💐صـــيــدُ آرتِــــمـــيــس 💐(كرونيك باللهجة التونسية: مكتملة )

💐مـقَدمـــــة 💐

🎶مقدمــة🎶

"علااااش"
سؤال قصير ...صغير...واضح...لو سمعت جوابو ممكن تطفى نارها ...تهدى اعصابها ويبرى الجرح وتتلم قشرتو...شوافرها مندية بدموع مسكوبة ومهدورة بلا حساب ...شقوق بيضاء قاسمة شفايفها ابواب ابواب كل باب منها مشرع على محاين كواتها وشواتها بدل الكيّة كيّات .

عاطيها بظهرو ويخزر بعيد موش قابل لا شوفتها ولا راضي يواجه حسابها " جيانك لهوني موش باش يبدل شي ...قراري وخذيتو ...زايد اتعب في روحك ..."

بللت شفايفها الشايحين "من حقي نعرف علاش "

نفخ بهواء مثقل صدرو وخزرلها من فوق للوطة " خاطر ...مراد جويدان حب هكا ......" شاور بصبعو لصدرو "ايلي هو انا ..." خزرلها للحظات وبعد كمل " قررت ننهي كل شي ..."زم شفايفو وهو يقعد على حافة بيروويه " نرمالمون ...راك بديت تتعود بالوضع ...الحكاية عندها قريب الشهر توا ..."خزر ليديها وين مازالت حمورية باقية من حنة قديمة " هذا مكتوب ...وهاك ريت ...عمرنا مانهربو منو..."

غمضت عينيها وكبست عليهم وهي تعاود تسأل "علاااش ..."

نفخ بقلة صبر " خاطر عييت منك ...تعبت من محبتك ..."حاول يخلي نبرتو هادية " حبيتك ايه...عشت معاك ايامات حلوة ايه...لكن ...تعبتني ...هديتني وما
خليتليش حيل ..."

قربت منو شطر خطوة " وانا حبيتك...واستنيتك ...وماطلبت منك شي ...غير انك تحافظ على عهدك معايا ...بعد ها السنين الكل ايلي عديتها معاك ...تجي نهار فرحي وتخليها بيا ؟!...بتعلة انك عييت ....ما حسيت بتعبك كان نهار كتبان صداقنا ...ما حسيت بجهدك مهدود كان والناس ملمومة وتزغرط ...تشمت بيا ايلي يسوى وايلي مايسواش ...علاش موش من قبل ...علاااااش نهار فرحي تخليها بيييا "مدت كفوفها " شوف ...حنتي مازالت شاهدة...تفرج ...حنيتها ليك ...حنيتها لفرحي معاك......"

نطرلها يديها " برا يابنت الناس روح...المكتوب وفى ...وهذا راهو محل خدمة...موش ايلي يجي يدخل يعفس فيه ..."شاورلها للباب " تفضل...وها الثنية ماذبيك تنساها ..."فرك شعرو " وكان على دبشي ايلي عندك خوذو حلال عليك...ماتردلي منو شي ...انا ايلي بطلت وانا ايلي نتنازلك على كل شي "

هبطت دموعها وغلبتها ،عفست على قلبها " مراااد...هيا نصلحو ..هيا خلي نكملو ايلي بديناه...مستعدة نسامحك على كل شي ...اما ع الاقل امسح دمعة بابا ....راجل كبير واخر عمرو الناس تتغامز عليه ...اذا موش على خاطري ...على خاطر امي ...مرا نتشت من روحها باش تكملي زهازي ...روف على خواتي الرجال ...ايلي من شهر وهوما مافاتوش عتبة الباب مخبين وجوهم من كلامات الناس ...سكر افام العباد واثبتلهم اني شريفة عفيفة ...ومابعدنا كان المكتوب ...باهي ...ياسيدي انت تعبت وعييت مني ...نعرسو وبعد نطلقو ...المهم ...صلح ايلي كسرتو...راو ماقعد حد ماتكلمش عليا ...وليت منعوتة بالصبع ...يعيشك...ارحمني خلي الناس ترحمني "

نفض ذراعاتو بقلة صبر " ارحمني انت ...مرة في حياتك ارحمني ...بوك شرط عليا شروط تقسم الظهر وقبلتها ...امك مارضاتش بيا وقلت الايام تقرب قلوبنا ...خواتك حقروني وفي كل فرصة يذلوني ...كيفاش تحبني نعيش معاك...كيفاش نعاشرك وسط ها المشاكل ...حتى جمعة عرسي نغصوها عليا...فديت ...وكرهت كل شي...وتوا يعيشك اخرج ...يزي...وفى اامكتوب ...مانحبش نشوفك قدامي مرة اخرى "

عزت بيها كرامتها وهي تترفض اكثر من مرة...تنازلت وجاتو بساقيها تشحتتو وحاولتو باش يرجعو ...لكن رفض ...لسبب موش موجود...لسبب موش مقنع ...لسبب مانجمتش تفهمو ولا تتفهمو ...دارت ناحية الباب وحلتو ...هربت من قدامو وهي تجري من غير ماتتلفت وراها... ضاع كل شي وتكسر...وفات وفنت ...تحطمت لالف قطعة ومعادش تنجم تلمهم ...عايلة كاملة تهانت و مشات تحت الساقين جرايرها وجراير اختيارها ...عافت روحها وكرهت اانهار ايلي تولدت فيه ...ترهوجت بكاملها وقت سطعت بكتف حد ...تمايلت وهي تبعد عليه وتكمل طريقها تجري كل همها هو الهروب لاقصى نقطة من ها الكوكب ...

ضغط سنونو بغل وهو يخزرلها بعين شاعلة ...تناثر شعرها الطويل ايلي واصل لحزامها وغطى اكتافها وماخلاهوش يرى وجها ...نفخ بقلة صبر وخزر لاوراقو المفرتة لوطة ...طبس يلم فيهم ويعاود ينظمهم بين يديه ...ثبت في اخر ورقة طايحة وقرى المكتوب عليها "الفصل العاشر : ألهة الصيد " ارتميس " "