💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل الواحد والعشرون 💚 صيد ُ آرتميس الحقيقي 💚

🍁صيد آرتميس🍁
🌹الحلقـــــــ21ـّـــّة 🌹

💚💚💚

غبرة كثيفة غطت السماء من بعيد ، رذاذ التراب وريحتو الخانقة سدت ڨراجم الحاضرين وماتسمع وقتها كان كلمات اللطف وكحانهم ، جراو   للقوس المحفور جديد وين تردم شطرو بالحجر الطايح والتراب المكدس ،صاح واحد منهم " البروفيسور مراد لداااخل ..."

صاحت وحدة اخرى " والفوتوغرافيست اسماااء مازالت كي دخلت غااادي "

تخاطفت التاليفونات ودارت بين الموجودين ، اول  حد طلبوه هو سليم لكن ما تحصلوش عليه بعدو طلبو مسؤولين اخرين وزميلات رودينة مانجموش مايكلموهاش ويعلموها خصوصي انو صاحبتها تحت الردم .

رودينة وقتها مع فهمي في كرهبتو مخها يغلي وبين الدقيقة واادقيقة تعاود تطلب اسماء شادة صحيح تتحصل عليها ...كيف طلبتها زميلتها من الخدمة استغربت اما  هزت وهي موش متوقعة الخبر ايلي جاها " شنووووة ؟!..."

ضربت ذراع فهمي ايلي يسوق وصاحت ودموعها هبطت بالوقت " ارجع ....ارجع للتيران ...السقف تهدم على اسماء ...فييسسسسع  "

دور الفولون وقلبو علت دقاتو بالخوف والفجعة ياستار يكون سليم زادا في الحكاية ما هوما الزوز مايهزوش ع التاليفونات .

_____💚💚💚____

وكاينو حد قالو برا شوف التاليفون ايلي من بكري يصوني ...مهما تكون المعضلة والمشكلة ايلي انت فيها واجهها ...الهروب كان للخواف وايلي عمل عملة...اما انت معاك الحق ...حتى لو كانت اسماء احكي معاها وافهم ايلي صار لكل ...نڨز بخفة من فوق الكرهبة و من غير ما يحل الباب دخل يدو جبد تاليفونو ...ايلي كان طالب واحد من الخدمة ...ههاذي اكيد حاجة جديدة تخص المدينة ...حست بتخديرة  تنمل معاها ساقيه ومن  الصدمة معادش منجم ياقف " وفمة...شكون لداخل من الايكيب ؟! "

فوق ما هي مهرودة زادت تهردت ...وفوق ما وجيعة قلبو ثوية ...زاد الجرح عمق ...طول طلع لكرهبتو وماخلى وراه كان الغبرة ...يضرب في الفولون ويعارك وحدو " اش مهزك لغادي...اش مدخلك...علاش ما تقليش وتتصرف من راسك..." ضرب صدرو " انا ...انا ايلي لازم نكون غااادي ...انا المسؤول ...انا هو...انت ...علاااه هابطة ..."

نسمة تحركت من شباك كرهبتو فيقتو على البلل ايلي في رموشو ...مسح عينيه يحاول يسبق دموعو ومايخليهاش تهبط ...المصايب تتصيد بنادم...احنا عندنا كلمة ديما نقولوها  " كي تجي ...تجي مع بعضها " ...تقول متفاهمة عليه ...خذات منو فرحة محبتو ...وماكفهاش مستو في ايلي حبها ونوت تاخوها منو زادا.

بوصولو كانت رودينة وفهمي زادا وصلو... هبطو من كراهبهم  واول ماخوه شافو تنفس براحة ماكانتش كاملة ...فمة  غصة في داخلو مخليتو مايفرحش بارشا  كي شاف سليم بخير .