خلة حسين اديه على وجهه و اتحسر بعدين گام و عيونه حمر وصل للباب و رجعلي سألني ـ ليش اني قاصد ادعمها؟
رديت ـ و الماقاصد يشرد و يعوف الي دعمها للموت لو يوكل امره لربه و ينزل يشيلها للمستشفى؟
رد علية بصوت مخنوگ ـ كافي فاطم
جاوبته ـ لا مو كافي انت غلطت و لازم تفهم غلطك ، الفلوس ما تحل محل العافية السلبتها من هالمسكينة و لا تحل محل الاخلاق الخلتك تتركها للموت بنص الشارع و تروح
و لا تحل محل الثقة الخليتها بيك و انت نزعتها من گلبي نزع
چنت اشوف تأثير كلامي بتعابير وجهه و عيونه الي گوة حابسة الدموع بس يستاهل لازم يفهم خطأه
لزم يدة الباب و التفت علية و هو يباوع بعيوني ؛ كأنما يريدني اهدئ عليه لو اتراجع شوية
فحاچيته ـ احمد ربك الموتى مَيشوفون بس الاعمال الصالحة لذويهم، احمد ربك ابوك مَجاي يشوف ليادرجة من اللامبالاة وصل ابنه
من ذكرت ابوه نزلت دمعته الچان حابسها فمسح عينه بسرعة وطلع
شگد خفت لا يجيب جده علية لو يسولف لأهلي بس من دخلت امي اتأكدت هو مَگايل شي
دخل لقمان للغرفة و سألني ـ شحچيتي وية السيد؟ طلع وجهه ازرگ و عيونه دم
جاوبته ـ الله يسمع منك و يحس شوية
رد بتساؤل ـ شيحس ولچ؟
باوعت بوجهه و رديت عليه ـ انت مو گلتلي محد يتدخل بيكم ، انتِ وياه تگعدون و تتفقون لحدما تخلون حد؟
رد لقمان ـ هاي هية خيتي
خلة ايده على چتف امي و گلها ـ يلا يمة عوفيها
سحبها سحب و طلعها من يمي بس شو اني اختنگت و فجأة بلشت ابچي
دخلت امي و تمددت يمي على القريولة و صارت تمشي ايدها على شعري و تسأل ـ ليش تبچين يبعد روحي؟
مسحت دموعي و جاوبتها ـ مشتاقة لأبوية هواية
ابتسمت و وية ابتسامتها نزلت دمعة يلا ردت ـ اگل لـلقمان ياخذنا ان شاء الله بس صيري زينة
الصبح خابرت واتساب على ايلاف لگيتها ما متصلة فخابرتها على الخط حتى تفتح نت علمود الدرس
ردت علية ـ الو فطوم
ـ هلا خيتي وينج دفتحي نت مو عدنا درس غير…
قاطعتني ايلاف ـ خيتي حسين متخربط و جدي حاير بي
ـ شبي
ردت ايلاف ـ صعدله ياسين الصبح و لگاه يخض، رجليه ثلج و راسه حار ، انطوه أدوية و نام عبالنا يتحسن تالي هسة رجع اتخربط و حتى تقيأ
ـ و هسة؟
ردت ـ راحو زلمنا كلمن طلع بصفحة عبالهم صار زين بس جدي و علي بالبيت ، ساعة يهذي ساعة يبچي ساعة يخربط بالحچي على ابوية حتى بالإيراني يحچي
أنت تقرأ
في دواخلنا (قيد التعديل)
General Fictionفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
