💐صـــيــدُ آرتِــــمـــيــس 💐(كرونيك باللهجة التونسية: مكتملة )

💚الفصل التاسع عشر 💚وماذنبي ...ان كنت احبك؟! 💠

🍁صيد آرتميس🍁
🌹الحلقـــــــ19ـّـــّة 🌹
💚💚💚

حلت ذراعاتها وخذات نفس طويل وهي تتمشى بيدين فارغة " اللللله على ريحة البلاد "

طل عليها سليم من قدام وهو يدز في الفاليزات " لا اله الا الله "

ضحكت وهي تضرب صدرو " شبييك "

"موش انت ايلي روحت بيك بالدز...ماصحش اليونان باهية وماذبيك تزيد تقعد فيها ...قلبت الفيستة فيسع ووليت من جماعة ريحة البلاد يابا "

تنهدت وهي تدور شطر دورة تتفرج في المطار " والله شي ...وكرك وكرك..."

خزرت لقدام وين كل مسافر تلاقى بعد غربة بعزيز عليه ،لوجت بعينيها على جماعتها مالقت حد ، همزت سليم " ياخا وينهم ؟!...علاه مافمة حد يستنى فينا "

دوب ما هبط ليناتو وثبت في الصفوف قدامو " بالكي انت ماعطيتهمش وقت الطيارة الصحيح "

"تي لا وه...متأكدة قلتلهم ع الدات الصحيح..." خزرتلو بشك وهي ترميلو الكورة " زعمة موش انت مغلطهم...؟! "

ضحك وهو يدوح براسو "صبرك ...يارب " وقف ودورها ليه " وعلاش نغلط فيهم "

هزت اكتافها " مانعرفش...يمكن ...تحبنا نقعدو راس راس "

عض طرفة شفايفو وخزر على جنابو يراش حد مركز معاهم وكيف ماشاف حد طبس ...قرص خدودها الزوز وضربلها جبينها بصوابعو " انا ياروحي ...وقت نحبك ليا ...نغشي عينين العالم ونسرقك ..." غمزها " تحب تجرب ؟! "

ضحكت وهي توخر لتالي خايفة من هبالو " يزي يا مجنون في تونس رانا "

جبدها من كم مريولها وكركرها معاه " مالا ريض وخلينا نشوفو وين الجماعة وعلاه طفونا وماعرضولناش "

__💚💚💚__

محمح رؤوف وهو يخرج من كابينة صغيرة هزوه ليها باش يفهمو منو شنوة ايلي صار بالضبط واذا شيشكي والا لا ضد ايلي تهجم عليه...رودينة وفهمي و رحمة كانو يستنو فيه وعلى اول ماظهر دارو بيه متلهفين ،خيبة امل كبيرة باينة على وجها...حاسة بذنب كبير وحاشمة ع الاخير ...يادوبك خزرت في عينيه وهبطت راسها ...ماحبش يظهر انو مركز معاها و خير يدز فيها ضامر ويضحك "زعمة يعرفني سليم بعد عملية التجميل هاذي "

شهقت رودينة " وه عليا ...نسيتهم ...خطفت الدورة وجرات قاصدة تخلط عليهم خلوط...فهمي مشى بعدها ...ورحمة قعدت تبحلق في رؤوف لثواني قليلة و لحقت عليهم ...

تبسم وهو يلبس ليناتو ويخزر لروحو في البلار ايلي مقابلو ...زروقية في شفايفو ودم في خشمو ...يعني مشلق ماكل بونيات...عوج فمو موش هامو و كمل خلط عليهم .

ماقعدتش بارشا رودينة تلوج عليهم فيسع ما لقطتهم ...من دون الناس الموجودين صاحت وهي تنڨز " اسووووومة "