⁦♠️⁩ كبريائي يتحدى غرورك ⁦♠️⁩ من تأليفي Macilia ch

♠️ الحلقة 9 ♠️

♠️⁩ #كبريائي_يتحدى_غرورك  ⁦♠️⁩
🔱 من تأليفي macilia ch 🔱
الحلقة 9:

خيوط مخها تحرقو و الكلام هرب منها ...ماعرفتش واش ترد أنا داخلها عارفة أنو مستحيل تقبل لسببين ..السبب الأول ما تقدرش تبني هايلة بما أنو ما تجيبش ولاد و فوقها شطبت فكرة الزواج من قاموسها و ما عادت توثق فحتى راجل و السبب الثاني بسبة تهديد إدريس ..أكيد إذا عرف أنو كانت السبب الغير مباشر لدخولو السجن راح يكرها 
شافت فيه تحكي
شمس: حيدر أنا
حيدر: ما تتسرعيش خمي مليح فقرارك ...
جاء خارج أما وقفاتو بسؤالها
شمس: علاه فجأة واش صرا؟؟ علاه عرضت عليا الزواج ؟؟ ما نظنش بين ليلة و أختها تخمم أنو تعرض عليا الزواج كي قتلك مدلي فرصة حتى نصلح غلطتي مقصدتش انو تتزوجني
تبسم على جنب و تلفت لعندها
حيدر: قلتي علاه مالا؟؟ في رايك كاين سبب ورا عرضي صح ؟؟ هك مفكرة؟؟
بلعت ريقها و هزتلو راسها بايه
شمس: ايه متأكدة أنو كاين شي ورا الموضوع مراحش تخطرلك فكرة الزواج بين يوم و ليلة ...خصوصي انو عندك يامات برك خارج من الحبس ..الزواج ماشي لعبة و ما نظنش انت من الناس لي يحسبو الزواج لعبة بين يديهم أرواح برك و تزوج لا يقدر يتحمل مسؤولية ولا شي
حيدر: مصرة انو تخليني نحكي مع انو تعرفي الإجابة...اوكي مالا عندك الحق باباك عرض عليا انو نتزوجك
ضحكت باستهزاء
شمس: تتمسخر بابا مستحيل يفكر انو يتخلص مني بهاذ الطريقة و يزوجني لا
حيدر: واش قصدك بهاذ الطريقة تشوفي فيا سفاح نقتل الناس و لا تاجر مخدرات؟؟
للحظة فقدت أعصابها و صاحت في وجهو
شمس: اييييه مستحيل نتزوج بمحابسي لا مستقبل لا والو حتى لو كنت بريئ أما تبقى محابسي
سكتت لوهلة تخزر فيه مغششة و النار خ
خارجة من عينيها ..صدرها طالع هابط من الغش لي حاسة بيه ..
رجعو عيونو حمر من الزعاف ..كبس على قبضة يدو و عض على شفتو التحتانية بغش يحكي و يصر على سنيه
حيدر: هك شايفتيني مالا ؟؟
شمس: ايه هك شايفتك
حيدر: اوكي بينتيلي وجهك الحقيقي لالة شمس ....ضحك ضحكة باهتة يحكي
حيدر: لعلمك باباك ما قالي شي أنا لي عرضت عليك الزواج بارادتي أما نتي خيبتي ضني للمرة الثانية و بالزيادة نعرف انو انتي ما جيبيش ولاد مع هك قاعدة تتكبري على الناس و رافدة شنافرك للأرض ..حرق المسافة لي بيناتهم  وقرب منها...حط يدو عليها و شدها من كتافها مقربها لعندو ...وجهو السخون يلفح في وجهها ...ثبت عيونو عليها يخزر لتفاصيل وجهها و اخر شي ثبت عيونو في عيونها يخزرلها بتحدي
حيدر: كبريائك هذا راح نكسرو شي يوم
طلقها و دار ماشي مخليها وحدها تتخبط في أفكارها
صاحت فيه تحكي
شمس: مغرور...ضربت ساقها على الأرض بعنف و خربشت شعرها بصوابع يديها منزلة راسها للأرض 
شمس: و أنا راح نكسر غرورك نتحداك
حيدر: و أنا قابل التحدي
تهزت و تنفضت من بلاصتها و وقفت حاطة يدها على قلبها
شمس: بسم الله الرحمان الرحيم منين خرجتلي؟؟
تبسملها بمكر و هز مفاتحو من الطابلة
حيدر: نسيت مفاتحي...غمزها و خرج مخليها وراه تتغزل و تاكل بعضاها