🍁صيد آرتميس🍁
🌹الحلقـــــــ14ـّـــّة 🌹
💚💚💚
حسب العرف الجاري متاعهم ومفاهمتهم ، كل جمعة تخرج وحدة منهم تقضي ، والمرة هاكي كان باي رحمة ، بطبيعتها تكره كل شي لبرا قضية كانت والا عباد ، حياتها بي سي وكونكسيون وعالم الانترنات ...اما مجبورة تقوم بواجبها والا ماتنجحش صحبتها معاهم ، وبعد ماسافرت اسماء تحتم عليها جمعة بعد جمعة تخرج تقضي الشي ايلي زاد نفخلها راسها .
واقفة قدام برودويات النظافة تختار فيلي افوح ...و وراها بالضبط كان واقف رؤوف قدام باكوات الكوش حاير اناهو بالضبط ايلي يصلح ،وقت صعبت عليه الحكاية غامر وخطف واحد كيف ماجاء وقرر يسأل عليه اي مرا بجنبو ، تلفت لقاها هي ...وبحكم عاطيتو بالظهر ماعرفهاش، لكزها فماش ماتخزرلو "بربي سامحني اختي ...الكوش هذا...."
وساعت عينو موش مصدق ايلي واقفة قدامو " انت ؟! "
ضحك " يا والله صدفة "
خزرت رحمة للكوش ايلي في يدو وهو طول وضحلها " ماتفهمش بالغالط ..موش متاعي ...قصدي ...موش لصغيري ...انا عازب ...هذا لولد اختي وصتني عليه امو "
تأففت " فاش قام تبرر !؟ "
تبسم بود شاري تبسيمتها "موش نبرر اما...نوضحلك..نحبكش تفهم بالغالط وتظن اني معرس وهذا لولدي والا بنتي "
تنهدت بقلة صبر " امم ...باهي ...انا زادا عازبة ومانفهمش بالكوش ...لذا ماانجمش نعاونك.. "
همت باش تدز الشاريو وتبعد من بحذاه لكن هو حبسها "سامحني بالله ...موش انت ايلي اتبع في نيكوس وديما تعملو في اللايك في الانستا متاعو ...نتفكرك...نفس الوجه...اي سيرتو الشعر ...انا زادا فان ليه...هو صاحب سليم ...لكن رغم معرفتنا القريبة ...نقعد ديما نتبع فنو وموزيكتو ..."
طفتو وكملت تدز في الشاريو وهو شد جرتها وباكو الكوش في يدو مازال مستحفظ بيه " شو ...كانك فان ليه انجم...نعرفك عليه ...وتقابلو وتحكي معاه ديراكت"
نفخت بعصب تالف "اوووف... ياسيد عف عليا...برا اقضي لاختك وخليني نقضي انا زادا "
دار قدام الشاريو مانعها تتحرك "باهي ...اخر حاجة ...انجمو نعملو قهوة؟!...وقت تقابلنا في اامطار كنت مزروبة و ماصحتش الحكاية ...اما توا ...يظهرلي فمة امل"
" موش كنت مزروبة...انا ماحبيتش نشرب معاك القهوة المحنونة ..." ضربتو بالشاريو بغل " وتوا ابعد خنمشي على روحي...معادش بكري عليا "
الضربة كانت كاسحة شوية لزمت عليه يبعد من قدامها و هو يحرك في ساقو يتفقد في الوجيعة "صعيبة ...و كاشة ...ومخرجة ظوافرك...اما نموت ع الصعيبة ..."
تعدت من جنبو وهي تهز فيه وتحط"تي برا ماارمزك وماامسطك "
ضحك ومايعرفش اصلا علاش يضحك...ع النبز ايلي هبط عليه شتاء منها والا على فضيحتو قدام الكليونات فم ؟!!...قلب الكوش بين يديه وتمتم " وانت ...غير استنئ تركح هاك الكشوشة ونتفاضئ بيك وقتها نولي نفهمك ونفرق فيك "
أنت تقرأ
💐صـــيــدُ آرتِــــمـــيــس 💐(كرونيك باللهجة التونسية: مكتملة )
Aventura★الاسم " 💐صــَيْــدُ آرتــِـمـيــس💐" ★الكاتبة "نودا" ★النوع " رومنسي ،اجتماعي ،عائلي تشويق،اثارة ... ★عدد الفصول " 23 " ★تاريخ اول نشر " 14/11/2020 " ★تاريخ آخر نشر " 26/06/2021" ★القصّة " منحوتة رسمت تاريخ كامل مليان بالمحبة ...اسطورة حب تنقشت ب...
