(Unicode)
ပတ်ဝန်းကျင်တစ်ခုလုံး တိတ်ဆိတ်ငြိမ်သက်လျက်၊ ဟိုးအဝေးဆီကသီချင်းသံသဲ့သဲ့ကိုပင်ကြားနေရသည်။ တစ်ခါတစ်ခါအုန်းလက်လှုပ်ရုံမျှလေတိုးသံကြားတွင် ဘုန်းကြီးကျောင်းအနောက်ဘက် သစ်အိုပင်တွေဆီက ပုစဉ်းရင်ကွဲကောင်၏ အသံကျဉ်ကျဉ်လေးက ရံဖန်ရံခါ ထွက်ပေါ်လာတတ်သည်။ ကောင်းကင်ထက်တိမ်မျှင်တိမ်တန်းကြားမှာ လတစ်စင်း၊ ဘုန်းကြီးကျောင်းအနောက်ဘက်ကြာရွက်တွေကြားမှာလတစ်စင်း.....။
"မနက်ဖြန် ဘယ်နှနာရီကားလဲ"
လပြည့်ညတစ်ရက်သာပိတ်ပေးသည့် သူ့ဂိုက်ဆရာကိုပဲစိတ်တိုရမည်လား...၊ သူမအားတာကိုသိနေလျက်နှင့်တောင် သူ့ကိုဂျီကျမိသောကိုယ့်ကိုယ်ကိုဒေါသထွက်ရမည်လားမသိ။ သူ နှစ်ရက်နီးပါးကားပေါ်မှာအချိန်ကုန်ခဲ့ရသည်က ယခုလိုနာရီပိုင်းမျှအတူရှိဖို့မျှသာ။ ဒါကလည်း ဖုန်းပြောနေရင်း မိနစ်ပိုင်းမျှတိတ်ဆိတ်သွားမိခဲ့သည့် နှောင်းခေတ်၏မသိတတ်ခြင်းများကြောင့်.....။
"မနက်စောကား...ညနေ (၆) နာရီကျ ဂိုက်လာမှာ...။ အဲ့ဒါအမီငါပြန်ရောက်ရမှာ"
"ငါ့ကြောင့် မင်းသက်သက်ပင်ပန်းသွားပြီ"
"လူလူ...မျက်လုံးမှိတ်ပြီး နားထောင်ကြည့်...။ အရမ်းနေလို့ကောင်းတာပဲ"
သူကတက်ထိုင်နေသောပျဉ်ပြားေပါ် လက်နှစ်ဖက်ထောက်ရင်း၊ မျက်လုံးတွေမှိတ်ထားရင်းကပြောလာသည်။ ဝရံတာအပြင်ဘက်တွဲလျားချထားသော သူ့ခြေတံရှည်သွယ်သွယ်တို့သည် လေထဲတွင်စုန်ချီဆန်ချီရွေ့လျားရင်း ခြင်ပုန်းတွေရန်ကိုရှောင်နေရသည်။
သူနှင့်အတူဖြတ်သန်းဖူးသော ညပေါင်းများစွာရှိခဲ့သော်လည်း ထူးထူးခြားခြားကုန်ဆုံးမှုမျိုးရယ်လို့မရှိတတ်ခဲ့။
တချို့ညများတွင် အိမ်ရှေ့ဝရံတာရှိ ဒါန်းအဖြူရောင်ပေါ်တွင်ထိုင်နေသော နှောင်းခေတ်ပေါင်ပေါ်သူအိပ်ရင်း၊ သူ့ဆံပင်တွေကြားလက်ထိုးဖွရင်း ရောက်တတ်ရာရာပြောကြမည်။ ညကဘယ်အချိန်ကအိပ်ပျော်သွားခဲ့မှန်းမသိသော်လည်း မနက်ရောက်လျှင်တော့ အိမ်နောက်ဆုံးခန်းရှိနှောင်းခေတ်ခုတင်ပေါ်တွင် နိုးထလာရမည်။ တရုတ်ကပ်ကတစ်ဆင့်နေရောင်ခြည်ဖျာကျလာချိန်တိုင်း...၊ ကျေးငှက်သံတွေစုံလာချိန်တိုင်း…၊ ညာဘက်အိပ်ရာထက်တွင် သူအမြဲရှိနေတတ်ခဲ့သည်။
DU LIEST GERADE
သူ့လူ (သူ႕လူ)
Jugendliteratur(Unicode) နီးလွန်းရင် ဝေးတတ်လား .......။ Platonic Love ဆိုတ့ဲ သံယောဇဉ်နယ်နိမိတ်တစ်ခုရဲ့အောက်မှာ ရင်ခုန်သံချင်းအနီးဆုံးအနေအထားတစ်ခုကို ရောက်ရှိလာကြတ့ဲကောင်လေးနှစ်ယောက်အတွက် သတ်မှတ်ထားတ့ဲဘောင်ကို ကျော်လွန်မိရင်တော့ .......။ (Zawgyi) နီးလြန္းရင္ ေဝးတတ္...
