💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل السادس ..."مواجهة قاسية "💚

🌸صيد آرتميس
الحلقة6 🌸
🌿✴🌿

حالة سليم ...كانت بالضبط كيف مايقول المثل اليوناني "ان تلعثم احدهم فهو واقع بالحب "

لكن وقتاش صار هذا ...وقتاش حب ؟!...كيفاش فلت منو قلبو ...وكيفاش مافاق كان وقتها ...لا ...لا ...لا ...موش هذا...غمض عينو بنفي واضح...شافها بانوثتها ...بزينها ...عجبتو ...هاذي عي الحكاية ...علاش مخو صب طول في الحب؟!...والمثل اليوناني ...موش وقتو وموش في بلاصتو ...اامثل يحكي على حد مخالط حد...من شهور وسنين ...يعرفو مليح كيف كفو ...موش كيما حالتو هو ...من شهر وايامات معدودة يعرفها...

جبد كاس الماء وفرغو في كرشو ...اثبت يا سليم ...موش وقت تدخل فيه بعضك...هز عينو خزر في عينين اساتذتو ...لقاهم يستناو فيه يبدى وكلهم فخر انو تلميذ الجيل الثالث وصل لهاك النقطة من النجاح في مجال علم الاثار ...عدى عينو على مراد...لقاه بدورو يخزرلو...تصور انو يستنى في غلطة منو ...في كبوة يستغلها لصالحو ويخلي احلامو الكل تمشي مع الريح...اذا أسماء نقطة ضعفو وهي سباب الترهويجة متاعو...فهو معادش باش يخزرلها ...حتى لين يكمل ملاحظتو ...تفقد كرافاتو...استوى روحو ...بلع ريقو  عدى هاك الغصة الواحلة في ڨراجمو ...قرب الميكرو لفمو وريڨلو مليح قبل مايسأل الموجودين " اذا...الكل حاضرين ...انجمو نبداو ؟! "

جاتو الموافقة بهزات خفيفة من روسهم وتهمهيم واطي منهم ...شاور للتكنيسيان ايلي باش يعاونو في البروجيكسيون ايلي باش يفسر بيها وبدى " ديما نقول ...بلاد بلا تاريخ ...هي بلاد بلا مستقبل ...وبلادنا حااافلة بكنوز عظيمة لحد ها اللحظة مازلنا نكتشفو فيهم كنز وراء كنز..."

بتوصيات رودينة هي لازم تركز معاه واذا مافهمت شي ملي يقول فيه تتصنع التركيز وتعمل روحها مهتمة ...لكن سليم كان يحكي بكل كاريزما ...ومحاضرتو كانت كيف الرواية ...شوية شوية سرحت معاها ...بارشا كلمات مافهمتهمش لكن نجمت ع الاقل اتبعو وتركز في حكاياتو الكل وخذات فكرة عامة علي حكاه...الرومان ..ثقافتهم ...حروبهم ...ميزاتهم...اش عطو لتاريخ تونس و  اش خلو ...سرحت معاه ...وحست انو كلماتو خرجو كيف العسل من فمو ...وتقاطرو على خاطرها وقلبها خلوها ماتحسش بالوقت كيفاش تعدى ...وقت عطى كلمة الختام كانت عبارة باش تفارق في حد عزيز عليها ...تمنت لو زاد شوية  فيلي كان يحكي فيه ...

همزتها رودينة " شنوة ...سحرك زيوس "

تبسمت وهي تخزرلها على جنب " قصدك ...موش هو كبير الالهة متاع الرومان ...وزيوس خاطينا تابع الاغريق "

هزت رودينة حواجبها " اوبك...اوبك...بات ليلة مع الجران صبح يقرقر ..."

صفقو الحاضرين باعجاب وقت كمل سليم محاضرتو ورجع لكرسيه  ايلي يستنى فيه حذى اساتذتو ...وخلى الميكرو لمراد ايلي نرمالمون تكون المحاضرة الثانية  ليه .

حضور اسماء بهاك الاناقة والريشة عمل زلزال ...نجم سليم يشد روحو فيه ...لكن مراد لا...ضاع وتاه ...دخل بعضو ...ومعادش منجم يركز في شي ...حاول يحط مخو فيلي محضرو باش يحكيه لكن عقلو كل مرة يسرح بيه ناحية اسماء...حتى الوقت ايلي خذاه سليم في محاضرتو ما نفعهوش ...ومانجمش يشد الريڨلة واول ما وقف قدام الموجودين زاد دخل بعضو .