في دواخلنا

18

فزيت على صوت بواچي حسين چان يبچي و يصيح ـ اگعدووو راحت اخيتييييي ولكم راحت غاليتييييي

رگع الموبايل بالگاع و فتح باب الغرفة وطلع يصيح

بسرعة لبست عباتي و جواريبي و نزلت وراه

البيت كله انخبص و الكل يبچي ؛ و آني نازلة لاگيت ايلاف جاي تركض على الدرج و لوما لزمت ايدها چان وگعت

الأطفال كلها خايفة و تصرخ ، و العلوية ام ايلاف سدت باب غرفتها و دخلت يم اولاد المرحومة

لگيت حسين بالبراني يم جده ، گاعد يم رجليه و يبچي

دخلت ايلاف يمهم و سألته ـ حسين عود صدگ؟ ولكم مو گلتو گعدت من الغيبوبة !

خله حسين ايده على صدره و صاح من گلبه ـ آه

بيبيته گعدت يمه و مدتله اديها خلة راسه على رجليها و گلها ـ راحت بيبيي، حبيبتي راحت، خيتي بيبيييي ام حسن هاي رويحتي و الله چانت امي

سيد حبيب مسح عيونه و طلع لغرفته يبدل

رجعت آني صعدت لغرفتنا لبست جبة و ربطة أسود و اخذت قميص و بنطرون اسود لحسين

لگيت لزگة موبايله مكسورة شلتها عنه و اخذت محفظته و حذائه و نزلتهم

اغلب الرياجيل بالبيت صار تبدل ، ردت حسين يبدل و يطلع وياهم ما يظل بين النسوان

من مريت بالهول لگيت سيد طالب يمسح بدموعه و يگل لحوراء مرأت سيد ياسين ـ ياسين الرزن الهادئ يگلي خوية تعال يمي بعد ما اشوف دربي ، حسين شلون بي؟ ام حسن چانت روحه
إنا لله و انا اليه راجعون

فتت للبراني و چانت ايلاف تسأل حسين ـ يعني بعد ماكو اختنا؟

ما عرفت احاچيهم انتظرت سيد حبيب يطلع من غرفته و گتله ـ جدي صيح حسين خل يبدل و يروح وياكم لايبقى بين النسوان

فات السيد للبراني و دنگ على حسين ، مد ايده و گله ـ گوم حبيبي گول إنا لله و انا إليه راجعون
كل من عليها فان
هذا مصيرنا الحتمي گوم حبيبي

گام حسين و هو يمسح دموعه بظاهر ايده ، من شفت حاله انهد حيلي و راح كل صبري و آني الي حضنته و بچيت 

گوة لزمت نفسي و ابتعدت عنه و خليت ملابسه بإيده
فات للحمام المشترك لبسهن

بقيت متانيته بالباب طلع و دموعه تجري
راحو و بقينا بس احنا و سيد هادي و ابن سيد طالب

خابرت اهلي بلغتهم بوفاة العلوية ، اجو امي و ميادة و وياهم بشير و بعدين اجو نسوان جيراننا

ما نمنا بين الي ظلت تشتغل و تجهز البيت و بين الي تواسي العلويات

بعد الصلاة ام حسين اجتي تبچي يم بيبيته و گلتلها ـ علوية اريد اموت و الحگها، بتها الچبيرة گعدت و تسألني شعندكم شجاوبها؟