#بقلمي : Jawhara
اسمهن حرز للنسوان
راية شرف معكودة
وحجيهن بلبل البستان
اذا جاس الندى خدوده
كصيبتهن تصير عگال
لشيوخ العرب وحزام
للبين نگص زوده
********
عصبي نار واكف ينتظر الدكتورة تكمل السونار يتأكدون من نشاط الجنين
تقرب ودخل حاجز الفحص عينه على هالة الي جانت خايفة يصير شي بالطفلة لأن وكعت على بطنها بالحمام
حجت وساهم وهي تاشرلهم على حركات الجنين ..الحمدلله تمام لاتخافين بس هالفترة الاسبوعين تنامين على ظهرج
كملت فحص .. يلة انزلي على كيفج
راحت لمكتبها وحازم ساعد هالة سحب ملابسها نزلهم على رجليها
كعدت عالكرسي وهي كوة تسحب النفس
حازم سأل بقلق .. دكتورة شوفيها جاي اتجر النفس كوة
ابتسمت اطمنه .. لا تخاف شي طبيعي هذا الجنين جاي يكبر ويضغط عالرئتين فتشوفها تنفسها بهاي الصورة عيني تطمنو بنتكم مبينه ماشاء الله نشطة لاتخافون هسة بالاسبوع 36 من الحمل ولادتج قربت الله يسهلج أن شاء الله
_ان شاء الله يارب هواي تعبني هذا الحمل شوفي جسمي ورجلية منفوخه
_هانت مابقالج شي بس مثلما كلت هالاسبوعين على ظهرج تنامين واطمنج ولادتج تكون سهلة ميحتاج عملية
طلعو من العيادة والطريق كله حازم يسوق بهداوة يخاف عليها بس شبعها رزايل
_جم مرة كتلج عوفي كولشي هنة هالايام ينكظن على خير وتولدين شسوين داخلة تجلفين بالحمام
_حازم والله الحياطين من زمان ممجلوفه
_وبالجهنم شنو يعني انتي متكعدين قابل شكو بي يومية نسبح بي نظيف وشحلاته
اااخ منج بلة لو صاير شي بيج لو مكسورة لو البنية متأذية فهميني شسوي اني
ولدج الثيران اليوم اكفر بيهم والحسين الا اشغلهم بالبيت وأشوف منو يفتح حلكه
سكتت ماحجيت مابية ارد عليه عصبي نار وكلامه صحيح دوم يحذرني واني ما اهتم من اشوف البيت يحتاج تنظيف انسى نفسي
رجعت راسي على ظهر المقعد وغمضت تالي كام يستغفر وسكت بعد ما حجى وبالبيت من وصلنا وكبل لغرفتي مددت عالفراش وطلع صاح للولد اسمع صوتهم بالصالة حازم يحجي عليهم وتوعد بيهم وبقى يوجهم
انقهرت حيل هاي مو وضعية اني ولدي مدللين خطية هيج يتبهذلون فخابرت امي وحجيتلها الصار
دخلو الولد يطمنون سودة علية مقهورين من شافوني كامو يبوسون بية وبقو كاعدين يمي وكلمن يكول اني راح هيج اسوي واني ساكته اسمعلهم
دخل حازم الغرفه وصفك بيده .. ماشاء الله من هيج تحبونها روحو اشتغلو شغلها الملابس برا منشورة دخلوها يلة واريد واحد يسويلي جاي
كام وائل .. يابة اني اروح اسويلك الجاي
_لا انت روح اقرا وراك مراجعه بكلوريا كوم عقيل سوي جاي وحسين وعباس يدخلون الملابس ويصفطوها
طلعو من الغرفة واحد يردم الثاني
_عود كلت جدتي صعبة ومتتفاهم تشغل بينا طلع ابو فهد ميتفاهم
_هاي حسوني سمعتك
التفت شاف أبوه وراه طلع يركض فتح الباب الخارجي بالترك شادين حبل ينشرون عليه الملابس اجى عباس وياه شايل سله ..امي تكول خلهن بالسله وبعدين وزعوهن كلمن وملابسه بس صفطوهن
أنت تقرأ
هنّ أضعف خلق الله أركانا
Romantizmرغم مظهر الانثى الرقيق الا ان داخلها انثى قوية هذا حال نساء قصتنا . يصرعن ذا اللب حتى لا حراك به وهنّ أضعف خلق الله أركانا
