#نصيبي
الحلقه 17
صكرت الباب ورد عليا
نا:😳😳😳من
رجاء:بعععععع
نا حطيت يدي ع قلبي:خزي عليك فجعتيني
رجاء:هههه نجك ليا تهبلي وحق ربي تجنني اشربي اميه رقيه قبل م تطلعي
نا بحتت فيها:متأكده انتي رجاء
رجاء:مره هك ومره هك مش ديما براده
نا برمت نبخ في عطر:نشالله ديما هلعقل
رجاء:تبي حاجه قبل م نطلع
نا:جيبيلي اميه الله يربحك عطشانه
رجاء:تمام تو ندزها لكي مع نوران
نوران دقت ع الباب
فتحتلها:خشي
نوران مدتلي اميه:تهبلي الله اكبر عليك
نا:نجك ليا عقبالكك
نوران:يارب
نا:ساره وين بعد خطرها
نوران:قاعده بره مهيجه مع البنات
نا بحتت فيها وحسيت كأنها داسه عليا حاجه
نا:نوران كنك شن في
نوران بحتت فيا وزمطت ريقها:لا م في شي
نا مسكت يدها:حافظتك اكثر من روحي احكي كنك
نوران :في الليل تو نحكيلك وعد
نا تنهدت:باهي
فاطمه فتحت الباب:يخيا عليك سماحه تهبلي
نا:عيونك فطوم
فاطمه:هيا اطلعي قلتلك ماما
نا صبيت وحطيت يدي ع قلبي:ننقنيي متوتره
فاطمه مسكتني من يدي:غير تعالي هيا
مسكت في فاطمه وطلعت م دار
نا:وين نقمعز
فاطمه:في الخيمه بره
نا تنهدت:باهي
اول ما خشيت قعدن يشتن ويجن ب المجموعه يسلمن عليا
وحطن عشاء تعشن ودارن جو العلاقه وولعن البنات المنظومه وهيجن عليها
نا شيرت لفاطمه جتني
فاطمه؛كنك تبي حاجه
نا:نبي نخش نغير مضايقه بكلل
فاطمه مسكتني من يدي
فاطمه:هيا
خشيت لدارنا وصكرت ع روحي غيرت لبست توته مريحه وغسلت الميك آب ورقدت ع سرير بكيت نين رقدت.....
ساعه 1:30
ساره خشت عليا
ساره :نوور نينا ناني هيييي
نا فتحت عيني:كنك
ساره تكر فيا:صبي تعالي نكسدو وصهيب ورهف يسألو عليك من بدري
نا قمعزت ع سرير:من امتى راقده
ساره:لكي ثلاث ساعات قريب
نا:ومزلت ناعسه
ساره:نفس الجو لاكن الله غالب تعالي
طلعت غسلت وجي وقمعزت في الصاله حذا ماما هدرزت معاها وقعدن العزايز يحكن كسدت صبيت خشيت للمطبخ شربت عصير ونسمع في البنات هرجتهن في الحاجر طلعت عليهن
ندى:اووووووو العروس جت
نا:العقبه لكي
ندى:نشالله
نا بحتت ف فاطمه:جعانه
فاطمه:تسحري معانا ولا نسخنلك من العشاء
نا:لالا نبي كسكسو
فاطمه:هيا باهي
ساره:ثاريته ولد خالتي طرف وما نندري عليه
هديل:ههههههه عقل انشالله
رجاء:من زمان نقول فيها لكي
نا بحتت فيهن:من
ساره:خو هذن
نا كشخت :ساره ريحي روحك
ساره:ووووه نشكر فيه بس
نا :ع مهم نبهتك را سراج وسند يقتلوك
نوران تحكي بصوت واطي:شنو هلنومه هذي
نا:مش عارف غفيت بدون م نحس
نوران:الايام يلي فاتن تعب بكل
نا بحتت فيها:خطرها شنو تبي تحكي
نوران:أ أ خليها بعد السحور
نا:يعني تبش تحكي
نوران سكتت
نا:بجوك وصبيت بنخش المطبخ لقيت محمد معرضلي ع الباب
نا زمطت ريقي:حول
محمد:نور بكره بتجوزي غيري يعني بترقدي مع حد غيري مستحيل لالا نور بالله عليك رديلي يا نور نا معش نقدر نتحمل اكثر
نا بحتت فيه:ونا عادي تحملت ونعني م نرد صاح
محمد:هيا في قصه يا نور والله مش دايرها ب قصد
نا :انت عيل يا محمد ع ي ل
محمد:يلي تبي تقوليه قوليه بس رديلي ومسك يدي يبحت في الحنه
نا فنصت وكريت يدي:اخر مرة تلمسني فاهم وحول من قدامي
محمد حول:نور انتي حبي الاول والاخير
سمعتها وخشيت نجري لدار وقعدت نبكي
فاطمه:😳نور كنك
نا:فاطمه خليني بروحي
فاطمه:بس عشاك
نا :نبش
فاطمه:اففففف كنك ازفت
نا:شي مضايقه بس عشان بنطلع من هنا حوشنا يلي تربيت فيه و نمشي لناس غريبين
فاطمه قمعزت حضنتني:هذي سنه الحياه يا نور كلنا مصيرنا هكِ ونحنا مش طايرين تو تقعدي تجينا
نا تنهدت وسكتت
فاطمه صبت:دقيقه تو نجيكِ
نا هزيت ب راسي
