သူ့လူ (သူ႕လူ)

အပိုင်း (၃၁)

(Unicode)

ညနေကအန်တီသဲ Shock ရပြီးမူးလဲသွားသည်မို့ နှောင်းခေတ်တို့သုံးယောက်လုံးရုတ်ရုတ်သဲသဲဖြစ်သွားခဲ့ရသည်။ အန်တီသဲညီမတို့လင်မယားရောက်လာပြီး လိုအပ်သည်များစီစဉ်ပေးသွားသည်မို့တော်တော့သည်။ မဟုတ်လျှင် နှောင်းခေတ်တို့ကလေးတွေချည်း ဘာလုပ်လို့ဘာကိုင်ရမှန်းပင်သိမည်မဟုတ်။

အန်တီသဲညီမ အန်တီလေးတို့က ဖွားချစ်နှင့်အန်တီသဲအတွက်လိုအပ်သည်များအိမ်ပြန်ယူချိန်တွင် တက်လူကိုစိတ်မချ၍ မင်းသူရနှင့်နှောင်းခေတ်ကအလှည့်ကျနှင့်ထမင်းထွက်စားပြီး တက်လူဘေးတွင်တစ်ယောက်ကအစောင့်အနေဖြင့်ရှိနေပေးဖြစ်သည်။ နှောင်းခေတ်၊ တက်လူအတွက် ညစာဝယ်နေရင်းကျမှ သူ့ကိုဖုန်းပြန်ဆက်မယ်ပြောပြီးမဆက်မိသည်ကိုသတိရမိသည်။ သူဖုန်းမျှော်နေပေတော့မည်။

~လူကြီးမင်းခေါ်ဆိုသောဖုန်းမှာ စက်ပိတ်ထားပါတယ်ရှင်~

ဖုန်းကိုပါးမှခွာကာကြည့်မိတော့ ည (၉) နာရီဝန်းကျင်ခန့်ရှိပြီ။ ပုံမှန်သည်အချိန်မအိပ်တတ်သူမို့ စိတ်ပူသွားမိသော်လည်း မင်းသူရဆီကအမြန်ပြန်လာရန်ဖုန်းဆက်လာသည်မို့ မှာထားသည့်ပါဆယ်ဘူးကိုဆွဲကာ ဆေးရုံဆီသာပြန်ခဲ့လိုက်တော့သည်။

"တက်လူရော"

အရေးပေါ်ခန်းရှေ့တွင် မင်းသူရကိုသာတွေ့သည်မို့မေးမိတော့

"အန်တီသဲအခန်းထဲမှာ"

နှောင်းခေတ်သက်ပြင်းချရင်း

"မင်းညစာသွားစားလိုက်တော့လေ"

မင်းသူရလည်းခေါင်းတစ်ချက်ညိတ်ပြကာ လေးပင်သောခြေလှမ်းများဖြင့်ထွက်ခွာသွားတော့သည်။ မင်းသူရထွက်သွားပြီးမကြာမီ အန်တီလေးတို့ပြန်ရောက်လာသည်မို့ အန်တီလေးအမျိုးသားကို အရေးပေါ်ခန်းရှေ့ချန်ခဲ့ကာ နှောင်းခေတ်နှင့်အန်တီလေးက အန်တီသဲအခန်းဆီသို့ထွက်လာခဲ့လိုက်သည်။

"လူနာက စိတ်ဖိစီးမှုကြောင့်ရော၊ ခန္ဓာကိုယ်ကအားနည်းနေတဲ့အတွက်ကြောင့်ပါ ရှော့ခ်ရသွားတဲ့သဘောပါ။ အခုကတော့အခြေအနေတည်ငြိမ်သွားပြီဆိုပေမယ့် လူနာကိုစိတ်ချမ်းသာအောင်ထားပေးပါ"