💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل السادس عشر 💚غضب زيوس 💚

🍁صيد آرتميس🍁
🌹الحلقـــــــ16ـّـــّة 🌹
💚💚💚

"لااا...لااااا...لااااا...مانيش أنااا...مستحيل "

نفت باشارة من راسها وهي تخزر لروحها في المرايا، تلمست بصوابعها الرقاق شفايفها ، حست برجفة تنفض بدنها من راسها لساقها ...هزت شعرها بعدتو على جبينها وكملت لومها " شنوة صارلي ؟!...هذا سليم...سلييييم...واناااا...وانا مانجمتش حتى نقول كلمة وننطق ...ندزو ...نتصرف ..."

بدات تدادي وعقلها زايد عليها و مصورلها قداش غلطتها كبيرة ...هكا تعدت ليلتها...وين تتفكر اش صار تمكنها فوارة...تتقلب على اجنابها ماتلقاش راحة...تقوم تدور في البيت تحسها ضيقة ...تشد التاليفون ماتلقاش عندها رغبة باش تبربشو...ندمت بااارشا انها تصرفت معاه اكاكا...ندمت وموش عارفة كيفاش باش تقابلو من غدوة... كانت بلا عقل وقتها وتوا رجعلها ...وباش تصحح كل شي .

__💚💚💚__

شااايخ ...زااايط...متفرهد لاقصى درجة ...خارج من الدوش يشطح و المنشفة صغيرة في يدو يحرك فيها بدبكة كل مرة يغني مقطع منها وهو ينزل بساقيه ...ساعات هبلتو تزيد على حدها ...وكيفاش ماتزيدش على حدها ...ليوم عمل خطوة جبارة ...ليوم سطر ملكيتو لاسماء...ليوم رسمي ولى عندو حبيبة ...هاذي موش يدبك عليها هاذي تستاهل ربوخ تونسي يتخمر معاه للصباح .

رمى روحو على فرشو وطيش ذراعاتو كل ذراع في شيرة ...عاود كل لقطة صارت بيناتهم ...وخاصة حشمتها بعد مافاقت علي عملتو ...هروبها منو  ...حتى باش تستناه يروح بيها لا...طول طلعت مع  جيانيس وسبقتو للاوتيل ...طلبها ماهزتش ...اكتفت بمساج قتلو روحت...وبعد ماتأكد انها في بيتها وبالحق روحت طمان وماحبش يزيد يلصقها...حب يخليها على راحتها ...هوما الزوز دخلو فرندسي وتحكمت فيهم مشاعرهم...ماحكموش العقل ...لذا خليها تفهم روحها وتربصها ...والايام مازالت قدامهم .

💚💚💚

عاملة ماسك على وجها ،طالعة مطلية بالابيض تقول غاطسة في شكارة فرينة ،كان عينيها تلزلز ظاهرة ...صونى تاليفونها جنبها وكيف لقاتو فهمي وقفت وتسنترت ...وجها مكبوس وموش منجمة تحكي واضح ومسرح بحكم التلويطة ايلي مشيحتلها بشرتها وملصقتها " آلوووو ...فهمي ...لاباس!؟ "

كان في الشارع وصوت التزمير و الكراهب تفنفن حذاه خلاتو مايسمع شي ،صاح " اااالووووو...رودينة تسمع فيا "

دوب مالصقت شفايفها " نسمع ...فيك..."

صاح " آلووووووو....رودينة " في بالو علقت عليه ،عطى سيري متاع سب وكلام زايد للريزو قبل ما يخزر للايكرون ويثبت شنوة المشكل ...لقاها مازالت معاه...ومن الاكيد سمعتو ....جرى تخبى ببلاكة متاع طريق وطبس لوطة يحاول يهرب من ااحس , ها الفم ايلي عندو ضروري يتهد في اقرب وقت والا باش يباسيه. الووو...رودينة ...سامحني ...موش بلعاني "