♠️ #كبريائي_يتحدى_غرورك ♠️
🔱 من تأليفي macilia ch 🔱
الحلقة 28:
رمشت شمس عيونها مصدومة مرات ورا بعض تستوعب فالشي لي تسمع فيه ...
كبست على يدها لي فوق الفوتاي و زمت شفافها تمنع في دموعها انو ينزلو
شمس: بهاذ السرعة ؟؟ و سلوى لي صورت معاك اعلان الروج
حيدر: ايه
ضحكت باستهزاء ضحكة مخلطة بقهرة
شمس: يعني أنك ما لقات غير هي ؟؟
حيدر: سامحيني لأني
تنفضت من بلاصتها و وقفت
شمس: يكفي حيدر يكفي صح قابلة أما ما نسحقهاش تعيش معايا فنفس السقف قول عليا غيرانة أنانية متكبرة مغرورة لي حبيت ...
سكتت صدرها طالع هابط من الغش ...دموعها حابسين على طرف جفونها
قرب منها و جبدها لعندو و ضمها
حيدر: مستحيل نجيبها تسكن هنا كوني واثقة من هاذ الشي
بعدت منو و مشات و خلاتو بلا ما تحكي أي كلمة
تنهد و عدا يدو على شعرو معصب قريب يقلعو
بعد يومين ...واقف برا الدار يستنى فيماه و باباه يخرجو حتى يروحو ...قلبو مش مهنيه يومين و شمس ساكتة إذا ما حكاش معاها ما تحكيش ...تنهد و شيع عيونو يخزر فتاقة شمس ...و تبسم بحسرة
هز صبعو يحكي بنفاذ صبر
عامر: و يا زهرة نلقاك عندك يد فالموضوع الا ما نطلقك
بلعت ريقها ...وجهها جامد من أي تعبير أما داخلها يشطح من الخوف
زهرة: الولد قدامك قالك هاذي رغبتي واش تحب كثر
عامر: اسكتي ما تسمعينيش حسك نعرفك و نعرف خدايمك نتاكد برك بعدها ساهل امشي درك قدامي
سكتت و مشات ترمرم بين شفافها و هو لحقها وجهو مكشر و مقلوب
قاعدة فوسطهم هايمة ...والديها يتعاركو و هي ماشي سامعة بيهم بعد ما خرج حيدر جاو والديها لعندها بعدما سمعو من زهرة انو حيدر راح يتزوج و يجيب ضرة لشمس
نادية: شوف حالة بنتك وين وصلت ..هذا هو الراجل لي عاديت بنتك بسبتو هذا هو لي قلت عليه يناسبها و راح يصونها ...رانا شفناه حمدالله بعد اسبوع على زواجهم راح يخطب و يجيبلها ضرة
سالم: يكفي نعرف واش راح ندير مع انو ما دخلتليش لراسي مراحش نخلي شمس تزيد نهار واحد معاه
شمس: أنا قلتلو يتزوج
دارو لعندها لزوج مصدومين
نادية: واش؟؟
سالم: واش؟؟
خذات نفس طويل و شافت فيهم تحكي
شمس: أنا اصريت عليه يعاود الزواج ...عاجلا و لا اجلا كان راح يعاود الزواج و انا سهلت عليه من حقو يجيب ولاد و انا ما نقدرش نحرمو من هاذ الشي
نادية: حابة تخلينا نأمنو انو انتي موافقة على هاذ الشي؟؟
هزت كتافها
شمس: ايه
نادية: مستحيل نصدق خليني نفكرك علاه طلقتي من راجلك الاول مش لانو كان حاب يتزوج عليك و يجيبلك ضرة و درك حابة تقنعينا انو انتي موافقة على هاذ الشي
شمس: ايه موافقة إدريس و حيدر ما يتشابهوش ما تقارنيش هذاك الرخيس بحيدر ...ما يجيش في ضفرو
شمس: امي ما تنسايش انو إذا ما وافقتش حيدر ما يقدرش يتزوج لازم توقيعي بلي قابلة يتزوج عليا مش هك؟؟
نادية: مهما قلتي مش حابة تدخل لراسي
سالم: خلاص يا مرا قاتلك هي موافقة و عندها حق ...قرارها و هي حرة فيه
نادية: قرارها ياك؟؟ انت لي زوجتها بيه و اصريت عليه شوف النتيجة درك
قعدو يتعاركو و شمس فادة في وسطهم راسها يوجع فيها و هوما حلفو لا يسكتو
قلبت عيونها و ناضت مشات لشومبرتها و غلقت الباب ...
أنت تقرأ
♠️ كبريائي يتحدى غرورك ♠️ من تأليفي Macilia ch
عاطفية#كبريائي_يتحدى_غرورك 《مكتملة》 القصة درامية من الواقع المعاش تجمع بين مطلقة و محابسي معاناتهم لزوج ..عنادهم ...كبريائهم ...غرورهم ...نظرة المجتمع ليهم و بزاف أحداث راح نكتشفوهم مع بعض ...مزيج بين التشويق و الإثارة و الرومانسية . (باللهجة الجزائري...
