💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل الثامن عشر 💚 ♥سر رحمة ♥

🍁صيد آرتميس🍁
🌹الحلقـــــــ18ـّـــّة 🌹
💚💚💚

للحظات قعدت مثبتة فيه ، نود حكايات دارت في مخها ، مما لا شك فيه هو عاجبها ع الاخير...وممكن ياسر بدات تحبو وتتعلق بيه ...هي اسانست بيه وبدلالو ...وهو ماخو بخاطرها مقدرها ووين نحطك يا طبق الورد...جوهم احلى جو...شايخين متفرهدين ...فاش قام عليها تبلبز حكايتهم...واذا بلبزتها ...باش تعدي  الشهرين ايلي مازالو متغارضة معاه ؟!...شتقعد وحدها وتزيد وحدتها اكثر اذا خذى موقف منها ...لا يا اسماء...ها المرة كون انانية ...خبي جروحك وروايتك حتى لرجوعكم لتونس ...وتوا عيش اللحظة...تفرهد وخمم كان في مصلحتك وفرحتك وابعث وراك كل حاجة تنجم تنغصلك حياتك ..

مال ناحيتها اكثر بنصو الفوقاني فكرها " يا اسماء...مازلت حاجتي بيك معايا...ماتسرحش بعيد...هيا ...قلي ايلي في بالك...فضفض  واشكي ...انا هوني باش نسمعك ونعرف مابيك "

عجز لسانها وبكشت جملة ...هبطت راسها وهي تحاول تنظم افكارها وتاخو قرارها فيسع ...وقت هزت راسها قابلتها هاك اليونانية جاية تتمايل بوسطها وين ما تتعدى تخلي وراها العينين تخزرلها هايمة بزينها ...ظاهرة جاية لسليم ...ماهيش مستعدة تخليهولها و لا تفلت محواسة معاه جراير عمايل مراد...تبسمت وهي تمد كفها تكبس على صوابع سليم " انا فرحانة بارشا انك في حياتي ...في العادة انا مانحكيش علي نحس فيه...ومانيش سوسيابل و...."

لعقت شفايفها وحمار وجها وهو تحمس اكثر يزيد يسمعها
" ...وشنوة ...كمل ..."

طقطيق صباط اليونانية قرب ...مااستنتش حتى توصل نادت لسليم بتمعجين خلاتو يعض شفايفو ويلعن زهرو ...ثبت في وجه اسماء لقاها ترحي دخلاني وباين عليها انها موش عاجبتها الفازة ...

طبست عليه باستو من خدو  وجبدت كرسي وقعدت ...هنا اسماء غلبتها كبرت ومعادش عندها قوة وصبر تتحمل ...قامت وبدات تلم في شقاشقها وصاكها ...لكن سليم وقفها وهو ينزل على معصمها " اقعد "

ماحبتش تخزرلو " خليني نمشي يظهرلي عندك ما اهم "

نبرتو كانت قوية وحازمة وجدية " اقعد قتلك "

بحلقت فيه مستغربة وقدام خزرتو الحارة ماكانش عندها حل غير انها تقعد ، خزر لهاك اليونانية وهو يشاور بكفو لاسماء وبلغة انجليزية واضحة للزوز عرفهم ببعضهم " هاذي اسماء صاحبتي وحبيبتي و شريكتي ..."

هز عينيه في اسماء " هاذي آدورا ...خطيبة نيكوس القديمة ...وهي زميلتي في البحث ايلي نعملو فيه ..انا وهي اصحاب مقربين بارشا... "

عاود خزر لآدورا  " سامحني.. ليوم ماانجمش نخدم  ونحضر معاك  ..." تبسم وهو ياخو كف اسماء ويضغط عليه " ليوم خليتو سبسيال للمرا ايلي نحبها...هي زادا عندها حق عليا ولازم نعطيها من وقتي "