ليته لم يولد

البارت التاسع والثلاثون

... قراءة ممتعة ...
ليته لم يولد. البارت التاسع والثلاثون
بقلم. دانية رسول

عنوان الحلقة ( عاق )

طلاقنا كان تقريبا بنهاية 2019 بفترة المظاهرات لمن جنت اشوف الشباب الي بعمر الورد يموتون اكول بمراد ولا بيهم

قتلوهم لانهم رادوا وطن هذا جان ذنبهم جردوا احلامهم وامنياتهم وطموحاتهم بس لهذا السبب
تركوا عوائلهم زوجاتهم امهاتهم وسلموا نفسهم للموت لهذا الوطن

دخلنا ب 2020 ببدايته بشهر الواحد تقريبا تزوج حسن اخويه من نوال الي تكون بنت سهير

بوكتها فرحنا وامي جانت فرحانة واخيرا ابنها رح يتزوج عبالها رح يستعدل مثلا

بوكتها سوينا العرس بالقاعة وامي كشخت على اخر حباية وسرور والكل واني هم لبست فستان ماروني طويل وبينصل جنت من النوع الي يحب هيج

موديلات و كلش تعجبني البسيطة وكعب عالي جانت الحفلة كلش حلوة وتونسنا بيها وامي هم جانت كلش فرحانة بيها اما سرور لوما مستحية من زوجها تاخد الساحة كلها الها

ببداية زواجهم جان الوضع هادي وتمام وعال العال

لكن بعدها بدا يتحول كلشي وكل الامور تغيرت لكن كانت تدريجياً تتغير

كام يصير اكو تغيرات

بدات نوال تروح لاهلها هواي وتبقى يمهم نهاية الاسبوع احنا عادي  مجان عدنه مشكلة بالموضوع
بس بعدها كامت تاخد اخويه وياها يبقون العطل ويرجعون ومرات اكثر

من اجت كورونا الي دمرتنا وكعدتنا بالبيت مرجعت الدوام امي كالت هي الدنيا مكلوبة من ورى كورونا النوب انتي تروحين الها برجليج اكعدي واسكتي

وهاي اني بعد كعدت وسكتت مرت الايام حسن ونوال صاروا يقضون الوكت اكثر شي ببيت اهلها خصوصا من صار الدوام 50٪؜ صار تقريبا اربع ايام يبقون ببيت اهلها

امي سكتت شنو تحجي برغم انها ضايجة من الوضع وحتى اني يعني شنو رايحين يم اهلها يباتون بله هي اي هو اخويه شعنده لوما هم اصلا بيتهم مساحته قليلة يعني يادوب مكفي اهلها وهم نفرين زيادة فوكاها شطلعت هاي

بعدين صارت مرته يم اهلها وهو يجي كم يوم بس ياكل يشرب ينام لا شغلة ولا عملة بس هي نوال مستمرة بدوامها عادي اصلا ماعرف شلون قبلت باخويه وحده عدها وظيفة وراتب ومرتاحة تاخذ واحد لا شغلة ولا مشغلة ويشرب ومشاكل اربعة عشرية ساعة وحتى المنطقة يسمونه بيت ابو عركة يوميا يتعارك ويه اهلي ومصايبه ما تخلص

مراد من بعد الطلاق لا شفته ولا شافني وهاي حياتي الي وياه صارت اسوء ذكرى بحياتي واتمنى امسحها وانساها بس للاسف رح تبقى مطبوعة بدماغي رح تبقى هاي الذكرى السيئة موجودة اتمنى لو اكدر انسى كلشي صحيح النسيان نعمة بس اني اعرف مرح انسى ابدا لان كله ترك بيه اثر كبير كبير