🍁صيد آرتميس🍁
🌹الحلقـــــــ10ـّـــّة 🌹
💚💚💚
"ماااانصدقش"
بحلقت رودينة في اسماء ايلي تكمل تحط في الماسك على وجها ومولى الدار موش هوني ، دورتها ليها بجبدة قوية من كتفها " يا لفعة كبرت وعملت عقل مدبر ...وبعثت رودينة ونصائح رودينة "
تبسمت اسماء " تسخايلني دشيشة والا دشيشة ...عطيتو ضربة على عرف الكرومة كيما عطاهالي وتعرف ..."ضيقت عينيها بشر ظاهر" مازلت مابردتش"
ضربتها على ظهرها " صاحبي راجل ...يستاهل هاك مراد جويدان ...كان سموه جحشان خير "
صوت رحمة من الصالة فزعهم " اسمااااء....جاك ايميل ...."
خزرت رودينة لاسماء موش فاهمين قصة ها الايميل ، تبعو بعضهم كي فاڨونات التران لين وصلو لثالثتهم وقبل ما يسألوها جاوبتهم " حليتو ...وقالولك غدوة تتعدى للادارة "
شهقت اسماء" ادارة ...كان ما ناوين يطيروني وانا مازلت ماترسمتش "
ڨحرتلها رودينة " اوتك اوتك علي يخمم في الترسيم " دزتها بكتفها " عسول ...راك دخلت بالاكتاف لهوني ...يحرزلك انا تدخلت ...ماتنساش علاش انت في ايكيب سلومة"
قبل ماتحط رحمة الكاسك وترجع لعالمها ما نجمتش ماتفكرهمش" اذا تشديتو انتوما الزوز ...ردو بالكم تجبدوني ...لا ريتكم ولا نعرفكم "
حركت رودينة فمها يمين ويسار وهي تشطح في اكتافها " شو هاك تشيغيفارا ايلي خايف على روحو " نطرتلها الكاسك من البي سي " قلنا فاش تسمع عندك ايامات غاطسة مطفيتنا "
تنفضت رحمة موش عاجبها " اووووف تي شبيكم الزح...تخلوش الوحدة رايضة "
قرات اسماء اسم المغني "ني...كوس ...جيااانيس ..." هزت حواجبها موش مصدقة وقت رات تصويرتو "نيكوووووس !؟ "
رجعت رحمة شعرها وراء وذنيها وفسرتلهم " لقيتو من اميات سليم ، دخلتلو بالصدفة نلقاه عامل شان يوتيوب ويهبط في غنايات يونانية روبري ..."تحمست تحكي " تعرفو صوتو يهبببل ...غير عااادي ...حنين ...وحزين ...يخليك تسرح معاه ...عندو حفلات صغيرة في رستورونات ولمات ...يقتل ..."
خزرت لرودينة و اسماء لقاتهم يبحلقو فيها مستغربين "شفمة ؟! ..."
رودينة "يظهرلي ...سليم العامري جرة ...اتبع فينا احنا التلاثة "
خزرولها رحمة واسماء ايلي سألتها " وانت اش لحقك من سليم "
شاورت رودينة بصبعها لروحها " انا ؟!...ياخا نسيتو سليم عرفي "
همهمو الزوز موش مصدقينها وهي طفتهم ومشات تتمايل قدام المرايا ...مالا كان تقلهم انها عاطية الجنب لخو سليم...اش يعملولها ..؟!
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
أنت تقرأ
💐صـــيــدُ آرتِــــمـــيــس 💐(كرونيك باللهجة التونسية: مكتملة )
Avontuur★الاسم " 💐صــَيْــدُ آرتــِـمـيــس💐" ★الكاتبة "نودا" ★النوع " رومنسي ،اجتماعي ،عائلي تشويق،اثارة ... ★عدد الفصول " 23 " ★تاريخ اول نشر " 14/11/2020 " ★تاريخ آخر نشر " 26/06/2021" ★القصّة " منحوتة رسمت تاريخ كامل مليان بالمحبة ...اسطورة حب تنقشت ب...
