في دواخلنا

21

گمت عن الچرباية و شغلت التبلام و سألت حسين ـ شبيك ليش هيچ تحچي؟

سحب الموبايل بكل قوته مني و صار يقرأ الرسائل و اني مصدومة من ردة فعله

قراهن و سألني و هو عصبي ـ منو هذا؟ بأي صفة يحاچيچ؟ شگايليله عليچ تشتغلين دجالة؟

خليت ايدي على حلگي و گمت للحمام ابچي و هو اجة وراية يصيح ـ فاطم احچي وياچ آني

قفلت الباب علية و ما خليته يدخل وراية و فتحت المغسلة غسلت وجهي

دگ حسين الباب و هو يصيح ـ فاطم، افتحي الباب.... اني ويامن احچي فااااطم

ضرب الباب ضربة قوية و صاح ـ فاطم افتحي و ردي علية، ترا و الله اخابر هذا الكلب و اطيح حظه

فتحت الباب و طلعت صك سنونه و سألني ـ عليمن تبچين؟ هذوله شافوچ حچيتي وية بنية اثنين بالوسواس صرتي إمام عندهم، ولچ فااااطم رجال يراسلچ
لو مرأة بيها مجال مو رجاااال

ـ و آني رديت عليه؟ اسألك شفتني رديت عليه او جاوبته؟ ليش دوم تتعصب بدون مَتفهم و تحكم بسرعة و تكسر خاطري؟

دگ سيد علي رضا الباب و گال ـ حسين اطلعلي و عوف البنية، اطلعلي و لا تخبط الأول و التالي صوتك وصل لجوة

طلع حسين يم سيد علي و اني رجعت اتمددت و غطيت راسي بالفرشة
شگد فشلة صوته وصل لجوة ، شتگول علية الناس

اختنگت و لعبت نفسي شلت الفرشة عن راسي و شفته گاعد على كرسيه و ايديه على راسه

ما لحگت اعدل گعدتي و اتقيأت على القريولة
عاف كرسيه و اجة ساعدني اوگف و دخلني للحمام

من شافني اتقيأت مرة ثانية وگف وراية و حط ايده على گصتي انوب طلع من الغرفة و صاح ايلاف يلا رجعلي

فتح حسين مفرغة الحمام و ايلاف اتطمنت علية و بدلت فرشة الچرباية

دخلت زهرة يمي من شافت احوالي نزلت سوتلي عصير ليمون و صعدتلي هي و حوراء مرأت سيد ياسين جبرني اشرب منه شوية

اخذت زهرة الگلاص و طلعت لبرا
حوراء باست راسي و عافت ايلاف يمي

دنگت ايلاف علية و گلتلي و هي مقهورة ـ ولچ اروح فدوة لدموعچ و لا تنقهرين خيولي حسين، لا تهتميله شيخربط خل يخربط

دخل حسين و ايلاف عافتني و طلعت ، طبگ حسين الباب و اجة گعد گبالي

درت وجهي عنه غير مكانه و گعد مقابلي مرة ثانية و مد ايده على راسي و گلي ـ صدگ فاطم تتخربطين هيچ؟ فاطم اني من اصير عصبي احچي شغلات مو واعي عليهن

رجعت درت وجهي و رديت عليه ـ اريد انام حباب اسكت عني

جبرت روحي على النوم و گعدت بالأربعة الصبح توضيت و لبست چادري اخذت سجادتي و طلعت