#بقلمي: Jawhara
هاي الأرض ما توسع حنيني
يا همي وعذابي وحركت الروح
كضيت ويا الحزن أجمل سنيني
هم عود إني أشوفك وأكعد وياك
وك أبوس تراب جدمك من تجيني
**********
_تعاي اكعدي لا تبقين تفترين
_يمه بس اخلي الفاصوليا عالنار اليوم وائل مشتهيها عالغدا
_اي ذبي وياها قطعتين لحم طيبة تصير
_اي خليت ادري بيهم يحبون اللحم
_لا تفترين بالغرف كتلهم ترتبون غرفكم يلة تطلعون
كعدت عالكرسي كبالها والميز بيناتنا وامي سبحتها بيدها تسبح
_يمة والله خطية خفي شوية عليهم هم يستحون منج ويشتغلون صح اني دوم اطلب يساعدوني بس بشغلات بسيطه
_لا خلهم صلوات كومة ولد وين تلحكين وابوهم يرادله وحدة فوك راسه
_الله كريم مابقى شي من ادخل شهري كالت عادي الحركة زينة الج
_بعد شكد اسم الله
_شهرين وايام
_الله يسهل أن شاء الله اكلج خل دكتورتج تعكدلج احسن هاي بعد ردتو بنية والحمدلله راح توليدنها
_لا يمه حازم ميقبل والله
_شنو مايقبل كولي صحتي وما اكدر وهو يقنع اشو مايكسرلج حجاية
_ ميخالف لوكتها الله كريم
_عود هاي صدك يريد يرفع دعوى يرجع رهف
_والله مثلج ماسمعانه الا من حجاها حازم الصبح
_ وشيسوي يعني القاضي ينطي حقه
_والله مدري بس سمعانة الي يطلبها رجلها لبيت الطاعة يحكمله القاضي شلون بالمسلسل نفس الشي
_صخام الصخمه وليش جنابة ماينتظر حارث يرجع والله كريم
_ما اعرف السبب والله
_وامه مو صاحبتج ماحجت ماجابت طاري
_لا يجوز متدري بعدين طالت ترى خل يفضوها على قبلة
_اييي يصير خير
********
ثلاث اسابيع مضن ويلة اربع اتصالات من حارث بعدما اتصل صار كم يوم واني الوب ميته قهر
عمتي رجعت بالبيت تكول صحتها زينه ام فهد ووليداتها ميقصرون حتى فراش البيت والزوالي غسلوهن ونفشوهن والبيت سووله حملة تنظيف الجو غير بعد
والله زين واحنا هنا من نظفنا أكثر شي سحر خطية توسلنا بقتيبة يلة شال الزوالي
ساعدناها لسحر اني ورهف بس على راحتنا لأن شغل تعب واثنينا حوامل
عمتي من عرفت حارث بالموصل طلبتها متاحه وشبعتنا رزايل لأن محد كاللها وبقت تحجي الا عمي زمخ بيها على بيش مفاولة الولد يلة سكتت بس مبينه تلوب وكم مرة تحجي اتصلو بحارث وهي هم تتصل ماكو رد اصلا جهازه صارله يومين مقفول
اني حيل متوترة وبداخلي ادعي الله يسلمه ويرجعه بصحه وعافيه
وصلنا بهاي الفترة بلاغ من المحكمه جابه قتيبة لأن شغله هناك محامي وعنده معارف وشايف صقر بالمحكمه من سائل خبروه رافع دعوة
بيومها رهف مابطلت بجي كاعدة بغرفتها متحجي بس تبجي واحنا مجتمعين يمها حتى عمو اجى هو وقتيبة كاللها
_ جدو رهوفة هذا أمر محكمه خوما نعاندهم وانتي اول وتالي ترجعين لرجلج ادري بيج تبجين خوفا من حارث متردين تكسرين كلمته احنا كلمتنا وحدة ورأي حارث من رأيي لا عبالح وحدة يتصرف لا هو يأخذ حجايتي وهسة اني اكلج براحتج جدو إذا تردين ترجعين انتي حامل بأبنه خوما يعوفكم وإذا متردين هاي غير شغله تصير وهذا قتيبة موجود وكلي بقضيتج وإذا مايقبل يشوفلج محامي
مسحت دموعي وبقيت صافنه على كلامه اخر شي رديت .. ارجعله
سكتت بعدها واني بداخلي خايفة من صقر يطلعها بية مضاعف لأن تبهذل وياي بس اني مغلطانه هو غلط بحقي وظلمني
أنت تقرأ
هنّ أضعف خلق الله أركانا
Romantizmرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
