حب داخل الحرم الجامعي

تكملة البارت ١٨

حب داخل الحرم الجامعي
تكمله البارت ١٨
....................
جسار: بعد مدة طويلة من الكر والفر ويه سارا اليوم بالصدفة شفتها لوحدها بدون العسكري المرافق لها بس هي وصديقاتها فبوقتها اتخذت قراري وبسرعه مشيت وجريتها من ذراعها واخذتها ويايه للمكتبة

سارا؛ كانت جدا صعبة عليه لحظة الرجوع للجامعة شلون راح اشوفه شلون حلتقي بيه شلون افسر له خطوبتي وابد ماعندي نية احجي تهديد سالم الي وسجن جسار لان نطقي للحقيقة راح  يفتح نار جهنم على الكل والخاسر الوحيد جسار... فأني اختاريت انه اخسره  احسن مايخسر نفسه... فمن داومت كنت اتعمد التأخير حتى مااشوفه وابلغ السايق يجي من وكت نجحت انه اتخفه منه بس للأسف بيوم شافني بموقف ماانحسد عليه شافني بيوم اني شخصيا تفاجأة بجيه سالم للجامعة ودخل للصف وسأل عني وداخل للعميد ومعرف نفسه وانه خطيبي وابن عمي... واخذلي رخصة ولزم ايدي وطلعنا.. مااعرف ليش ماعارضت ولا تنرفزت كنت هادية جدا.. يمكن ردت استغل هذا الشي حتى جسار يكرهني وبقينا بهل وضع ايام ومن اشوفه اخفي نفسي وبيوم كان عندي أمتحان وكملت وطلعت ويه البنات وماحسيت الا انسحبت قوي من ايدي باوعت جسار جرني وراه للمكتبة وهنا صدگ عصبني وكانت فرصة الي حتى انهي كل شي

شبيك تخبلت شنو معنى تصرفك هذا

جسار: اني الي اريد اعرف معنى تصرفاتج شنو.. ليش شنو الي تغير

سارا؛ شنو ليش... ليش هو جان اكو شي وتغير...

جسار؛ سارا باعي عليه. جاوبي ليش تتجنبيني لج اني جسار لو نسيتي.. جسار الي  تگولين من اشوفك يبدي يومي شغيرج ولج

سارا؛ جسار اني الي ظروفي وانت مو من حقك تحاسبني.. وبصفتك شنو تحاسبني ها  گولي شنو الي بينا حتى تحاسبني

جسار: الي بينا نظرات عيون ووعد ودقات گلب ولهفة وحب حجتها الگلوب قبل اللسان..

سارا: شوف جسار اني ما وعدتك بشي ولا بيوم گتلك احبك.. انت صح زميلي وزميل مقرب بس ماينطيك الحق انك تتهجم عليه وتسحبني وراك مثل الطفلة وتخليني فرجة للكل.. افرض وصل الخبر لخطيبي شنو يكون موقفي

جسار: اهنا من سمعتها گالت خطيبي. واني اسبوعين اكل قليل نوم قليل جگاير وعصبية حسيت توازني اختل بس مابينت مو اني الأضعف. بس خزرتها وهي فهمت شريد اگول

سارا: ليش هيج تباوع اي اني انخطبت شوف  هاي الحلقة.. وخطيبي ابن عمي ونقيب بالشرطة وحيترقه الشهر الجاي...

جسار: ليش

سارا: جسار شنو ليش شتريد تعرف ليش نخطبت لابن عمي... اولا هم ابن عمي ثانية المنصب الي هو بيه ومستواه المادي من مستوانا 

جسار: واني مافكرتي بيه..

سارل؛ (هنا ردت اقسى عليه بالكلام حتى يفقد الامل مني خلص) طبعا فكرت بس وصلت لنتيجة انه اني مااگدر اتأقلم ويه حبك او اقبله.. اني بنية من يوم يومي مولودة بعز وغنى ومستوى أجتماعي مااگدر اعيش ببيئتكم.. شوف الحلقة والمحبس الي اني لابستهم تگدر تگلي اذا قبلت بيك شكم سنة يله تشتريهم.. ولان شفت حياتكم وعيشتكم اني اختاريت الي يگدر يوفرلي العيشة الي اريدها.. وهم ارجع واذكرك اني ماوعتك بشي اني تعاملت وياك كزميل وصديق ومو مشكلتي اذا فهمتني غلط واذا على التدريس الي درستني اياه فاني عرضت عليك فلوس انت ماقبلت

جسار: (من سمعت كلامها صابني الذهول هاي شداتحجي شتخربط معقولة اني جنت غشيم وماشفت عيوبها وماحسيت على نفسي الا ظربتها براشدي قوي وطردتها)  كافي كافي امشي طلعي بره وبعد اذا شفتج قريب المكتبة اكسرها لرجلج... ومااريد اشوف وجهج للموت.. ودفعتها وطلعتها برة.. وهنا خلصت قوه تحملي وانهاريت

سارا؛؛ طلعت من المكتبة واني اردد اسفة حبيبي اسفة يا گلب وروح سارا انت بس مجبورة اقسى عليك لمصلحتك مشيت  وعيوني ماوگفت دمع واني اصلا جنت متواعده ويه علا تجيني حتى اروح لبيتهم.. وشفتها من بعيد ادور عليه ورحت عليه ركض.. علا هي الوحيدة الي تمتص حزني بكل الدنيا

علا: سارا حبيبتي شبيج

سارا: عفية خلي نطلع منا بعد مااتحمل

علا؛ كافي بجي يمعودة العالم كله تباوع علينا.. امشي نروح لبيتنا امشي.

سارا: امشي يله

علا : سارا خابرتني ورادت اروح لها للكليه واني رحت لان حسيت دفاعاتها راح تنهار گدام جسار. وتوقعي صحيح.. شفتها طالعة من المكتبة والدموع عشرة عشرة والوجه احمر اذا صح توقعي فاكيد مضروبة راشدي.. وهاي لازم يتحاسب عليه جسار... وكانت منهارة لدرجة واخذتها لبيتنا....

جسار ؛ شفت عمي ايوب شفت..

ايوب: لا حول ولا قوة الا بالله.. يا ابني انت رجال وزلمة قوي عوفك منها..اكيد عدها ظروف او شي خلاها تقبل.. وبكل الحالات هي الخسرانه

جسار: عمي ايوب انت تصدگ هاي سارا

ايوب؛ الصراحة لا

جسار: واني لازم اعرف ليش تغيرت.. ليش
.............    .......
صبار؛ هلا بالعضيد حمد الله على السلامة

جسار: من شوكت تعرف انه رؤى بنت اخت سارا.. وليش مابلغتني......

صبار: اهدى بس واسمعني ولا تعصب

جسار: راح اسمعك واذا عذرك سخيف مثل افكارك محد يخلصك مني

صبار: شوف اني صار اسبوعين من عرفت هي منو والصراحة مانطاني گلبي ابلغك وانت تطردها

جسار: گلبك...  اممم.. گتلي.. صبار اياك ثم اياك تگلي انت حبيت بنت فياض الناصر اطيح حظك والله سمعت

صبار: لا لا ماكو شي بينا... المهم اهدى اريد احجي وياك بشي مهم عرفته من رؤى اليوم.. راح تنصدم

جسار: احجي هو يوم الصدمات..

صبار؛ مبدئيا لازم تعرف سارا بالعراق وهي مدير مؤسسة الناصر..  وسارا ارملة حاليا..........