#بقلمي : Jawhara
*****
حسيت بطني وجعتني من سمعت عباس يكول فهد راح يتزوج تحرير بدون شعور نزلت من الجرباية ودفعت وائل بيدي صار كدامي
_ يمة وين تردين
_ وخر ولك خل اشوف ابوكم وسوالفه
لحكني هو وأخوه .. وهيج تدخلين عليهم
عاينت لروحي ولزمت راسي بيدي والله من الصدمة نسيت نفسي شعري مفتوح على طوله استغفرت ربي ورحت كعدت عالقنفه بالصالة وعيني على باب الاستقبال
اجو كعدو يمي سألت وائل
_ انت سمعته حجى بهالشي
دحك على عباس .. لا والله عبوسي كال
صفنت عليهم واني خلكي ضاك البنية الشهادة لله تبين زينه اهلها خوش اوادم قابل منعرفهم عمام ولدي ذول ابوها ابن عم ابو فهد بس عدها طبع تحشر نفسها بكولشي وسوت مشكلة لبيت ابو صكر لوما الله ستر جان حارث ذبح صكر
يعني شنو ابوها ما حط عينه على شباب العائلة إلا على فهد ليش مراح على ولد ابو صكر هم ولد عمها أقرب وفهد ممخططين نزوجه خل يتخرج يشوف دنيا لاا لاا مستحيل اقبل
راح ابو تحرير ودخل حازم من باب المطبخ من شافني كاعدة أيدي على بطني وفاتحه عيني وخازرته تلفت على ولده .. شكو شبيج خوما مريضه أحد من الولد ضوجج
وكفت و رفعت اصبعي .. تحرير ماتصير مرة لفهد هذا فتحة عيني تاخذله تحرير
_وشبيها تحرير حتى ماتعجبح
_ مابيها شي الله يرزقها ابن حلال بس مو ابني مو فهد
كلامي جان بنترة ومن انتبهت على روحي لأن اعرفه يتخبل إذا مرة تعلي صوتها
تقربت عليه .. عيوني حازم والله فهد بعده خل بتونس بحياته خل يتخرج
رفع أيده .. هاي شبيج سويتيها مناحه منو خطب منو تزوج هسة اني غير افتهم شبيج
_مو على أساس ابو تحرير يريد يزوجها لفهد
ضحك حازم وراح كعد عالقنفة التفت علية
_ منو كال شلج بهذا الحجي يابة
دحكت على عباس .. مو انت كلت
عبوسي لونه انخطف لأن طلعت السالفة جذب أو اصلا ممنتبه على كل الكلام حتى يعرف
_احجي ولك توك دخلت فززتني والله حتى بطني مغصتني
_شمدريني اسمعه يكول تحرير ازوجها لفهد
ضبط عينه على عبوسي .. اي بابا وما سمعتني شحجيت وياه شنو جان ردي
_ها لا والله
_ديلة استفاد هذا الناخذه من التصنت عالناس ولك اثول الرجال يتشاقى كاعد يسولف على سيارته يريد يبيعها ويشتري حديثة وكاعد تحجي عالاسعار كتلة غالي سعرها الا تحط فوك فلوس البيعة هو ضحك وكال ازوج تحرير لفهد
ابتسم عبوسي بفشلة لان وائل كفخه .. ثول ثول
دنكت عالنعال تكرمون برجلي سحبته وشمرته عليه .. امشي ولي لا اكوم اكفخك
ركض لغرفته وائل خرب ضحك وطلع وراه
رجعت كعدت بصف حازم جريت حسرة وذبيتها
_سلامتج يابة عليش هالعصبية لو صدك شتسوين
_حازم فدوة سد الموضوع لأن ماريد اتخيل ابد تحرير تصير جنتي بعدين شنو مكبرني من هسة جايبلي جنة
مد أيده ودغني بخصري ضحكت
_ والله انتي بعيني تبقين ذيج ام السبعطش سنة احلى البنات تذكرين ترى نفس عمر تحرير اول ماتزوجنا
عضيت شفتي وتبسمت سحبني بحظنه وباس راسي شوو اليوم زايد حلاج
دفعته اريد اكوم .. ججج حااازم ولدك بالبيت
رجع جرني بحظنه .. اصدقاء وحبايب ابوهم شوفيهم ولا واحد يهوب صوبنا من نكعد وحدنا اني وياج بس التوم يتكامزون هههه
_ فدوة حبايبي
_يابه لاتتفدين
_اي كول اغار وفضها ههه
_لا ما اكول هسة احجيلي شلونها بنيتنا خوما متعبتج اليوم
صفنت يابنية هاي من شافني مفهية بوجهه جر خشمي بين اصابيعه .. حبيبة ابوها هاي
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
