حب داخل الحرم الجامعي

البارت الثاني

حب داخل الحرم الجامعي

البارت الثاني
هند الصالحي

لا تفتح كتابي وتقره باوراقه
انصحك لو قريته تحفظ السر
صحيح اوراقه حلوه امرتبه اهواي
وبيها اشياء حلوه من زمن مر
بس اقره بصمت واحفظ التقراه
تلكه اشياء لا علبال تخطر
زمن جدا صعب بس احنه سايرناه
وغصبا على الريح السفن تعبر
قصص اشكال موجوده وحكايات
بيها الي تحزنك واكو بيها تسر
وما مقصود اهيج بيك الجروح
انته اتقصدت باوراقي تحفر
....................................................

رؤى: من عرفت اسم الشركة المسؤوله عن توفير الاجهزة الالكترونية لمدرستنا الاهليه مااعرف ليش حسيت لاسمها علاقه بينا عفت خالتي ورحت للانترنيت حاولت الگي اي دليل يساعدني اعرف شي عن صاحبها ماعرفت.. الي عرفته مدير الشركة او بالاصح مدير فرع بغداد اسمه صبار الزين.... اممم لحظة صبار الزين يعني اله علاقه بجسار الزين بس ياترى اخوه لو اقرباءه فماانتظرت راسا دخلت لصفحته ودزيتله طلب صداقة.. نشوف شوكت يوافق..

الخالة؛ رؤى وين رحتي

رؤى: اي خاله هياتني.. لحظة

الخالة؛ شدتسوين ٢٤ ساعة راسج بالابتوب

رؤى؛ خالة شغل شغل اني السنة اتخرج واكيد يطلبون مشروع تخرج ومن هسة احضر نفسي

الخالة؛ دعوفي الي بيدج جدج خابر يگول راح يجونه ضيوف من اصدقاءه بسفارات دولتين ثلاثة.. ومااعرف عددهم بالضبط

رؤى؛ وشتردين خالة اطبخ لو انظف.. هو دلفري ادزين وخلص

الخالة؛ يا بنتي دزيت بس جدو بلغني زوجاتهم معاهم فلازم نستقبلهم

رؤى؛ خالة والله عندي شغل هواي هي مال استقبال.. جدو مايجوز من سوالفه.. دتعالي اشوفج شي على اللابتوب

الخالة ؛ انت تعرفين مااريد اي شي يربطني بالتكنلوجية والحاسبات

رؤى؛ خاله الى متى تبقين هيج يا حبيبتي.. عمرج صار بال الثلاثينات وانت باقيه على ذكراه لا زواجج الي استمر  لا من تاخذين خطوه وتروحين توضحيله.. ١٠ سنوات وانت كل همج انه تشيلين مسؤوليتنا وباعده نفسج عن الدنيا حتى دكتوراه بالحاسبات اخذتي ولا تعينتي ولا تستخدميها.. يعني من توقفين حياتي راح تنسين الماضي

الخالة؛ شوفي اني بيوم من الايام كنت اتنفسه وگلبي يدگ بوجوده من فرقتنا الاقدار لا الگلب دگ ولا دااتنفس بحريه

رؤى؛ يعني هسة هو هم هيج عايش مثل الميت لفراگج.. خالة اني بيوم خسرت امي وابوية وانتو الي باقيلي حتى عمامي مايسالون عني.. مااريد اخسرج

الخالة: تعاي بحضني تعاي انت الشي الوحيد الحلو بهاي الدنيا

رؤى؛ احلى خالة اني اموت عليج ومن تحجين هيج على فارس الاحلام اغار