصر اتصلت بأم فهد فتحته عالسريع
_ سارة شكو ترى كولشي مفتهمت منج وجاي ادك على حازم مشغول
_فدوة هالة ارجعي اتصلي عليه زين هو وين _مو بعيد بالمنطقه راح على جماعه يقرون فاتحه
_زين الولد وين
_طالعين والله ومرات أبيت ابو صكر ولج سارة فهميني شبيج
_عيوني شافهمج مو مال تليفون دخيلج حارث جاي على صكير يريد يقتله
شهكت هالة .. يمه دخيل الله ولج شنو الصار
بلعت ريك واني ما اكدر احجيلها
_ راح أسده اتصلي على حازم لازم يكون عنده خبر
سديته منها وكعدت عالجرباية الوب وكل وساويس العالم انجمعت براسي
*******
السيارة شخطتها من البيت بكل سرعة اسوق اريد اوصل عقل ماظل براسي من وصلتني رسالة وانوب اسمع سارة تحجي اااخ اااخ
كل هذا يصير واحنا مندري بي شلون دبرنها شلون صارت ضحكو علينا واحنا غافلين كل هذا يطلع من رهف والله جنت مغشوش بيها واكول فاهية وكولشي متعرف طلعت بلوة هي وهذا الكلب الي تزوجته بس والله ولا اخلي يتهنى مو احنا الي ينضحك عليهم يا باطل
السيارة كل سرعتها امشي بيها وما اخفف بس يم نقط السيطرات
بس شنو لو هسة الزمهم اشرب من دمهم اثنينهم
وصلت للمنطقة دخلت بشارعهم الادري بي قريبين على بيت ابو فهد بس البيت بالضبط ما متأكد منه
الله جابه لمحت عقيل ابن اختي هالة طلع من بيت وياه صقر وشباب اثنين وياهم شخطت السيارة طبكتها قريب عليهم ردت ادعمهم الا شوية عقيل من شافني ضحك وتقرب علية
ما اهتميت نزلت عالسريع وعفت الباب مفتوح ومسدسي بحزامي وشياطين جهنم تتطافر جدامي
دفعت عقيل بيدي اريد الوح هالكلب هذا هو من شافني عصبي فك عينه وبقى صافن جريته من بلوزته جان لابس بلوزة سودة وضربته راشدي هو رأسا دفعني بقوة ورفع أيده يريد يضربني التمو عليه وعقيل وياهم عاط .. خاااالي صدك جذب شلون تضربه
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
