💐صـــيــدُ آرتِــــمـــيــس 💐(كرونيك باللهجة التونسية: مكتملة )

🌹الفصل الخامس " انوثة آرتميس "🌹

🌲الحلقة 5
✴🐬✴🐬✴

نزل ع الفران حبس الكرهبة  قدام المركز ، خزر بشك وريبة ليلي قاعدة ومتبندرة بكل اريحية ع الكراسي التالانين...تبسمت بشر وتسوميم وهي تدور في صبع شهادتها في الهواء" هاااااه...خممت والا نكملو ايلي بديناه"

مط شفايفو وحك شعرو " اممم...نكملو ايلي بديناه ...تحب تشكي بيا فازي ..."

حركت راسها بلامبالاة " مادام كلمة سامحني توجعك وماتنجمش تقولها...يا انا يا انت ليوم"

وضحلها " ماعنديش مشكلة في كلمة سامحني ...لكن موش كان انا الغالط في هذا نعلمك ...نقول السماح خاطر مارديتش بالي وحليت عيني وماثبتش اذا طرفة روبتك عالقة والا لا ...وانت زادا ضروري تطلب السماح خاطرك كنت سبب في هذا الكل "

عوجت فمها موش عاجبها ومالت على كرسيه " نعععم ...باااابا "

قبل ماتكمل عركتها فبرا تاليفون فهمي ايلي خلاه يشاورلها بكفو باش تسكت دقيقة يشوف شكون ، مانجمتش ما تخزرش لايكرون التاليفون معاه واول مارات التصويرة شهقت فرد مرة ...هز فهمي وهو يحاول مايبين شي من اعصابو المشدودة

" هاااه سليم ...معادش نبطى شوية آخر ونوصل...لا لا لا يا ولدي تشديت شوية مع الاولاد...جاء اك ايلي اسمو يبدا بتيت؟!  ...باهي ..باهي ..."

علق وعاود تلفتلها لقاها جامدة كي قالب الثلج ...رمشة من شوافرها لا ،ثبت فيها من راسها لساقها وهو يتمتم " ياخا تحنطت والا شنوة حكايتها ؟! "

تبسمت من غير مقدمات ولانت ملامحها وتقلب وجها تقول موش هي ايلي كانت حالفة يمين ماتتفضش مشكلتهم " شو هو انا ...ماننكرش انو اتكيت على كرهبتك من غير مانشاورك ...و عطلتك الوقت هذا الكل ....." عصرت عينيها وهي تكبس عليهم وتجبر روحها باش تقول هاك الكلمة  "انا مسامحتك وطاااح راح ...هيا سلام "

حلت الباب ونڨزت خارجة ،صدمتو بعملتها ومافاق من بهتو كان وهي تضرب الباب بقوة تسكرو . .هبط بدورو وعيطلها "يا مداااام ...ساقك مجروحة ..."

جاوبتو وهي تكمل تجري " مدمواااازال ...وساقي لاباس عليـ...."

ع الكلمة ترخ بيها رجلها تجيبها مكبوبة لقدام ...جاب ربي سبقت كفوفها نزلت بيهم والا كانت جات تسف في التراب ...مانجمش ما يمشيلهاش صعبت عليه يخليها اكاكا وغاضو الحال.. حس انو قلة رجولية منو اذا سكر الباب وساق كرهبتو وكاينو ماراهاش  ...وقفها بالشوية وسألها بنبرة لينة " لاباس؟!...خليني نهزك للسبيطار "

"لا لا ...جرح عادي ...تو يبرى "

"مالا خليني نرجعك لوين كرهبتك "

دورت الحكاية في مخها لقاتها فكرة موش دونية " باهي ميسالش "

تبسم فرحان...في العادة علاقتو مع النساء تبدى رايضة وبعد تتقلب بعركة ...ومعاها هي تقلبت المشامية ...تعاركو ...وبعد لقاو رواحهم متفاهمين ...