حب داخل الحرم الجامعي

البارت ٢٥

حب داخل الحرم الجامعي
البارت ٢٥
بعد الحب وبعد العشره نلتقي مثل الأغراب
واحدنا ما يعرف الثاني ولا كأنا كنا أحباب
ماتت لهفتنا المجنونة ما أقساه وما أقساني
أتسأل وحدي وأتألم يا ترى من فينا الجاني
..................................................
رؤى؛ بسم الله الرحمن الرحيم.. عباس منين طلعت وشلون دخلت

عباس؛ مو هذا المهم بنت خالي.. ويامن تحجين بالتلفون

رؤى؛ اعتقد هذا مو شغلك.. ماگتلي شعندك جاي
عباس؛ ابويه دزني گال عمتك سارا متخربطة والدكتور راحلهم روح انت مكاني.. لان اني اليوم اجازة جدو مسافر

رؤى؛ بعد وكت لو جاي باجر.. الدكتور جا وراح وعمة صارت زينة... مشكورة جهودكم

عباس؛ رؤى ممكن نحجي بموضوعنا بشكل متحضر

رؤى؛ شبسرعة سويته موضوعنا.. بيني وبينك ماكو موضوع

سارا؛ هلوو عباس عمتي شوكت جيت و ليش تعبت نفسك..

عباس؛ هلوو عمة تعبج راحة.. بابا جان كلش قلق عليج ودزني اسأل عليج

سارا ؛ هلا بيك عمتي تعال نگعد ليش واگف بالباب

عباس؛ والله محد گالي تفضل

سارا: تعال عمتي تعال انت ماتحتاج احد يضيفك البيت بيتك... رؤى بلغيهم يحضرون عشا خلي نتعشه اني وابن اخوية اليوم سوه

رؤى؛ ادللي خالة.. الله يديم المحبة

سارا؛ راحت رؤى وبقينا اني وعباس وقررت احجي وياه بهدوء لان اعرف كل الي ديصير هو بتحريض من مائدة والدته...

شوف عمة لا تتصور اني مااحبكم . اذا مسألة دم فانتو اقرب الي من رؤى لان انتو ولد اخوية.. انتو الباقين حتى تحافظون على اسم عائلتنا وبنفس الوقت هي بنت اختي وبنت خالكم.. بس مسألة الزواج مايصير بالغصب الزمن غير الزمن احنا ب٢٠١٩ يا ابني..

عباس؛ بس اني احبها عمه وانتو كلكم تعرفون واني أولى

سارا؛ عمتي حبيبي انت ماتحبها انت هيج تتخيل من ورا حجي امك الله يسلمها.. وماكو شي اسمه اولى لا تعيد الي سواه عمك بيه من جبر وغصب والنتيجة شنو شهر تزوجت وهو مات وعافني بالف عله لا گدرت اعيش مستقبلي ولا گدرت اكون حياه الي.. لا تكرر نفس المأساه يعني لو تاركني اعيش حياتي ويه الانسان الي اختاريته كان ممكن الوضع يختلف

عباس؛ قصدج اكو احد بحياه رؤى

سارا؛ بحد علمي ماكو بس البنيةتشوفك ابن خال وبس.. لا تضغط عليها اكثر حتى لا تخسرون اثنينكم... وبعدها حضرونا العشا تعشينا وضحكنا وحسيت تقربت شويه من المسافات الي امه خلتها بينا كل عقلها تنتقم او تاخذ حيف اخوته.. لعد اختي منو ياخذ حيفها

..............
منير؛ سارا كملتي لازم اليوم تدلين بأفادتج والحماية هم يحققون وياهم واني اخذ اذن ادخل التحقيق
سارا؛ اي هياتني كملت.. بس انتظر علا تجي يم رؤى وماما