في دواخلنا

15

ضرب الستيرن بكل قوته و صار يگول ـ تشوف يا الله آني روحي متگطعة على اختي و هذا المَيخاف الله شامر اخته بالمستشفى و ماخذ فلوس علاجها

خليت ايدي على عضده و رديت عليه ـ گول يا الله، خابر صاحبك خل يديرباله عليها و الفلوس تتشاركوها ان شاء الله

رد ـ و حق امير المؤمنين ما جاي اشوف دربي من خوفي على اختي، شلون انطاه گلبه
اني كل رنة موبايل اگول راحت ام حسن و هذا شامر اخيته غريبة و وحيدة بمستشفى!

رددت ـ مسكينة، بس ربك ما يگطع لو غيركم چان يگول دفعت فلوس و خلص و تظل هاي المسكينة بالشوارع، الحمد لله الي خلاها بطريقكم
 

اتنفس بارتياح و صف سيارته بباب الحوزة و گلي ـ وصلنا

نزلت من السيارة قفلها و دخل وياية للحوزة و هو يتصل على سيد حيدر

صعدنا للطابق الثاني مباشرة و هناك لگينا سيد حيدر گاعد وية اثنين نسوان كبار لابسات عبي

سلم حسين على السيد و عافني يمه و راح

عرفني سيد حيدر على النسوان و هن مدرسات وياه و انطاني كتب المرحلة التمهيدية حتى ادرسهن و امتحن لان كل هالكتب خاتمتهن وية سيد حبيب

اندگ بابه و دخلت مرأة مبوشة و وياها بنية مراهقة ، سلمت على السيد و هو سلم على بنتها
 
سيد حيدر حاچة امها ـ ام مصطفى هذي  " فاطم"، انتِ رديتني احچي وية سيد حبيب و ما گدر سيدنا فجبتلچ اشطر طلابه

التفتلي سيد حيدر و گلي ـ سارة عندها وسواس اذا توافقين تسمعين منها نكون ممنونين، لان سارة تخجل مني و  ما تقبل تسمع من غيري

رديت عليه ـ على قصر معلوماتي و فهمي بس حاضر

التفت السيد للبنية و حاچاها ـ سارة اخيتي فاطم جاي تگول العلاج سهل فگلت اجيبها و نجرب بلكي رب العالمين يكتبلنا الخلاص وياها

ردت ام البنية ـ يارب، الله يوفقك تعبتك وياية بس تعبنا و لو ما رب العالمين حرم اليأس چان يأسنا لا آني لا أبوها لا اخوتها كلنا...

قاطعتها البنية ـ حالها حال غيرها مَراح تفهمني

رديت آني عليها ـ جربيني

دارت وجهها بزعل، و آني التفتت على السيد و گتله ـ حديقتكم حلوة خل ننزل جوة نحچي

ردت امها علية ـ تقلل أدب وياچ، اعرف لسانها علوية

اخذت جنطتي و گمت عن الكرسي و رديت عليها ـ لا بالعكس مبينة وردة و آني مو علوية

رحت للبنية و مديت ايدي الها انطتني ايدها و طلعت وياية نزلنا

واحنا ننزل على الدرج گتلها ـ حتى آني من صار عندي وسواس محد فهمني

وگفت البنية و سألتني باستغراب ـ ليش انتِ هَم صار بيچ؟