💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل عشرون 💚 رغم كل شيء ...أحبك 💚

🍁صيد آرتميس🍁
🌹الحلقـــــــ20ـّـــّة 🌹

💚💚💚

كانت اخر جملة تسمعها منو قبل مايخليهم الزوز وراه ويخرج...ماعرفتش اذا بيها عاتبها ولامها والا يستفسر منها...قعدت واقفة وهي تخزر لمراد ايلي مقابلها يثبت فيها بشك...خزرتها لخصتلو كل شي ...لو حكات لغدوة ماكانتش تشويه قد هاك الشوية ايلي ...مع خزرتها حس انو قليل الاصل ...مايستحقش منها حتى تعاركو وتعيبو عليه...حقرتو واحتقرتو...تهمتو بلسان صامت ...و حكمت عليه انو مجرد من الانسانية والرجولية ..قرى في عيونها ظلمو وبغضو وشاف قداش غلطو كبير ومايتغفرش ...

بكل برودة اعصاب طبست على صاكها هزتو وخرجت ،جروح قلبها بارشا ومعادش تعرف اناهو فيهم ايلي يوجع اكثر ، موش الوجيعة تبكينا ...ايلي يبكينا هو انو على قد طيبتنا  نتجرحو ...كل ما وساع القلب وحب ...كل ماكبر الجرح واستفحل ...نحن في زمان القلوب الخيرة تتحاسب...تتهان ...تتذل ...وماتلقاش مكانة لخيرها ..اما نفوس الشر فتحصد كل شي الا الحساب والعقاب ...هي المحبوبة والمطلوبة ...

في كل تركينة من ضلوعو كان فمة صوت يبكي ...وسط حريقة هايلة خلت كل احساس حلو رماد....مانجمش وسط دخانو يلقى حتى ذرة متبقية من فرحتو ...ولا ثقتو ...مستغرب في روحو ...مخالط عباد قد شعر الناس ...الراجل والمرا ...وفي عمرو الناضج يلقى روحو لعبة بين صوابع مرا ...كذبة عايشها لشهور  صدقها وبنى عليها احلام العمر...عطى ماعندو ...من محبة وصبر و حنية وتكافى بالغدرة والكذب ...

زاد اكثر في صوت ااغناية واتكى على كرسيه قدام الفولون ...غمض عينو خوف من انها تدمع ...ورغم وحدو وفي الخلاء المخلي ...خاف تهبط دموعو ....خاف يبكي خاطرو حب ..كلام الغناية كان تعبير واضح وصريح على علتو الشي ايلي  زاد غرق سفينتو

" طيبة قلبي مشكلتي...دمرتلي حييااااتي ...
دمرتلي حيااااتي ..
ربعي طلعو ثعالب واني علي نيااااتي واني على نيااااتي ...
العتب مو ع الدنيا عالساكنين الفيها ...كلو يدور مصاااالح ماحدا يواسيييها "

ضاق صدرو بمحنتو وتخنق بانفاسو المحبوسة في صدرو ...حل الباب وخرج ...حاسس روحو في قبر عمال  يضيق بيه وهو موش منجم حتى يتخبط فيه...فرك شعرو بصوابعو بعصب فالت ...حكايتو معاها كانت كيف الكاس ...سكر بيه لسوايع قليلة ...وتوا فاق على واقع اقسى ملي خلاه.

____💚💚💚____

دقت السيكريتار الباب ودخلت ، حطتلو الدوسيات ايلي طلبهم واستنتو حتى كمل تاليفونو باش حكت " سي رؤوف فمة بنية لبرا شادة صحيح تحب تقابلك رغم ايلي ماعندهاش موعد "

جاوبها وهو يحل اول دوسي " ماقالتش شنوة حاجتها !؟..."

" قالت في مايخص قضية المطار ..." عقدت حواجبها تحاول تتفكر" يظهرلي ما عندناش قضية فيها مطار "