💐صـــيــدُ آرتِــــمـــيــس 💐(كرونيك باللهجة التونسية: مكتملة )

الفصل الرابع ....🐬اغريقي و روماني 🐬

💐صيد آرتميس 💐

✴❤✴

التبسيمة ايلي كانت على وجه سليم كبرت وتوسعت وقت شحب وجه مراد أكثر، قدام خزراتو هو و اسماء ايلي تصور انها تنجم  تكون عادية ...كيما تنجم تكون نظرة اعجاب جات في وقتها وباش تقصرلو المسافات ...وبما انو  مستحق يبعدو من ثنيتو باش ينجم يكون هو  المرشح الاول سوى في البعثة والا في ادارة المتحف...فلازم مراد واسماء...يرتبطو ...لمعت عينو بخباثة وهو يجبد روحو من وسطهم وحاول ما يجلبش انتباههم  ...بالنسبة لغريمو كان غارق في بحر كبير من الافكار يا دوبك يوعى بروحو ...اما بالنسبة لاسماء فهي تغلي غليان ،بين مواجعها وذكرياتها ما لقاتش كيفاش تهرب  ...

شوفة مراد قدامها بعد هاك الوقت ...رجعها شهوووررر طويلة لتالي ...كانت فيهم فرحانة  بيه ومتصورة انو مافماش وحدة في ها الدنيا كسبت ايلي كسبتو ..تصاور فلو تعدو قدامها ...صوت الزغاريط عااالي والنساء الكل فرد صوت فرحانين بيها صبية في نهار وطيتها ...وهي تخزر بعينين كيف البلارة لبوها وخوها يحكاو ...استنت رودينة حتى ترجعلها بالخبر وكيف بطات عليها ...شمرت قفطانها ونادت بيهم...قلب المومن خبيرو ...وقلبها ماقايللها خير ...كيف شافوها منادية بيهم سكتو وخزرو لبعضهم ...مخها خمم كان في حاجة وحدة مافماش غيرها ...مراد جراتلو حاجة وهو في الطريق ...رعشت شفايفها وهي تثبت في وجه بوها ايلي دخن  وماترى فيه كان السواد "م....مـ...راد جراتلو ....حاجة !؟ "

نطق خوها من جنابو " ياريت جراتلو ورتحنا "

عقدت حواجبها ورمشت عينيها بضياع وهي ترى فيه يدخل لبيت من البيوت ...شدتها رودينة من يدها وكركرتها وراه ...تبعتها كيف الهايشة البكمة وين يدوروها تدور... دخلت ودخل معاها بوها وامها وتزرفت رحمة في اخر دقيقة ...كانت غاطسة في الماعون ...وفي اي فرح عندنا هاك الغاطسة ايلي لا تشوف ولا تتمتع ...المهم عندها ضيافة العرس اتم وعلى احسن وجه ...لعقت أسماء شفايفها وتكلمت بصوت متهدج " فمة حاجة صارت وانتوما موش حابين تقولولي عليها "

هدتها رودينة " اسومة ياروحي ...اهدى والله مافمة شي يستاهل "

عارضها خوها " لا ...فمة ..."شاورلها بسبابتو وكاينو يتهم فيها " خليها تسمع وتشوف اش عمل فينا سي الزوفري متاعها "

معادش تنجم تتحمل ولا عندها الصبر ،صاحت " تي تكلمو ...قولولي شنوة صاااار في ها النهار الكلب  "

خزرت طول لبوها ...ومن وجهو قرات القهرة والمرارة ...عرفت انو فمة جرح غارق تحل ...والمتضرر ها المرة موش قلبو انما كرامتو وصورتو في ااحومة ،خزرت بعدو لرحمة ...لرودينة ...وشي الكل صعبت عليهم ...ماقعدت الكورة كان عند خوها ...ضرب الطاولة قلبها وهو يصيح

" اك ***** متاعك قال معادش جاي ...بطل ...معادش عينو لا فيك ولا في نسبنا ....قالها واحنا ناصبين خيمة وطيتك  ...قالك من فم البير ولا من قاعو...غرقك وغرقنا في ها البير ..." تنطر عليها خنقها وهي شهقت بحرارة الروح " احكي شنوة عاملة...احكي علاش خلاك ونفر منك قبل نهارين من العرس ...حل فمك!؟ ...خسرت شرفك موش هكا ؟!...هو اكيد سمع عليك كلام ماعجبوش ...مستحيل يعمل حاجة هكا من غير سبب "