الكاتبة Jawhara
★★★★★★
طلعت من غرفتي اريد احجي ويه رهف لأن صار يومين مملتقية بيها تخاف تهوب صوبي وامي ساكته منها بعدما حجت لأن كتلها عوفي السالفة علية انتي تعبانه ومريضة ....اني ماريد ماما تدخل حتى خالو خاف تكبر السالفة
صحت رهف رأسا اجت عليه جانت كاعده بغرفة ماما حجيت وياها بثكل ..وين بيبي
ردت بصوت ضعيف ..نايمه
_تعاي بالمطبخ
لحكتني كعدنا عالقنفه جان وكت ظهريه وبدايه شهر ال ١١ الجو حلو بي برودة
_هسة اريدج تحجيلي شلون عرفج وشلون كدر يضحك على هالراس هذا
دغيتها باصبعي برأسها
حجتلي شلون تعرف عليها من خلال أخته سرى وصار اشهر من الكورس الثاني يعني العام
والله خوش واحنا نايمين على اذاناتنا ألمي مسورب جوانا وما اعرف هاي واني وياها بالكلية ومأمنة بيها لا وفرحانه ماعدها علاقات ولا تتقرب للطلاب اثاريها نائمه بالعسل
_جم مرة ملتقيه بي برا الكليه
رمشت بعيونها اعرفها تخاف تحجي بس حاولت اسيطر على عصبيتي حتى تسولفلي
سكتت وعفتها تحجي .. كل اسبوع أشوفه مرة
بلعت ريك ومصيت شفايفي وسالتها ..وين تتقابلون
ردت بخوف وهي تفرك بأصابيعها ..مرات نروح نادي الفروسية لو مطعم
وشلون قنعج واتزوجتو
رهف اصفرت واني هزيت راسي..كملي حتى افهم
_صقر يحبني واني ااني . . .
_تحبيه مو ليش بنظرج اي وحده تحب تروح تتزوج متعه بدون علم اهلها هااا هو هذا عقلج
بجت تشاهك ..لاتكولين متعه صقر ميعوفني
_لا يعوفج اني أريده يعوفج
شوكت تزوجتو
مسحت دموعها ..قبل اسبوعين رحنا لبيت سيد يعرفه وعقدلنا
صفنت عليها شكد احاول استوعب هالبراءة والجمال هذا يطلع هيج منها مجاي اصدك
_كومي روحي لغرفتج ولا تنزلين الا اصيحج يلة
خابرت ابو ايمن يجيني رحت تحظرت لبست جبة عندي ورتبت الشال وتكرمون لبست شحاطه فلات وشلت جنطتي وقفلت الباب وطلعت ابو ايمن برا سلمت وصعدت ورا ..اطلع للمعارض عيني ابو ايمن
_خير إن شاء الله ست تشترين تخم قنفات
_لا قصدي معارض السيارات الموجودة ب....
انطيته العنوان بس ما اعرف اي معرض
سكت ابو ايمن ماحجى اني هم مالي خلك ارد على كلامه وصلنا وخليته يسأل عن معرض ابو فهد حازم زوجها لهالة بنت عمو عبد الرحمن طلعو يعرفونه ودلونه عليه ماشاء الله معرض جبير وسياراته احدث موديل
نزلت وطلبت من ابو ايمن يروح يسترزق بسيارته واني اتصل عليه من اكمل شغلتي لأن ماريده يشك وهو من النوع يحب يسأل
تشجعت ودخلت وكفت يم باب جبيرة جانت مفتوحه على ساحه بيها سيارات
داخلي خايفه وخجلانه من الراح احجي بس ماعندي حل ثاني لازم اقوي نفسي حتى اتخطى هاي المشكلة
شباب داخلين طابين واني خجلت فصحت عامل جان ينظف سيارة اجى خطية من اشرتله وكتله ينطي خبر لابو فهد أريده بشغله
ماكو دقيقتين واجى يتمشى علية اني صار سنين ماشايفته يمكن قبل ثمان سنوات إذا مو اكثر من فاتحة بابا وهشام الله يرحمهم
رجال هيبة وفخامه لابس زي عربي دشداشة رمادي والشماغ احمر والعكال ابو فهد طويل وجسمه شوي مليان شايله بطولة من شفته تخربطت اعداداتي انوب عاكد الحاجب صدوك لحظتها خفت وحسيت شوية ندم لأن اندفعت وتهورت واجيت عليه
أنت تقرأ
هنّ أضعف خلق الله أركانا
Romansaرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
