التفتت عليه و سألته ـ و الي يعرف الله هلگد مسامح مَيتوكل عليه و…
قاطعني حسين ـ فاطم لا تتحججين بالبنية انتِ مشكلتچ تصرفي الغلط وياچ، شنو شايفين نفوسكم اولياء لو انبياء؟ مَتخربطون؟ مَتغلطون
رديت عليه ـ حقي ما ظلت عندي ثقة
رد علية ـ اي گولي مشكلتي وياك لا تتحججين بالبنية
ردت احچي ما گدرت اختنگت فدرت وجهي حتى افوت للبراني
و حسين لزم عضدي و دارني عليه
گلي ـ ارفعي عينچ و جاوبيني مَغلطانة بحياتچ؟ ما متصرفة تصرف خطأ؟
طلع سيد حبيب من البراني سحب ايده عن عضدي و آني صرت مثل الطفلة الخايفة و شافت ابوها
لزمت عباية السيد و صرت ابچي
سيد ياسين سحب حسين يريد يدخله للبيت ما قبل و طلع
نظرات الموجودين و حچي حسين اليتردد باذني خلوني خايفة و ما اريد اتحرك خطوة من الفشلة و التوتر
ايلاف رادت تاخذ ايدي مَنطيتها ايدي و مَتركت عباية السيد
حاچيت سيد حبيب بصوت مخنوگ ـ فدوة سيد رجعني لبيتنا ما اريد ادخل
گل السيد لإيلاف ـ جدو جيبي عكازتي
و التفت على الباقين کلهم ـ ادخلو طلاب
التفتلي و مسح دموعي بأصابيعه و هو يردد ـ آآه من عتاب الاحباب
جابتله ايلاف عكازته اخذ ايدي و طلع وياية وصلني لبيتنا
دگ الباب فتحته مرأت اخوية فسلم السيد عليها و خلة ايده على ظهري حتى ادخل
سألتني مرأت اخوية ـ شبيچ ليش تبچين؟
رد السيد عليها ـ درس فاطم بالليل ، بلغو ابو تمارة أريد ادرسها بالليل فايتتها مادة هواية و ما اريد افسد نظام تدريسها
ردت ام تمارة عليه ـ على راسنا سيد بس يجي اگله
طبگت مرأت اخوية الباب و اجت وراية جرت ايدي و مَخلتني ادخل للمطبخ بقتني بالطارمة و سألتني ـ شبيچ ولچ؟ شنو حچيتي وية خطيبچ؟
بچيت و حضنتها دفعتني عنها و گالت ـ امچ جوة اسكتي و اصعدي گبل لغرفتچن، جاية وراچ
مسحت دموعي و طبيت شافتني امي و سألتني ـ ها شو رديتي؟
ردت عليها ام تمارة ـ اي سيد حبيب جابها و گال بتكم متأخرة جيبوها بالليل انطيها درس وحدها
رددت امي ـ هاا الله يوفقه
فتت للغرفة صاحت امي وراية "اگلچ" مَرديت عليها دخلت
گعدت على چربايتي و صرت ابچي
فاتت علية مرأت مسحت دموعي و لزمت وجهي و سألتني ـ بس سولفيلي تعاركتو؟ شصار
جاوبتها و آني انشغ ـ يگلي انتِ ماخذة البنية حجة و شايفة نفسچ نبي عبالك مَتغلطين
أنت تقرأ
في دواخلنا (قيد التعديل)
General Fictionفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
