بقلمي : Jawhara
*********
اليوم جمعه كملنا تنظيف اني وسحر واتفقت وياها الغدا اليوم اني اسوي عفتها تغسل الكراج ودخلت المطبخ طلعت تمن غسلته ونكعته وجبت البتيتة اريد اقطعها عجبني برياني اطبخ
عمتي سألتني إذا محتاجه شي حتى توصي الولد راح يطلعون سالتها .. وين يطلعون
_ مدري على جماعتهم وراها يرحون لصلاة الجمعه
نزل حارث متأنق هالمرة لابس بلوزة كريمي وبنطرون بيجي وحذاء جوزي والساعة والمحبس وعطره الطيب شنو السالفة زين ليش ميكول وين رايح وانوب أهله محد يسأله معقولة عدهم هالشي عادي حتى من يتأخر رغم عمة سهيلة من يلتحق تبقى تلوب عليه ومن ينزل إجازة يرجع متأخر متسأله
اقلها يطمني
جدحت بعقلي فكرة سودة بس بعدتها لااا ممعقولة التفتت عليه جان يعدل ملابسه من حس اراقبه رفع تك حاجب واجى وكف بصفي واكفه عالسنك اكشر بتيته ماحجيت رجعت اشتغل
_محتاجه شي طالع لبعقوبة
مدنكه ما اباوعله على أساس بايعه ثكل عليه
رديتله .. لا .. شكرا
تنهد .. بكيفج يلة فيمالله
_الله وياك
كملت شغلي قريب الظهر لأن جدر جبير واحتمال بيت ابراهيم ومعتصم يجون فشوينا دجاج هم وفعلا دخلو كلهم نفس الوقت نسوانهم والجهال
والولد راحو للصلاه هم وعمو سألو على حارث عمتي كالت راح لبعقوبة
ردلهم قتيبة بضحكه .. اخوكم حارث مو راحه يوميه كاشخ والعطر وراه اكيد عنده صيده
جنت اثرم زلاطه والله ردت اجرح اصبعي رفعت راسي من كامو يضحكون هم ونسوانهم شكد ضجت لو حتى ميقصدون وللشقى بس احساس بداخلي فز لكلامهم ماريد افكر ولا اكبر السابقه هي انكالت للضحك اشو اني غلتمت الوحيدة انتبهت علية عمة سهيلة صاحت بيهم امشو وراكم جامع وصلاة تتبلون عالرجال كون تحجون كباله هالسوالف والله ميرضى
_ يمة اني حجيتها شقى لا تخافين سارة ماتزعل
ها بنت عمي خوما تزعلين
هزيت راسي بمعنى لا بس بداخلي ضجت
لأن حارث مجاي يحجي وياي يطلع بدون ميكول احتمال هذا طبعه زين ميخالف بس ليش يطلع بدون ميكول راح اطلع
بغرفتي ورا ما سبحت ورتبت روحي كعدت اقرا قرآن وراها صليت من كملت صفطت السجاده والحجاب وذبيت شال على راسي مالبست روب الجو اليوم مو ذيج البرودة ورى العصر يبرد
كعدت يمهم بالاستقبال لأن جبير وماشاء الله من ينجمعون همة وجهالهم يترسون البيت
عمتي كالت من يرجعون من الجامع صبو الغدا
الكل كاعدين يتغدون بس حارث ماكو ضجت يعني انت إجازة ابقى بالبيت شنو يومية عندك طلعه والمغرب يلة ترجع
بسيطه حارث اعرف شلون اتصرف وياك
انتبهت على صوت عمو كاعد بصفي .. سارة يابه ليش صافنة اتغدي
ابتسمت بوجهه .. جاي اكل والله
_عاشت ايدكم والله الاكل طيب
_الف عافية يمه هاي طبخ بنت عمك
التفت ابراهيم علية .. عاشت ايدج خيتي
_بالعافية
من كملو تعاونا اني والبنات شلنا المواعين وأمينة السفرة
وزوجة معتصم غسلت المواعين ونظفت الطباخ وسحر سوتلهم جاي
اني كعدت شوية وصعدت لغرفتي
مددت بفراشي اخذتني النومة ماحسيت إلا المغرب الغرفة ظلمه رحت توضيت وصليت
العصر والمغرب
نزلت لابسة روب فوك دشداشتي الجو بارد وبي غيم ثكيل الظاهر راح تمطر سبحان الله النهار شكد حلو شمس وهسة غير الجو
شوي وبدأ البرق يتلاصف وكامت ترعد ادحك على جهال قتيبة يتعايطون وراحو ختلو يم عمو كاعد بالهول متلفلف بالفروة انحشكو بفروته وهو خربان ضحك عليهم
حتى سحر اجت كعدت يم الصوبه وكل شوية فازة من صوت الدوي والصراكيع
صاحني عمو .. تعاي بنيتي لو متخافين شوفي صاحبتج تتراجف
_ اني لعد احب اسمع صوت الرعد نهائي ماخاف
_والله ذيبة
دخل قتيبة جان طالع .. هههه لك هاي شنو سنافر وين خاتلين بس الروس
_عيني ولدك جبناء شوفهم صوفرو
_هههه خررب لك هاي حتى امهم ولج فضحتينا شوفي بنت عمي ولا مهتمه
_هههه اي صدوك سارة شلون متخافين
_والله شو عادي ما اهتم
عفتهم ورحت وكفت باب المطبخ ادحك الجو اظلم بس تتبارك والمطر كام يزخ زخ قريت كم دعاء حافظته وبقيت عيني بالسما تذكرت اهلي الله يرحمهم وبيتنا بهيج حالة الجو اكعد يم شباك غرفه الاستقبال أزيح البردة وابقى عيني عالحديقه من تمطر والأشجار والورد شتلاته تنغسل بمي المطر وريحة الأرض منعشة من تتلاحم وتتلاكى وية المطر
تنهدت بحسرة وفكري راح يم حارث وين صار حتى السياقة بهيج جو خطرة
دعيت الله يحفظه ويرجعلي
أنت تقرأ
هنّ أضعف خلق الله أركانا
Romanceرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
