✴❤✴
تبسم مراد بطريقة خلت سليم يعض شفايفو بتأنيب ع الموقف المزمر ايلي تحط فيه ، خزر وراه وين مازال فهمي قاعد مع المرا والظاهر انو مافماش مشاكل بيناتهم ،سألو مراد وهو يثبت لداخل لعل يشوف الحاجة ايلي شاغلة بال منافسو " شنوة سي سليم ...فمة رونديفو خايف تفلتو ...والا تثبت من بعيد اذا ضيفتك جات ..."ضحك على جنب " والا ضيفك ..."
ضحك سليم ضحكة صفراء يحب يزيد يغيضو "ضيفتي...جات ...عندي تاليفون ايرجون خرجت نعمل فيه ...." خزر للكوستيم ايلي لابسو مراد " اما انت ..ظاهر فيه الرونديفو متاعك مهم بارشا "
هندم مراد حوايجو وتفقد كارافاتو بطريقة حب يستفز بيها سليم " انا ...وبكل تواضع رونديفواتي لكل مهمة ..." غمزو " سامحني ...توا نخليك...ان شاء الله نتقابلو في التيران على قريب "
شاورلو سليم براسو باهي " ان شاء الله "
تبعو بعينيه لين دخل وبعد نفخ بقلة صبر " ماارمزو ...ماارزنو ...مااركو"
ضحك رؤوف " شنوة زيو ...زعمة هو ركيك ورزين ورمز ...والا انت برك تشوف فيه هكا "
ڨحرلو على جنب " شتقصد !؟ "
هز رؤوف اكتافو " نقصد انت متحسس منو خاطرو المنافس الاول و الاخير على منصب امين المتحف وغريمك في خرجة اليونان "
عض شفايفو بغل " رؤوووف تبداش تهز وتنفض ...ولمعلوماتك ...انا و مراد مجرد زملاء ...بيناتنا خدمة اكاهاو ...مافماش علاش نتحسس منو ...ايلي يربح فينا صحة ليه سوى في ادارة المتحف والا رئاسة بعثة اليونان ...فهمت والا نزيد نفهمك يا زكيم "
ضم رؤوف شفايفو لبعضهم وهز يديه مسلم " فاهم ...بروفيسور "
صوت فهمي وهو خارج خلى عظامو تلخلخ و حواجبو تتعقد ،خزرولو الزوز فرد الوقت لقاووه يجري في جرة المرا وهي هازة صاكها وسابقتو هاربة ،تمتم سليم من بين سنونو "شنوة المصيبة ايلي عملتها ها المرة يا فهمي "
نادالها فهمي وهو يحاول يفسرلها "يااا سنية ...والله ماني عليك هاك **** هو ايلي نطقني من جنابي "
صاحت المرا بقلة صبر "ياسيد من فضلك ابعدني "
تدخل سليم يحاول يفهم ايلي صار " شفمة ...علاش ها التنرفيز يا مدموازال"
خزرتلو بعين شاعلة " اسأل ها السيد الجالغ تو يجاوبك "
هزت فهمي وحطتو بكل محقرانية وكملت ثنيتها هاربة منو موش ناوية تتلفت وراها ولا حابة تزيد تشوف وجهو .
حرك سليم راسو وهز حواجبو يسال فيه شصار ، زفر فهمي وشاورلها " تي وحدة **** عاملتلي روحها شريفة بنت فضيلة "
أنت تقرأ
💐صـــيــدُ آرتِــــمـــيــس 💐(كرونيك باللهجة التونسية: مكتملة )
Macera★الاسم " 💐صــَيْــدُ آرتــِـمـيــس💐" ★الكاتبة "نودا" ★النوع " رومنسي ،اجتماعي ،عائلي تشويق،اثارة ... ★عدد الفصول " 23 " ★تاريخ اول نشر " 14/11/2020 " ★تاريخ آخر نشر " 26/06/2021" ★القصّة " منحوتة رسمت تاريخ كامل مليان بالمحبة ...اسطورة حب تنقشت ب...
