في دواخلنا

22

يا فاطم ادركيني.. يا فاطم ادركيني
اللهم صلّ على فاطمة و أبيها و بعلها و بنيها و السر المستودع فيها
مولاتي يا فاطمة ادركيني.. مولاتي يا فاطمة ادركيني

ما لفظت غير هالكلمات من وكت نزلت و خليت راسه بحضني و بعدها شفت دم راسه على ايدي

طول ما جاي اسمع بواچي الطفلة طوبى

طول ما جاي اشوف ابوتمارة يكف الطوارئ روحة و رجعة وهو يخابر شكو طبيب يعرفه

طلعوه الممرضين و هم يدفعوه بالسدية ردت اتقرب عليهم دفعونا ماخلونا نتدنا و اخذوه للعمليات

ابو تمارة لزم ايدي من رحنا نگعد بالانتظار و كل شوية يروح و يرجعلي

وصلو سيد ياسين و سيد طالب اتلگاهم ابوتمارة و سيد حيدر اخذ بنته و راح يردها للبيت لان البنية شبعت بواچي

خليت ايدي على راسي و حاچيت مولاتي الزهراء و طلبت منها لأول مرة : اني هَم فاطم سماني ابوية فاطم لان يحبچ و هذا اخوية الجوة، مولاتي و لا مرة طلبت منچ هاي اول مرة احچي وياچ لان ما اعرفچ، اعتبريني يتيمة تعلگت بعباتچ وگلتلچ ساعدي اخوية معقولة تديرين وجهچ عنها !

گعد ابو تمارة يمي خلة راسي على صدره و گلي ـ بس نتطمن على سلامته، ترحين يم امچ و البنات لان ماعندي غيرچ يبقى يمهن و يديرباله عليهن

رديت عليه ـ بس خل اشوفه و بعدها شتريد يصير

طلعت سبحتي من جنطتي و لفيت بيها (اللهم بحق فاطم و ابيها و بعلها و بنيها و السر المستودع فيها)

وصل عمي و ابنه و بعدها اجة ابو ايلاف و الانتظار صار ازدحام بسببنا

اجانا ممرض و بشرنا بسلامته و نجاح عملية رجله
صعدوه للجناح الخاص و اني وراهم و ابوتمارة كل شوية يگلي ـ لسة ما رحتي؟

گعدت يم راسه و لزمت ايده من شفت شكل وجهه و رجله بچيت بصوت عالي و هو فتح عيونه و حرك اصابيع اديه و ردد ـ فطومة رحمة لأبوچ شگد تبچين

بست ايده ابتسم و گلي و هو گوة فاتح عيونه ـ ما بية شي خيتي لا تبچين

رديت عليه ـ اروحلك فدوة بية و لا بيك

گال ـ اسم الله عليچ مرأة حامل، صدگ انتِ شتسوين هنا روحي ... وين ابو تمااارة

خلة لقمان ايده على ظهري و رد عليه ـ هسة ياخذوها السادة شلونك؟ راسك شلونه؟

رد بشير ـ ماعندي شي بس رجلي شوية هيچي تنغزني

ابتسم ابوتمارة و خلة نبرة صوته حادة و رد عليه ـ احسب حسابك ترا انت الغلطان ، داعملك تريلة لا هنا و لا هنية و تريلة اجبان شجاك ما لگيت غير هذا المسكين تبليه

عمي ادنة و باس راس بشير و هو يگول ـ اني اعوض الرجال ، المهم بشيرنا طلع سلامات الف الحمد لله على سلامتك عمي