💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل السابع عشر 💚 💠ماذا لو اخبرتك السر ؟! 💠

🍁صيد آرتميس🍁
🌹الحلقـــــــ17ـّـــّة 🌹
💚💚💚

كل خلية منها نبهتها باش ماتتحركش من بلاصتها خاصة وهو شاعل بكلو و الغش حارقو ويادوبك مسيطر على بونيتو يمكن ياسر يفطسها في بعضها ، دموعها تنز من غير ما تحبس ،صاح بصوت هدلها ضلوعها " تحرك...اهبط والا نجي انا نهبط "

هو صحيح مخوفها ...والخوف هو عايقها في  حياتها الكل ...لكن زادا حلفت ما تسيبش حقها وماتخليش حتى راجل يصيح عليها اكاكا...نطرت الباب وهي تهبط ...مشات خطوات وبعد حبست...ماتعرفش علاش زادت عليها دموعها ...قرب منها شطر خطوة وهي رجعت لتالي والخوف باين عليها ...خير مايزيدش يقدم وقعد يخزرلها ...من دون كل شي داير بيه ...كل شي قدامو...اختار يغرق في عينيها ...ما حكاش وماقالش ...لكن حست بايلي يحب يقولو ...

ما نطقش لسانها انما حدثوه عيونها ...غامر ها المرة وزاد قرب منها ...الخطوة الاولى ...وغاصت ساقو بالثانية ...حاوط بذراعو كتفها ...وبذراعو الثانية جبدها من وسطو ...حطت راسها على صدرو ...غمضت عيونها وتكمشت عندو ...بكات...وهو ربت على ظهرها ومسح عليه بكفو ...كمشت صوابعها على قماش تريكوه وتلذذت بالامان ايلي لقاتو ...نص الحمل حستو خف عليها ...حاجة ماجيك  نحت الشوك وماخلت كان  الورود في داخلها  ...هو...حلف وخذى يمين اذا ملكها ...يستحيل يشوف دمعتها ومايمسحها ويمسح...ايلي سببها .

💚💚💚

النسمة هازة شعرها تذري فيه متكية على خشم الكرهبة ومكتفة يديها ...واقف حذاها يخزرلها ...تبسيمة مرسومة بالسيف عليه ...شلقت  بيه ..تلفتتلو ...ضحكت وهي تستوي شعرها " ياخا ...نعجبك لها الدرجة يافهمي  "

حمورية حشمة غرق بيها وجهو وطبس راسو " ماتخيلتكش ترجع تلوج عليا "

عوجت فمها ورجعت تخزر للسماء " ماجاوبتنيش "

سمعتو يتنهد وبعد وقف مقابلها " ايلي نشوفو معاك ...اكبر من انو اعجاب "

ضحكت باستهزاء "تقليش حب  عاد "

قرب منها ...ومع قربو تلاشت ضحكتها...حمار وجها ورجف قلبها ...ثبت في وجها وفي كل قطعة مركبتو ...مال عليها وهي رجعت لتالي " ف..فهمي ...فا...ش تعمل !؟..."

تبسم " ماتخافش ...مانيش باش نبوسك..." وخر عليها وحط يديه في جيابو "لو اي حد وقف معاك بها المسافة القريبة ...كان يصير فيك هكا "

عقدت حواجبها " ش..شتقصد ؟! "

ضحك وهو يقوس حواجبو "ايلي نقصدو ...هو انو كلمة حب ...ماتضحكش كيما تتصور..." حط صبعو على صدرو" تتحس ..." حط صبعو تحت كتفها بشوية عوضا على صدرها خوف من انها تفهم لمستو بالغالط " تنجم في لحظة تحب...وتنجم تعدي سنين ...وانت تحاول تحب....الحب ...احساس مقدر ...يلبسك ويسكن فيك ...بالسيف عليك...حتى لو تجاهلتو ...حتى لو ما صدقتوش وكذبتو ...حتى لو استغربتو...اما ايلي يحب...موش احنا ...روحنا ...و ...قلوبنا "