⁦♠️⁩ كبريائي يتحدى غرورك ⁦♠️⁩ من تأليفي Macilia ch

♠️ الحلقة 27 ♠️

♠️⁩ #كبريائي_يتحدى_غرورك  ⁦♠️⁩
🔱 من تأليفي macilia ch 🔱
الحلقة 27:

فاقت شمس من المخدر و حلت عيونها بشوية ...حاسة جفونها ثقال و بدنها يوجع فيها ...سندت يديها على السرير و تقعدت عليه بشوية ....بالوقت دخلت الممرضة تتطمن على حالها لقاتها فايقة...مشات قاست ضغطها
حمدالله على سلامتك مدام ...
هزتلها راسها تحكي بشوية
شمس: الله يسلمك ...راجلي وينو
الحقيقة هو ...
سكتت كي تحل الباب و دخل حيدر منو
وجههو تعبان
قرب حيدر لعندها و جبد الكرسي قعد
خرجت الممرضة و خلاتهم وحدهم
شمس أول ما شافتو تبسمت وجهها اصفر
هارب منو الدم ...شفافها شايحين و عيونها مذبالين ...هز يدو بعدلها خصلات شعرها لي كانت طايحة على وجهها ...طبس باسها من راسها و جبد روحو يحكي
حيدر: كيفاه حاسة روحك درك احسن؟؟
حكات بصوت ضعيف يا دوب يتسمع
شمس: ايه احسن أما حاسة بدوخة
حيدر: هذا من تأثير المخدر يا روحي
شمس: ايه يمكن
حيدر: راح نروح نوقع على إجراءات تخريجك و نرجع و نمشو بعدها للدار عندي شي مهم لازم نحكيهولك
شمس: اوكي

رؤيا: عرفت علاه لبنى انتحرت ...ما انتحرتش بسبة التنمر
تسمر بدر فبلاصتو يصيح
بدر: برا طيري برااا
قربت منو تتمشى بخطوات ثقال و يدها في ساكها
تبع بعيونو كل تحركاتها يستنى يعرف لوين حابة توصل
وقفت على بعد خطوات قصيرة منو تحكي باستهزاء و نقمة فنفس الوقت
رؤيا: لبنى ما انتحرتش كانت حادثة ...زلقت رجلها و طاحت و انت كنت معاها و كلشي جاز بسرعة و ما قدرتش تنقذها و آخر كلام دار بيناتكم كان شمس ...
تبسم باستهزاء و صفق بيديه
بدر: واو نهنيك لقيتي وقت حتى تخترعي سيناريو حتى توثقي الدراما تاعك
رؤيا: لزوج نعرفو انو الكلام لي قلتو صح ...مكانش صعب نلقى طبيبك النفسي و نتسلل لمكتبو و نقلب على ملفك و نقراو
غمزاتو بطرف عينها و تبسمت بانتصار
لز على سنانو و ثبت عينو فعينها
رؤيا : علاه ساكت ؟؟ كلشي كان كذبة لعبت عليا و رديتني مسخرة و انا امنتك
بدر: تستاهلي حتى واحد ما ضربك على يدك و قالك اعملي أي شي نقولهولك
رؤيا: لأني حبيتك يا حيوان
قلب عيونو فادد
بدر: ايه منبعد ؟؟ لقيتها تسلية لروحي
رؤيا: تسلية مش هك حياة الناس تسلية عندك حتى تحاول تنسى موت اختك قدام عينيك رديت حياة الناس تسلية تتسلى بيها و تخرب فحياتهم حتى تتسلى ...حتى تنسى وجيعتك وجعت ناس ثانية ما عندهاش ذنب
بدر: كملتي محاضرتك ...#### براااا
صاح عليها بقوة حتى حمارو عينيه
تبسمت بخيبة و بوجيعة
رؤيا: اكيد راح نروح أما قبل راح ناخذ روحك و ننتقم لكلشي عملتو فيا لحد اليوم و نخلص الناس من شرك مريض نفسي بسيكوبات
طلق ضحكة عالية تعاود صداها فكل المكتب
طلع حاجبو يحكي باستهزاء
بدر: وريني كيفاه؟؟
بلا ما تزيد لحظة زيادة ...جبدت المسدس لي كان فصاكها و وجهاتو جيهتو
وساعو عيونو و تسمر فبلاصتو ...الدم جمد في عروقو ...استهزأ بيها و قلل من قيمتها
مكانش متوقع انو راح تتجرأ و لا تتشجع تعمل شي متهور كيما هذا
بدر: المسدس مش لعبة نزليه
لمعت عيونها بخبث و تبدلت نظرتها
رؤيا: نعرف مش لعبة يا روحي
ضغطت على زر الامان و بلا ما تضيع وقت ضغطت على الزناد
اخترقوا خمس رصاصات بدنو ...طاح على الأرض جثة هامدة ...عيونو مفتوحين على وسعهم و دم خارج من فمو ...
نزلت دمعة سخونة على خدها تحكي بقهر
رؤيا: هاذي هي نتيجة أعمالك كان لازم واحد يوقفك عند حدك
سمعت رؤيا صوت خطوات يقربو من مكتب بدر ...
تبسمت بوجيعة و سكرت عيونها ...حطت المسدس على راسها و ضغطت على الزناد ...