💐صـــيــدُ آرتِــــمـــيــس 💐(كرونيك باللهجة التونسية: مكتملة )

💞الفصل السابع "شمس و ڨمرة "💞

🍁صيد آرتميس🍁
🌹الحلقــــ7ــــّـــّة 🌹
💚💚💚

كلامو كان فيه كلاش واضح ليها...رجف قلبها المذبوح و رعشت أطرافها ...آخرة حبها مذلة...آخرة عشقتها وجيعة...آخرة احلامها خيبة...الدنيا عطاتها سيناريو خايب بارشا واخيب ما تخيلت وما توقعت ...سليم وايلي واقف بجنبها  ماكانش فاهم قصدو مليح مشى في بالو المعنى على حرب المناصب ايلي بيناتهم ،هاكي علاه ردو كان ملغز اما مناسب
"عاد انت وفي دومان الاثار تفهم وتسمع وتعرف انو الشي اذا فات وقتو ...يغلى ...ومعادش تلقاه بسهولة وترصيلك تجري وتجري..تحفر وتنقب  باش تخلط على قطعة منو  "

ماكانش يعرف ...اما جوابو كان كافي وفي بلاصتو وشفعلها قدامو ...ڨحرلهم  مراد تلاثتهم ومانجمش يخبي كرهو و تنرفيزو ...خلاهم على بلاصتهم ودار ماشي ...تلاقى في ثنيتو مع رودينة ...عطاها ڨحرة كي وخيانها اما احر شوية وفيها وعيد قريب انو باش يبدا حربو هو زادا  ...وهي ماكانتش من العاكسين جاوبتو بنفس الخزرة وتحدتو  ..اذا ناوي ع الشر تلقاني نستنى فيك...

استناتو لين قلب منظرو ومشات للجماعة ، وقفت  قدامهم   وتقلبت ملامح  وجها فجأة  للتسوخيف و توسلت  بطريقة  بهتت اسماء وخلتها حالة فمها فيها  " اسوووم ...ياروحي ...ساامحني عندي قضية ايرجون ...ماانجمش نروح بيك "

وساعت عيون اسماء وعلى شوية خرجو من محاجرهم " وين...وين ...ماشية؟! "

"اه...اه...تو بعد نحكاو ..." غمزتها " حاجة شخصية " فيسع مازربت باش تڨطع " سي سليم ...يعيشك...خوذلها تاكسي ...في امانتك "

احتجت اسماء " يارودينة ...هاني جاية معاك  "

تملصت منهم رودينة و كملت طول في الكلوار العريض ايلي يهزها لبرا موش عاطية اهمية لصاحبتها...قعد نيكوس يبحلق في سليم واسماء يستنى في واحد يفسرلو ...وقت شافهم كل حد يتحوشم و يخبي في وجهو مانجمش مايسألش صاحبو بلغتو الام " صاحبي ..شنوة ايلي قالتو هاك للمرا باش تخليكم هكا "

فسرلو سليم " لازمني نوصل اسماء للدار بيدي...في ها الوقت صعيب تلقى تاكسي "

عجبتو نيكوس الفازة ، قوس حواجبو ومدلو كفو " اعطيني مفتاح الكرهبة  ...نهز لوازمي واوراقي..ونخليكم على راحتكم "

احتج سليم اذا ڨطع نيكوس فهو واسماء شيبقاو راس راس وهو موش باش ينجم يطاوق خاصة بعد الترهويجة متاع بكري " لا...تو نوصلك  في ثنيتي "

شد نيكوس صحيح " لا...ميسالش ..هات المفتاح  "

خزر لاسماء وبعد لنيكوس...لو جاو وحدهم كان عطاه راس نڨرو بين العينين فهمو  ...لا يعني لا ...اما اش يعمل الميت قدام غاسلو وزاد كملت بخزرات اسماء ايلي لزمو عليه يرضخ لهاك اليوناني الرمز ...مدلو مفتاح الكرهبة وهو يوصي فيه قصد يخلي الكلمات قاسين ومضغوطين بين سنونو " فيسع رجعهولي ...هز بڨاجك ماتبطاش ...حسابنا بعد "