⁦♠️⁩ كبريائي يتحدى غرورك ⁦♠️⁩ من تأليفي Macilia ch

♠️ الحلقة 11 ♠️

♠️#كبريائي_يتحدى_غرورك  ⁦♠️⁩
🔱 من تأليفي macilia ch 🔱
الحلقة  11:

عند شمس و حيدر ..
كانو مزال قاعدين فالأرض وسط هذاك الزقاق
يخزرو فعيون بعض
حمحم حيدر و وقف يحكي و هو يحك في شعرو
حيدر: خلينا نمشو و نوصلك للدار
عاونها حتى تنوض و مشاو من تم و خرجو من الزقاق
لي يعدي من جنبهم يقعد يخزر فيهم و يخزر ليد حيدر لي حاكم بيها شمس حتى تسند روحها
تغزل حيدر من نظراتهم تقول عاملين جريمة ...حتى وجه شمس المضروب ما حطوهش فالاعتبار
لحقو لدار شمس و دق حيدر الباب
سندت شمس روحها على الحيط تتوجع و عينها اليمنى مغلوقة بسبة الضربة
ثواني حتى فتحتلهم نادية الباب
اول شي شافت حيدر ..استغربت و جات تحكي أما غير طاحت عينها على شمس
شهقت شهقة قوية و خبطت يدها على صدرها تصيح
نادية : شمسسسس ...واش صرالك؟؟ قربت منها وشدتها تخزر لوجهها بخوف
حيدر: خالتي خلينا ندخلو راح نشرحلك الموضوع بالتفصيل ..لي يسوى و ما يسواش راهو يخزر
شافت حواليها لقات كلامو صح .. الجيران قاعدين يشوفو فيهم ..لي راهي طل من تاقتها حتى تقرعج و لي واقف يخزر فيهم
بلعت ريقها و دخلت شمس معاها تمشي فيها بشوية ..دخل حيدر وراهم و غلق الباب
قعدو الناس  لي تم يتهامسو و النساء يقطعو فيهم
شفتي شفتي دخلوه للدار ..لا حشمة لا حياء
ايه عندك الحق اصلا واش يجيك من بنت نادية ### بكواغطها
شفتي وجهها كيفاه عامل اكيد دارت عملة ...الله يسلم اليدين لي دارو فيها هك
و هذاك شكون كأني شايفتو
يوووه هذاك ولد زهرة لي خرج من الحبس
لا تتمسخري هذاك الزل ولدها ما تنسايش ولدها سمين و خدودو قريب يطيحو فالأرض
ههه هذاك قبل ما يدخل الحبس ...خرج منو واحد ثاني
ايييه هذاك هو مالا سمعت فاطمة تقول بلي زهرة ناوية تزوج ولدها لبنتها مريم...
اييه علابيها قبلت و انا نقول كيفاه تقبل بواحد سمين و ملامح وجهو ماشي باينة ...طارت بيه بنت فاطمة
ما تعرفي على حساب الشوفة بنت نادية هي لي طارت بيه و بيناتنا بنت نادية شابة  على بنت فاطمة أكيد راح تفوز بيه
ايه زيد مطلقة أكيد راح تكبش فيه بيديها و سنيها
اصلا واش راح يديرو بواحد لا شغلة لا عملة
الجيل تاع درك أرواح و تزوج ...
نخليك الراجل يعيط نروح نشوف شبيه ولا يكبلي سعدي اليوم
ايه ايه روحي ...

بعدما دخلو للداخل
عارضهم سالم يحكي
سالم: واش كاين؟؟ ..تخطف لونو كي شاف وجه شمس ..واش صرااا شبيه وجهك؟؟
نزلت شمس راسها ما عرفتش واش تقول...شدت في يد يماها بقوة و لمعو عيونها بالدموع
حيدر: خليني نحكي عمي الحقيقة هي
حكالهم حيدر واش صرا و كيفاه لقاها
قرب سالم من بنتو يحكي و الشر يطاير من عيونو
سالم: شكونو احكي؟؟
بلعت ريقها متوترة ..طلعت راسها جات عينها فحيدر لي طمنها بعيونو حتى تحكي
شمس: فؤاد هو لي دارلي هك في وجهي...هو تعرضلي و غملي فمي حتى مع نصيحش بعدها كي نجحت و عضيتو و جيت هاربة شدني من شعري و ضربني
سالم: فؤاد ولد ### اليوم نهارو..جاء ماشي
أما شمس زربت حكمت يد باباها تحكي و تترجاه بعيونها
شمس: لا بابا ما تروحش و توسخ يديك بيه....غدوة نروح لسبيطار حتى يمدلي الطبيب ورقة بلي تعرضت للضرب و من تم نروح نشكي بيه ..الله يخليك في خاطري
نادية: عندها الحق يا راجل ما توسخش يديك بيه ..
قعد حيدر ساكت يخزرلهم
نفخ سالم بقوة و جبد يدو منها يحكي
سالم: مراح ندير والو أما يكون فعلمكم ما راحش نخلي هاذ الشي لي دارو يجوز على خير ...
دار عند حيدر و طبطب على كتفو يحكي  سالم : وليدي نظن انو الأفضل أنو نتوما الزوج تتزوجو فأقرب وقت
توسعو عيون شمس بصدمة تحكي
شمس: واااش ؟؟ بابا أنا
تلفت لعندها و عيونو حمر
سالم: قلت قراري و هنا يموت الكلام ..سواء قبلتي أو لا ..راح تتزوجي حيدر ..برضايتك و لا غصب عليك انت باباك و نعرف صلاحك و ما راحش تلقاي كيما حيدر ..يصونك و يخاف عليك ..اصلا كنتو لازم تتزوجو من خمس سنين
بلعت شمس ريقها بتوتر كي تفكرت تهديد إدريس ...خزرت فحيدر بعيون ضايعة و هو شاف فيها مطلع حواجبو يشطح بيهم يحاول يغزل فيها
حيدر: اسمحلي عمي نروح و نخبر أهلي حتى لدوك مزال ما خبرتهمش بقراري
سالم: اكيد يا وليدي تفضل
تبسملو و مشى خارج
طلعت شمس لغرفتها و لحقتها نادية كي جابت علبة الاسعافات حتى تعالج جروحها