♠️ #كبريائي_يتحدى_غرورك ♠️
🔱 من تأليفي macilia ch 🔱
الحلقة 26 :
غير دورت شمس الصورة وساعو عيونها بصدمة و شهقت حاطة يدها على فمها مصدومة من الشي لي تشوف فيه
شمس: هاذي مش هي علاه متصور معاها
..وساعو عيونها كي تذكرت
#فلاش_باك
كانت راجعة من الليسي ...غير خطفت الدورة حست بيد جبدتها من ذراعها بقوة من ورا و لسقتها فالحيط ...
قبل ما تحكي صاح فيها وجهو حمر و عروق رقبتو بارزين
بدر: بسبتك انتحرت لبنى يا ### راح تندمي راح نمررلك عيشتك صدقيني ...
طلقها و دار ماشي
شدت فرقبتها تنهج صدرها طالع هابط تحاول تاخذ نفس ...رعبها و خلاها ترعش من الخوف ...و اكثر شي رعبها عيونو و نظرتهم الثاقبة
بلعت ريقها و مشات مكملة طريقها للدار تزرب فمشيتها هاربة
سندت يدها على حرف اللافابو ترد فالنفس لي راحلها ...حست روحها ضايعة ...درك عرفت وين شافتو من اول لقاء بينهم عرفت انو وراه حكاية و كي قاللها انو هو لي عاونها نهار ضربتها طوموبيل و هي برا البلاد تذكراتو شوية أما جزء منها قاللها انو قابلتيه من قبل ...على قد ما حاولت تتذكر وين شافتو ما قدرتش
أما درك تذكراتو نفسو هو لي هددها أخ لبنى البنت لي انتحرت ...غمضت عيونها بوجيعة كي تذكرتها مستحيل كانت راح تنساها اول مرة تجرح عبد بالهدرة مع انو مكانتش قاصدة الهدرة هاذيك لي قالتهالها فلحظة غضب أما ما تنكرش انو كانت تتنمر عليها قبل الحادثة بشهور ...و آخر كلام قالتهولها كانت آخر مرة تشوف وجهها فيها ...كي راجعت روحها هذاك النهار عرفت انو هي غالطة بسبة مشاكل تعيشهم مع عايلتها اختارت لبنى حتى ترجعها تسليتها و تنسى شوية ...تنمرت على شكلها و تصرفاتها و كلشي أما كي ندمت كان الوقت فات ..كي طلع الصباح كلشي خلاص و ذنب البنت هاذيك لسق في رقبتها مع انو حتى واحد ما يعرف سبب موتها أما حملت روحها الذنب و خوها ما قصرش كي حل هددها تم عرفت انو هي مذنبة ...بسبة كلام يجرح ...تدمرت حياة بنت ...حست غصة خانقتها في حلقها ...حطت يدها على رقبتها تجبد فالنفس و الدموع متحجرين فجفونها
...رجعت الصورة فالدرج و حلت الباب
قابلها بدر واقف يخزر من زجاج الشباك غايس...زمت شفافها و مشات قربت لعندو تحكي
شمس: مسيو بدر
تلفتلها عاقد حواجبو و نظرة عيونو باردة
بدر: أنعم مدام العمراني صرتي احسن درك؟؟ ممكن توقعي العقد درك لأنو عندي اجتماع بعدها
شمس: الحقيقة بطلت
بدر: كيفاه بطلتي ؟؟
شمس: سامحني اما بعدما خممت مليح تراجعت على قراري ..
بلا ما تزيد كلمة ثانية ..دارت هزت ساكها و خرجت
كبس بدر على قبضة يدو يلعن فيها بين شفافو
فجأة وساعو عيونو كي تفكر بلي نسى صورتو هو و لبنى فدرج الحمام
زم شفافو بغيض و راح يجري ...دخل و حل الدرج ...هز الصورة يشوف فيها بوجيعة
كبس على شفافو و غمض عيونو يهدي في روحو
بدر: أكيد شافتها ...يلعن ####
هز يدو ضربها على المراية بغل حتى تشققت و سالت يدو بالدم
..رجع لمكتبو و هز تلفونو يخربش فيه
بدر: راح نرجع حياتك جهنم استناي عليا
كي لقى الرقم لي كان يقلب عليه ...تبسم بخبث و جاء يعيطلو ...تحل الباب و هو هز راسو مستغرب
بدر: واش راكي ديري هنا؟
قربت رؤيا منو عيونها حمر ..كابسة على ساكها بقوة
رؤيا: انت واحد اناني و كذاب ...انت دمرتلي حياتي و ولدي بسبتك مات كي ولدتو
هز كتافو يحكي باستهزاء
بدر: و انا واش دخلني اتهاردي اصلا انتي ما تستاهليش تكوني أم..درك طيري و### منا تفضلي قبل ما نستدعي الأمن يرموك برا...اخرجي بكرامتك احسن
تبسمتلو بمرارة في حلقها
رؤيا: أكيد راح نخرج أما قبل راح نديك معايا
قلب عيونو بفدة و هز سماعة هاتف المكتب راح يتصل بالأمن أنا كلامها وقفو ...
رؤيا: عرفت علاه لبنى انتحرت ...ما انتحرتش بسبة التنمر
أنت تقرأ
♠️ كبريائي يتحدى غرورك ♠️ من تأليفي Macilia ch
عاطفية#كبريائي_يتحدى_غرورك 《مكتملة》 القصة درامية من الواقع المعاش تجمع بين مطلقة و محابسي معاناتهم لزوج ..عنادهم ...كبريائهم ...غرورهم ...نظرة المجتمع ليهم و بزاف أحداث راح نكتشفوهم مع بعض ...مزيج بين التشويق و الإثارة و الرومانسية . (باللهجة الجزائري...
