💐صـــيــدُ آرتِــــمـــيــس 💐(كرونيك باللهجة التونسية: مكتملة )

💙الفصل الثامن "زيوس او اوريون !"

🍁صيد آرتميس🍁
🌹الحلقــــ8ــــّـــّة 🌹
💚💚💚

رغم ايلي فرحت كي رجعت ووصلت لاباس ، لكن اول مارات رودينة تفكرت ايلي صارلها ...تعدتهم من غير ماتسلم ودخلت ...خلطو عليها وهي تدخل للصالة وترمي البوشات على طول يدها ، واجهتها رودينة وعينيها تمسح في كل انش من وجها  تحاول تقرى من ملامحها شنوة صارلها بالضبط.

" هاي هاي ...لاباس تتتفض علينا للا ...وشنوة الفاست ايلي في يدك ؟!...موش متاع زيوس؟! ...ياخا شبيكم وخرتو ؟!"

كان المفروض تسألها سؤال واحد لكن صبتهم الكل فرد المرة من قلى صبرها  ، هزتها اسماء وحطتها ...رشقت يدها في وسطها وبدات في العرض ايلي طريق كامل تحضر فيه

" آبون...صار ماتعرفش شبيني ..."  عوجت فمها " باهي...نقلك يالا شبيني ..."  عروق جبينها ظهرو وحمار وجها وهي تحاسب في رودينة " هذيكا عملة تعملها فيا!؟...اه...وواقفة تسأل فيا لواه وخرت ..؟! "

ضمت رودينة شفايفها لبعضهم وغطت ضحكتها بصوابعها الشي ايلي زاد شعل نار أسماء " تضحك؟! ..." خبطت اجنابها " والله انت هي اامرا وانا ايلي على مراد الله "

تأففت رحمة وهي ترجع للبي سي متاعها " اونكووور  مراااد...حاول تختار كلام اخر خالي من حروف اسمو الاربعة...كرهناااه "

اصلا ماعندهاش لا بال واسع لتخاريفها ولا للڨول ايلي شادتو للا رحمة عليها ...لكن زادا مانجمتش ماتردش عليها " مانيش نقصد في هاك السفج مراد...كلمة وتتقال ..." خزرت لرودينة " وانت انسة  رودينة ...هاو وجهي كان مازلت نتبعك ولا نتبع دبايرك "

ها المرة اسماء كانت متغششة ...بالحق منرفزة وماخذة في خاطرها وهي تقراها من عينيها ، ماحبتهاش ترقد هكاكا وحبت توضحلها " ايجا لهوني ويزي بلا ريق متاعك...انا حبيتكم تقعدو مع بعضكم شوية وتتعرفو بعيد ع الخدمة "

صاحت  اسماء" متاع اش نتعرفو بعيد ع الخدمة؟!...قلي..."

هزت رودينة اكتافها "لعل يخطف الريزو بيناتكم "

رودينة " اما ريزو واما برطابل...على اساس انا وهو اصحاب ومالازمش نفوت ها الحد...ياخا نسيت احنا شنوة خططنا ؟!...لا حب لا وذني ...نوصلوه للمنصب ايلي يحب عليه مراد...واكااااهاو... "

اعترفت رودينة بصوت واطي " بصراحة مايتفلتش "

رجتها اسماء وهي تكبس على كتفها " انبه عليك...مانيش مستعدة نلعب بمشاعر الراجل ونستغلو "

تكلمت رحمة من وراء الايكرون " انت ديجا قاعدة تستغل فيه يا حنين يا مراعي للمشاعر "

وضحتلها اسماء"ماهوش استغلال...بالاخير هو الرابح لقى شكون يدز معاه باش يطلع للبعثة ورئاسة المتحف "

قبل ماتدخل لبيتها ، عطات لكل وحدة ڨحرة ...حاسبتهم على كلامهم وموقفهم ايلي حستو تبدل وبدا شيلعب ضدها ...هوما زادا كان عندهم ها الاحساس ...اسماء ديما تقول معاهم ايه حتى ع الفينڨة لكن ها المرة  عكستهم .