حب داخل الحرم الجامعي

البارت ٢٦

حب داخل الحرم الجامعي
البارت ٢٦

ستبقى الجرح الذي كل مازداد شفاءه من الخارج زاد عمق المه داخلي
.................

جسار: بعد الازمة النفسية الي تعرضتلها والصدمة من تصرفات سارا ودخولي المستشفى.. ابد ماكان قصدي انتحر ومااعرف شلون وصلت لهذا الحال من ذاك الوقت ومن بعد ماترقن قيدي بسبب الغيابات
وبعدها ركزت على الشغل وبس واتخذت قرار خلاص المكان الي بي سارا مااتواجد بي نهائيا.. من ٢٠٠٤ اني اشتغل والفلوس اخلي منها على جهة بدون الاهل مايعرفون وطلعت جواز وثبتت صبار بمكاني بمحل حجي صالح وعلمته الشغل لحد سنة ٢٠٠٦ يله گدرت اجمع مبلغ اطلع بي لسوريا او للأردن ومناك اطلع للخارج تهريب او اسجل بمنظمة الUN وبعد مارتبت أموري رحت حجزت لسوريا ومن اوصل اقرر الخطوة الي بعدها.. ومن حجزت وبذاك الوقت كان اكو بر واكو جو.. والبر ارخص وتحددت سفرتي بعد اسبوع وكان لازم افاتح اهلي وشايل هم الوالدة شلون راح تتقبل سفري وشلون راح اقنعها ولهذا قبل السفر بيومين قررت اسويلهم گعدة خاصة وجمعتهم لان اكو شغلة ثانية مو بس سفري

صبار؛ اليوم جسار مدللنا وكباب ومشويات اكو أن بالموضوع
جسار؛هو اكو انتين مو بس وحدة بس خلي ناكل وبعدين نحجي.. وبعد ماخلصنا اكل وتونسنا ضحك وسوالف الوالدة الحلوة احاولت اخزن بدماغي وگلبي صورهم وصوتهم وخاصة الوالده الي مااعرف شگد راح اغيب عنها وياترى راح اشوفها مرة ثانية لو لا...
رائدة؛ ها جسور وين صافن.

جسار؛ لا حبيبتي بس اول موضوع راح ابدي بي هو ابراهيم ابن خالتج  اليوم خابرني وگال نريد نجي نزوركم واتوقع يريد يخطبها لأنس ابنه..

والدة جسار؛ والله يمه ابراهيم خوش ابراهيم وولده ذهب اذا اختك ماعدها مانع انطي وانت مغمض يمه

جسار؛ اعرف حجية وباجر ان شاء الله يجون واذا رائدة ماعدها اعتراض نقره الفاتحة ونعقد لهم وربنا يسهل

الحجية؛ وانت يمه ما الله يهديك واخطبلك ابتسام اخت انس.. شو حلوة ومدرسة ومنا وبينا..

جسار؛ حجية اني ماافكر بموضوع الزواج شلته نهائي من فكري... اريد احقق احلامي وبعدين افكر

صبار؛ وشنو احلامك استاذ

جسار؛ اشتغل واكون فلوس وشركة للالكترونيات خاصة بيه

صبار؛ وهاي شلون تكونها بابا احنا بالعراق الناس ماتعرف راسها من رجليها.. ما مأمنه اذا تطلع من البيت ترجع لو لا

جسار؛ ولهذا اني اتخذت قرار واتمنى الكل يساندني وتفهموني وتساعدوني

ام جسار: يومة جسار احجي وگعت گلبي

جسار؛ ماكو شي حجية.. بس اني قررت اسافر بره العراق واشتغل واول مااجمع فلوس زينة ارجع للعراق

ام جسار؛ يمة شتگول انت.. لك جسار تعوفنا واسافر علمود مرة.. الف مرة اخلي جوه رجليك.. ليش يمة تريدني اموت