💐صـــيــدُ آرتِــــمـــيــس 💐(كرونيك باللهجة التونسية: مكتملة )

💐الفصل الحادي عشر 💐 زوج و زوجة ..مزيفة💍

🍁صيد آرتميس🍁
🌹الحلقـــــــ11ـّـــّة 🌹
💚💚💚

تالمون عقلو فيها ماعادش واعي بشي داير بيه، ينظف في الحيط ويحك فيه وهو شارد ويخمم ...زعمة فضايح لبارح سمعتها والا ماوصلتهاش...ماشلقش بيها بجنبو كان كيف نادتلو باسمو " سي ..سليم "

دارلها مفجوع وكيف لقاها هي حاول مايظهرش ربثتو " أ...أسومة !..."

تبسمت بمودة وهي تحاول تقرى من وجهو اذا سمع فضايح رودينة لبارح والا لا...وقت لقاتو باهت فيها ومزبهل اصل ...اضطريت تدخل في صلب الموضوع ...مدتلو باسبورها وهي مثبتة فب عينيه " جبتلك الباسبور كيف ماطلبت "

جرى في عروقو الدم ونجم يتنفس براحة ،خذاه منها بعد مانفض يديه من التراب والغبرة وحلو يشوف فيه ...وكيف مالقى حتى طابع متاع مطار فيه خزرلها متشكك " ياخا بعمرك ماسافرت !؟ "

حبت تجرب حظها " لا سافرت ...من ااموقع للدار "

ضحكت ماشي في بالها حكت نكتة هبال لكن كشبرت بعدها بالوقت وقت شافت جبينو يتغضن وتظهر خطوط عليه ،محمحت باحراج " ماجاتش فرصة الله غالب "

هبطت راسها ولعبت بصوابعها كيف الصغار وهو ضرب خشمها بطرفة صبعو وضحك " وهاي جاتك الفرصة "

هزت عينيها فيه بفرحة وتحركت ساقيها بحماس " يعيشك...يعيشك ...مستحيل ننسى انك عطيتني ها الفرصة "

لقى روحو يضحك لضحكها و يفرح لفرحتها " مالا حضر روحك تلاثة جمعات اخرين ونسافرو ...تفاهمنا "

ضو وجهها بتبسيمة خفيفة " ان شاء الله "شاورت بكفها وراها " نمشي ..نشد خدمتي مالا"

متوقعة يجبدلها على لبارح ويقلها ماعاودتش طلبتني ...والا يسألها على سبة طراطش الكلام ايلي زرفتو رودينة ...وهو بدورو استناها تعطي حتى ملاحظة صغيرة ...لكن لا هي حكت و جبد الموضوع وتعدت الحكاية فقدان ذاكرة عن قصد ...

تنفست براحة كبيرة وهي تبعد ...وبعدها نفخ هواء ثقيل خرج بيه القلقل المدغور في صدرو ..

وضع القلق والخوف و التردد ماكانتش حالتو برك...حتى خوه فهمي تقريبا كان يعيش في نفس الحالة ...من بلاصة لبلاصة يدور بلا عقل ...يقلب في ايلي صار في مخو ومانجمش يلقى حل ...من بيت لبيت ومانجمش مخو يخدم ويلقى حل كان في بيت البانو ... مشط لحيتو بطرفة صوابعو وهو يخزر لتصويرتو في المرايا ...عقلو مشوش ويديه مربطة ...كان متوتر بارشا وموش منجم يطلب نومروها ...وبعد ايلي صار مع امو والكلام ايلي تكلاشى بيناتهم من غير قصد ...مستحيل رقمو يعاود يظهر عندها ...مط شفايفو بقلق ظاهر ...واضطر يصبر روحو بتعلة خلي للوقت بالكي بالمدة تتخلق صدف جديدة ويتجمع بيها ...يمن بارشا انو الحب صدفة ومكتوب ...والحاجة اذا نحبوها من اعماقنا لو كاتبتلنا تتخلق اسبابها حتى في اعماق بحر ...