⁦♠️⁩ كبريائي يتحدى غرورك ⁦♠️⁩ من تأليفي Macilia ch

♠️ الحلقة 29 ♠️

♠️⁩ #كبريائي_يتحدى_غرورك  ⁦♠️⁩
🔱 من تأليفي macilia ch 🔱
الحلقة 29 : 

وصل حيدر للمشفى ...سقسى على شمس و دلوه للغرفة ..طلع يجري للطابق لي موجودة فيه...لمح والديها واقفين يحكو مع الطبيب ...سرع من خطواتو و لحق مع كلمة حامل

وقف مسمر في بلاصتو ...يرمش في عيونو مرات ورا بعض مشوكي
نادية: حامل؟؟
سالم: دكتور راك غالط بنتي مستحيل تحمل
قطب الطبيب حواجبو مستغرب
علاه مستحيل تحمل؟؟
نادية: بنتي عاقر ما تجيبش ولاد
أما التحاليل تبين انو حامل
حيدر كان واقف وراهم مزالو مصدوم من الخبر ...حاجة داخلو قاتلو انو كلام الطبيب صحيح و مصدقو
حيدر: دكتور متأكد أنو هي حامل
دارو لعندو مركزين نظراتهم عليه
ايه متأكد أما انت شكون
حيدر: أنا راجلها شمس تكون مرتي
اه اوكي ..ارواحو تبعوني لمكتبي حتى نحكو فالموضوع أكثر
مشى قبلهم و هوما تبعوه حايرين و عشرين سؤال يدور فراسهم

دخلو لغرفة الدكتور و خذاو بلاصة و قعدوا
شبك الطبيب صوابع يديه ببعض فوق سطح المكتب يحكي و فرد وقت يخزر للتحاليل
بحسب التحاليل المدام حامل من شهر
نادية: ما يكونش صرا غلط و تخلطو تحاليل مرا ثانية مع تحاليل بنتي
لا مستحيل أما حاب نعرف علاه مصرين أنها عاقر
حيدر: مرتي كانت متزوجة قبل و طلقت بسبة انو هي عاقر ما تجيبش ولاد
حرك راسو الطبيب بتفهم
فهمت أما ممكن التحاليل وقتها كانو غالطين و لا تخلطو مع تحاليل مرا ثانية كلشي ممكن
سالم: ممكن حتى هاذو التحاليل غالطين
زم الدكتور شفافو يخمم
كي هك راح نعاودو التحاليل و نشوفو النتيجة
التحاليل مستحيل يجو غالطين زوج خطرات
حيدر: ايه افضل حتى نقطعو الشك باليقين
راح ناخذو شوية  دم من المدام و نعاودو التحاليل
نادية: نقدرو نشوفو بنتي
ايه اكيد تفضلو معايا
وقفو و مشاو خرجو مع الطبيب
دخلهم الدكتور لغرفة شمس و خلاهم معاها
راح نخبر الممرضة تجي تنحيلها الدم للتحاليل
شمس غير شافتهم تقعدت فبلاصتها ...كمشت ملامحها بوجيعة كي نغزتها إبرة السيروم في ذراعها
شمس: ماما بابا واش صرا
قريت نادية و باستها من راسها تحكي
نادية: حمدالله على سلامتك ..كي رحت نجيبلك الماء بعدما استفرغتي لقيتك مغاشية فالأرض مالا جبناك للمشفى
شمس: ايه تفكرت حكمتني دوخة قوية و طحت
هزت راسها مزال دايخة ...وساعو عيونها كي شافت حيدر ببدلة العرس واقف جنب الباب غايس
شمس: حيدر!! واش راك تدير هنا
دارت نادية و سالم يخزرو فيهم يستناو فاجابتو حتى هوما حكمهم الفضول
طلع راسو على صوتها ...بلع ريقو و قرب من السرير المشفى ...قعد على طرفو و حكم يدها باسها
حيدر: ما قدرتش نتزوج ما قدرتش نديرها
دق قلبها بقوة وسط صدرها مش مصدقة لي تسمع فيه
شمس: صح انت ما تزوجتش ؟؟
حرك راسو بلا يتبسم
حيدر: ما قدرتش نفرط فيك أنا قابل نعيش معاك بدون اولاد ما يهمش المهم تكوني جنبي طول العمر
زغللو عيونها بالدموع فرحانة انو ما تزوجش...زمت شفافها راح تبكي من فرط الفرحة لي حاستها فهاذ اللحظة ...ترمات عليه عنقاتو بقوة و كبشت في كتافو
دخلت الممرضة و هي جبدت روحها
وقف حيدر و الممرضة راحت تنحي الدم لشمس
قطبت حواجبها مستغربة
شمس: واش كاين
راح نحيلك دم حتى نعاودو التحاليل
شمس: تعاودو التحاليل ؟؟واش من تحاليل؟؟
هزت راسها تخزر في حيدر و والديها مش فاهمة حاجة
شمس:  حيدر .. ماما ..بابا واش كاين ؟؟
سالم و نادية ما عرفوش واش يحكو مزال ما هضموش الحكاية
تبسملها حيدر يطمن فيها بعينيه
حيدر: ما تخافيش مش حاجة خطيرة الدم لتحليل الحمل
شمس: حمل؟؟ شكون حامل ؟؟