هنّ أضعف خلق الله أركانا

الفصل السابع عشر

بقلمي : Jawhara

********

بارت حزين . .

دفعت الباب ودخلت البيت صنطه تلكتني سارة وجها مخطوف لونه تريد تحجي توها جريتها من زندها وعصرته بقوة  ودخلتها وياي اسحب بيها وعلى غرفتنا لأن عمتي مددة عالقنفه ومتغطاية يمكن نايمة انتبهت على سارة  ما اطلع صوت تخاف امها تفز 
شمرتها بالغرفة وطبكت الباب  اعصابي مفولة حلفت انهيها اليوم  عالشي الصار
من شافتني تقربت عليها حجت بصوت ناصي .. فدووة حارث والله ظل بالي عليك خفت يأذونك
جريتها من شعرها واجت بيدي دنكت عليها .. ادبسزز شلون دبرتيها وزوجتي رهف بهاي السرعة شلون ترحين على حازم وتحجيله وتردينه يحلها 
ضربتها على حلكها راسا شفتها الفوك أدمت هي عاطت وخرمشت أيدي تريد تبعدني 
كضيت وجها بين جفوفي وعصرته هي كامت تون متوجعه عطت بيها ولج شسويلج هسة اشرب دمج وقليل كلبة دفعتها وكعت بالكاع كامت تبجي وايدها على حلكها
أيدي على راسي واعاين عليها تبجي بس ما اهتميت نار جواية واريد ابردها

اول ما دخل تلكيته جنت خايفة عليه والله كلت راح يأذونه لأن وحده  نسيت روحي ونسيت راح يطلعها السالفة بية شمرني بالغرفة وكاعد يحاسبني مد أيده وضربني على حلكي شاغت روحي وشفتي تدمت خفت ابجي بصوت لا ماما تفز وهي كوة غفت
رغم كاتمه صوتي بيدي بس ما تحملت شهكاتي وعبرتي شكت صدري رفعت راسي ادحك عليه عيونه حمرا ودمارات ركبته نافرة اتجيت على أيدي وكمت عدلت شعري لميته كبوبة ومسحت دموعي ادحك أيدي انملت دم  اخذت كلينس مسحت أيدي وشفتي أحسها ورمت بلعت ريك وأحس بلعت دم وياه صفنت على روحي هذا مو طبعي انخذل وابقى ساكته اني ماسويت شي خطأ اصحي سارة اصحي لا تخلين أحد يتحكم بيج ويهينج مو انتي التقبلين بالمذلة
جريت حصرة وذبيتها بحركة لأن عبرتي كاتمه على صدري رفعت اصبعي بوجه حارث .. انت شنو تحاول بضربك الي شتريد بالضبط ها احجي أحد داسلك على طرف انت ربيت وكبرت وسهرت ليالي ولوعة فراك الأهل دمرت شكو شي حلو بروحك حتى لا تجي تحاسبني وتمد ايدك علية

أشرت باصبعي عليه ورجعت ودكيته بصدري  الجان بارز من  دلعة دشداشتي كل هذا اني مريت بي اني العانيت وشبعت قهر وحزن ولوعة وفراك صرت اب واخت وام بهذا البيت امي غدت تراب بعد أبوية واخوية والمرض هلكها واني صرت سندها اني ادعي القوة حتى لا تنقهر ماما  وحتى رهف لا تحس بالنقص والحاجة 

نتر بية .. انجبي لا تبررين هذا ما يشفعلج  عندي

من لمست نبرته وسخريته زمخت بي بصوت مليان عصبية وغضب .. كاااافي كاااافي  انت شنو عبالك جاي اقنعك حتى تسامحني مو سارة التتوسل شتريد مني شلون اتصرف واني عرفت بالصدفه البنية متزوجه هددته يطلكها ماقبل خفت خفت منكم انتم عمامي خفت من كلام الناس الراح يطلع بحقنا واحنا عائله مستورة خفت لا ننفضح واسم بابا وهشام ينداسون ماجان كدامي  حل الا ابو فهد والرجال ماقصر وحلف مايحجي والدليل حتى هالة ما تعرف
تقرب تلني من جتفي حيل وزمخ بية .. غبية
تصرفج غبي شلون تعوفين عمامج وترحين تنتخين بالغريب اي اي ابو فهد لو حتى جان نسيبنا بس بهيج سوالف العمام اقرب