#بقلمي : Jawhara
********
وعيت على روحي اني بالمستشفى والمغذي معلكي بيدي واكفين فوك راسي اجت عيني بعينه غمضتها لأن تذكرت حجايته بعدها ترن بأذني حسيت بشفايف على كصتي فتحت عيني على حارث .. سلامتج ام فهد
ماحجيت خليت أيدي على بطني اتلمسها خفت حيل
سودة علية فهد حظني وبقى يبوس بية .. يمه حبيبتي شلونج شتحسين
بصوت تعبان رديت عليه .. صيحلي الطبيبة
_فهد روح صيحها خلها تفحصها
ما التفتت ولا انتبهت لكلامه عاملته كأن ماموجود
اسمع فهد حجى وياه وطلع
تقرب وكف يم راسي ومد أيده مسح عليه ونزل بيده لخدي تلمسه .. حمدالله على سلامتج
مارديت عليه حجيت وية حارث الجان واكف بجهة الثانية .. حارث اخذني لبيت اهلي
عقجت وجهي من حسيت لوية ابطني خليت أيدي اتحسس الالم هو رأسا مد أيده وحظن أيدي وبطني مرتبك ونتر .. وين صارت الطبيبة ..... سلامتج يابه
كام فحص المغذي ويدردم .. خلص المغذي هم شلون اهمال اقلها تعالو شوفو المريض
حارث ساكت ما يحجي شوية ودخل فهد والطبيبة وياها ممرضه سلمت وراحت فحصت المغذي نزعته من أيدي والممرضه لصقت نغزة الإبرة طلع دم
سألتني عن حالتي وبعدني ماحاجية ردلها حازم .. المرة حامل وعدها لوية ابطنها طمنينا عليها
التفتت علية سألتني إذا اكدر امشي حتى تفحصني وتتأكد من حالتي
رفعت راسي احس دايخه شوي اجى قبل ماحارث يتحرك وحظني يريد يساعدني انزل من السرير ماحجيت خليته يساعدني واني احسه يحاول يتودد بطريقة لمسته لجسمي بكل حنيه
بعدما تأكدت وتطمنت على نفسي وحملي الحمدلله وصفتلي علاج طلعنا من المستشفى
فهد حاظني وأبوه يمشي بصفنا .. ماما هدني اني امشي
_لا ميخالف اوصلج للسيارة
اني حسيت يريد اصعد سيارته حتى يأخذني للبيت
حارث طلع قبلنا لسيارته شوي وطبكت سيارته
نزل واجى علية فهد كاله .. خالي امي ترجع ويانة لبيتها
_ابوك هو اتخلى عنها ماريد احجي أكثر حتى لا أغث اختي وهي تعبانة
هديت ايد فهد ورحت لسيارة حارث اريد اصعدها سارة فتحتلي الباب بدون متنزل
اجى وكف وراية .. هالة تعاي وياي للبيت انتي تعبانه وبالي راح يبقى يمج
بدون ما التفت .. تخليت عني يا حازم
حسيت طاقه توتر تشع من جسمه وهو يرد ..
_ والحسين ما اقصدها انتي تعرفين غلاج
ام فهد لا ترحين
أيدي على بطني وايد الثانيه لزمت الباب فتحته أكثر وصعدت مديت أيدي اريد اسده
رجعه بيده وعكد حاجبه وصاح .. حارث تعال نزل اختك ضرب العناد برأسها
_ ما الومها والله جرحك جبير يا حازم
صعد السيارة وطبك الباب شغلها وطلع واني مدنكه ما رفعت راسي ماريد اشوف نظرة حازم ولا لهفة فهد حتى لا أضعف واقبل ارجع وياهم حازم اهاني كدام الكل من كال الحارث اختك ترجع وياك
انتبهت على صوت سارة .. شلونج حبيبتي تحسين روحج احسن والله اجيت انزل حتى اطمن عليج وحارث ماقبل كال ابقي يم رهف
تنهدت بحسرة .. الحمدلله
_ولو مو وكتها مبروك حملج شكالت الطبيبة
_الحمدلله زين
_اي الف الحمدلله
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
