حب داخل الحرم الجامعي

تكملة البارت ٢٦

تكملة البارت ٢٦
حب داخل الحرم الجامعي

..............................
عبود الناصر؛ بعد الاحداث الي صارت اني عرفت استغل قتل بنتي وزوجها ونسيبي الثاني لصالحي واستلمت منصب سفير بأحدى الدول الأوربية وصفيت شغلات الورث والراتب ويه عمامي اخذت عائلتي وياية وبقى منير مسؤول عن كل الأملاك الموجودة بالعراق واهم شي مكتب المحاماة لان هو هم محامي.. وصلنا للسفارة واستلمت مكتبي ومن مالي الخاص اشتريت بيت مرتب لاهلي لكن كل حلو مايكمل.. بعد اسبوع سارا فاتحتني بموضوع

سارا: بابا عندي موضوع اريد احجي وياك بي

عبود؛ احجي بنتي گولي

سارا؛ بابا ياريت تسألي عن دكتور نفسي هنا علمود بطة ودكتور اعصاب علمود ماما

عبود؛ بطة وعرفنا صدمة الي صار امج ليش

سارا؛ بابا امي ضغطها ما داينزل.. ولاحظت داتنسى اشياء تحدث بحياتنا اليومية.. داتلح على رسل متصورة بعدها عايشه

عبود؛ وهاي من شوكت الحجي وليش اني مااعرف.. سارا اسمعي زين احنا هنا بحياه جديدة.. رجعي مثل الاول وانسي.. امج وبنت اختج يحتاجون تكونين قوية علمودهم.. واني راح اسندج واي شي تطلبي يصير.. ويا بنتي كافي انزعي هذا الاسود

سارا؛ وشنو الفرق اذا لبست اسود او الالوان بابا اني داخلي صار اسود... ولا تهتم حياتي منا وجاي لماما وبطة... بس لازم نعرضهم  على دكتور زين

عبود؛ تدللين بابا... بداخلي تندمت حيل لان بسبب عصبيتي تأذن بناتي وقررت اعوض سارا عن كل شي وحتى لو رادت تتزوج هذا الولد الي يحبها... سارا عافتني و راحت لغرفتها وثاني يوم سألت عن مستشفى متخصص واخذنا ام منير وبطة للعلاج واستمر علاجهم سنتين سارا تعبت وياهم جسديا ونفسيا.. وكل مااشوفها داخلي يتألم ومااعرف شلون ارجع الضحكة والفرحة لبنتي

سارا؛ بعد ماعرضنا ماما وبطة على دكاترة متخصصين رؤى تعالجت الحمد الله بعد سنة وقدمت لها بمدرسة وبدت حياة جديدة لها وشويه شويه تعودت بس الي تعبني كان أمي اتضح انه الضغط من دايرتفع ديسووي وياه تجلطات  بالدماغ بس خفيف ومأثر على الجزء المسؤول عن الذاكرة.. او هو بداية زهايمر.. تعبت جدا ثلاث سنين امي تذبل يوم عن يوم يوم تذكر وتبقى تبجي ولحد مااسكتها تتخربط واسبوع تفقذ ذاكرتها وبعدين بده الحجي يثگل الى ان ضربتها جلطة دماغية وانشلت وصارت حياتي هي امي ومراعاتها بابا وفر ممرضة خاصة لرعايتها واني وياها وياها اكلها شربها حمامها كله اني ومن جهة رؤى وعلاجها نسيت نفسي ونسيت مشاكلي وانعزلت عن العالم حتى كنتوري صار بي لون واحد هو الاسود فقط......

عبود الناصر؛ بعد مامرت سنتين خارج العراق؛ اتصل منير

منير؛ سلام عليكم بابا شلونك

عبود؛ الحمد الله انتو شلونكم شنو الاخبار الاوضاع

منير؛ تمام وعندي لك خبر يفرحك