#بقلمي : Jawhara
********
وصلني اشعار عالمازنجر كاتبلي شتسوين
مارديت بقيت اكلب بالفيس بس أفكاري يمه
اني مشاعري واحساسي ناحية حارث متأكدة منها ومتأكدة من حبي بس الجاي امر بي يخليني اكتم هالحب رغم اني اعترفتله مرة بهالشي
قسوته علية حتى بعد ما عرف وحجيتله كولشي وجنت مضطرة على هالشي مارحمني
وجنت منطيته عذر وكلت حقه لأن اني من عرفت تصرفت نفس طريقته وعاملت رهف بقسوة وضربتها
والخاتمة لهذي المصايب وفاة ماما صح هي مريضه بس مو حمل صدمات وهو يعرف هالشي وبعصبيته وتهوره فقدتها
ما ذبيت اللوم عليه ولا لحظه لأن ماما سبب انتكاستها وزيادة مرضها رهف وجانت تدعي القوة وما مهتمة لخاطري اااه الله يرحمج ماما
رجع رسل ليش ماتردين
ابتسمت بكآبة لأن مالي خلك يعني كاتب شعر اليقرا راح يفكر حارث يدور رضاي وتعمد يحط هالصورة لأن عرفني لابسة فروته
شنو قصده الا يريد يفهمني عجبه هالشي
قفلت الموبايل ونمت واني متأكدة راح يضوج
من سمعت لابسة فروتي حبيت أشوفها وطلبت من قتيبة يصورها مقطع ويرسله
بقيت طول الوكت اتفرج عليها حاضنتها وكاعدة بلحظتها اشتاكيتلها حيل
بالليل ماعندي شي وكت استراحتي نزلت بالفيس شعر وبروفايل حسيته يمثلني وكلت اكيد راح تكلب بالصفحه شفتها فاتحه ظاهر عندي نشط دزيتلها رساله ماردت ورجعت مرة ثانية اخر شي طلعت وسدته حيل ضوجني هالشي شنو قصدها بهالتصرف ليش تتعامل وياي بكل هالبرود معقولة وفاة أمها السبب واحتمال محملتني مسؤلية وفاتها جريت حسرة وذبيتها فكرت اتصل عليها لغيت الفكرة اعرفها من تعاند تتعمد وتتقمص فن التجاهل
مددت عالفراش وافكر بيها بين الغافي والنايم فزيت على دكات باب غرفتي ذبيت رجلية بالكاع اريد اكوم احاول اركز نكتت راسي وكمت فتحت الباب واحد من المنتسبين اعرفه خوش ولد حجى وياي بشغلة وطلع
اني رجعت اريد انام وشويه واسمع صياح عكدت حاجبي لك شنو السالفة لبست بدلتي عالسريع وطكيت حذائي والسلاح بخصري وطلعت تلفتت وأشوف مجموعه من الجنود خربانين ضحك ويأشرولي على واحد من الضباط يطوطح ومسدسه بيده رافعه فوك وضرب طلقه ويصيح هياتهم اهجمو عليهم شفت تلاثة يركضون ويرجع يلتفت عالجنود وياشرلهم مابيكم خير كلكم سجن جبناء
تقربت يمهم وزمخت بيهم .. خيركم
من شافوني وكفو استعداد تقربت على اول واحد ابقى انت والبقية انصراف
رحت على الضابط جان دايخ ميدري وين الله حاطه سحبته من أيده وكبل للحمامات بهالبرد خليت راسة جوا الحنفية هو عاط لأن ألمي بارد
اخذته لغرفتي بس بعده ما مركز شمرت حاولي عليه .. أخذ نشف شعرك خلاه على راسه ورفع رجليه مدد عالقنفه
عفته وطلعت عالجندي الي جان مستعد بوكفته خزرته وبقيت صافن بوجهه هو نزل عينه بس راسه رافعه
_من الاخير شنطيتو للضابط حتى هيج يهلوس
_سيدي هو طبعه هذا احنا شعلينه
_اني مسؤل عالفصيل واعرفكم لا تخليني اعاقبك هالشي عقوبته جبيرة حتى ملازم اول رافد راح يتعاقب لاتخليني افتح تحقيق
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
